Feno 75 taona amin’ny 1 Septambra 2022 ny nivoahan’ny Tilikambo Fiambenana amin’ny teny tagalog. Nisy 600 teo ho eo isaky Ny Tilikambo Fiambenana no nivoaka tamin’ny voalohany. Izao anefa efa ho 1,2 tapitrisa mahery isaky Ny Tilikambo Fiambenana no mivoaka. Misy amin’ny endrika elektronika koa ilay izy ao amin’ny jw.org.

Efa tamin’ny 1908 no tonga voalohany tany Philippines ny vaovao tsara. Lasa voalamina tsara ny asa fitoriana rehefa vita tamin’ny 1924 ny biraon’ny sampana. Boky sy gazety tamin’ny teny anglisy no tena nampiasaina tamin’ny voalohany. Tsapan’ireo rahalahy tamin’izany anefa hoe tena nila boky sy gazety tamin’ny teny tagalog ry zareo.

Tonga tany Philippines i Earl Stewart sy Victor White ary Lorenzo Alpiche, misionera nanao sekolin’ny Gileada, tamin’ny 14 Jona 1947 taorian’ny Ady Lehibe II. Vao voatendry ho mpikarakara ny sampana ny Rahalahy Stewart tamin’izany. Tonga dia nanendry rahalahy maromaro nahay tsara izy mba hanomboka handika Ny Tilikambo Fiambenana tamin’ny teny tagalog. Karazany roa isam-bolana Ny Tilikambo Fiambenana nozarain’ny mpitory nanomboka tamin’ny Septambra 1947.

Betsaka tamin’ny mpandika teny voalohany tamin’izany no niasa nandritra ny tontolo andro mba hamelomana ny fianakaviany, dia amin’ny alina ry zareo no mandika boky sy gazety. Nilaza ny Rahalahy Hilarion Amores, anisan’ireo mpandika teny hoe: “Indraindray izahay efa hatramin’ny roa maraina mbola miasa foana. Faly anefa izahay satria manampy ny mpiara-manompo hahazo ny boky sy gazety ilain-dry zareo.”

Misy 1 126 izao ny fiangonana miteny tagalog any Philippines, dia 97 443 ny mpitory any. Olona 76,5 tapitrisa eo ho eo no miteny tagalog ao amin’ilay firenena, ary 115 000 ny mpitory mampiasa an’io fiteny io maneran-tany. Miparitaka any amin’ny tany be dia be ny boky sy gazety amin’ny teny tagalog, dia betsaka ny mpitory sy ny olona liana maneran-tany mamaky azy ireny.

Misaotra an’i Jehovah isika satria mampiasa ny fandaminany izy mba hanomezana sakafo ara-panahy ho an’ny olona an-tapitrisany maneran-tany, sady amin’ny fitenin-dry zareo mihitsy.​—Matio 24:45, 46.