Nitsidika ny biraon’ny sampan’ny Vavolombelon’i Jehovah any Lima, renivohitr’i Peroa, ny solontenan’ny Ambasadin’i Tailandy any, tamin’ny 26 Jona 2018. Manampy an’ireo Tailandey migadra any Peroa mantsy ny Vavolombelon’i Jehovah ka te hisaotra azy ireo ny solontenan’ny ambasady.

Tamin’ny 2007 no nanomboka nampianatra Baiboly tany am-ponja ny Vavolombelon’i Jehovah any Peroa. Tamin’ny 2013 kosa izy ireo no nanomboka nitsidika fonja nisy Tailandey. Gaga ilay kaonsily tailandey rehefa nahita an’izany, ka nantsoiny ny biraon’ny sampana satria te ho any izy.

Ireto avy no solontena avy any amin’ny ambasady: A^toa Angkura Kulvanij, chargé d’affaires a.i., A^toa Pathompong Singthong, sekretera voalohany/kaonsily, ary R^toa Pradthana Pongudom, mpanampy ny kaonsily. Niaraka tamin’ny rahalahy sasany anisan’ny Komitin’ny Sampana izy ireo rehefa nitsidika ny sampana. Hitan’izy ireo ny asa mafy atao amin’ny fandikan-teny, anisan’izany ny fandikana ny bokintsika ho amin’ny fiteny sivy eo an-toerana.

Nanome taratasy ho an’ny biraon’ny sampana ilay ambasady ary nolazainy tao hoe “tena mankasitraka sy midera” ny Vavolombelon’i Jehovah izy ireo. Hitan’izy ireo mantsy hoe karakarain’ny Vavolombelon’i Jehovah “ny sahirana sy ny ory any Peroa, na inona na inona fivavahany na kolontsainy.” Nolazain’izy ireo tao koa hoe “miasa mafy ny Fikambanan’ny Vavolombelon’i Jehovah ao amin’ny sampan’i Peroa, sady manampy ny gadra tailandey mba ho maivamaivana ny fahoriany ary mba ho tsaratsara kokoa ny fiainany.”

Hita avy amin’izay niainan’ireo rahalahy any Peroa hoe misy vokany tsara foana rehefa mitory momba ny Baiboly amin’ny karazan’olona rehetra ny Vavolombelon’i Jehovah.—1 Korintianina 9:22.