MANILLE, any Philippines​—Nanomboka asa goavana hanampiana tra-boina ny Vavolombelon’i Jehovah any Philippines satria te hanamboatra an’izay trano simba na rava noho ny Rivo-doza Nock-Ten (“Nina” no iantsoana azy any).

Namely ny faritr’i Bicol ny Rivo-doza mahery Nock-Ten tamin’ny 25 Desambra 2016, ka nandravarava be. Nilaza ny tatitra fa olona 10 no maty ary trano 390 000 mahery no simba noho ilay rivo-doza. Tsy nisy Vavolombelon’i Jehovah maty na naratra be tany amin’ilay faritra. Na izany aza, tranona Vavolombelona 300 mahery sy toeram-pivoriany 24 (antsoina hoe Efitrano Fanjakana) no simba na rava tanteraka. Nanangana komitin’ny vonjy rano vaky ny biraon’ny sampan’ny Vavolombelon’i Jehovah any Philippines, mba hanampiana an’ireo fianakaviana Vavolombelona tra-boina. Tany amin’ny tanànan’i Naga no natsangana ilay komity.

Hoy i Dean Jacek, mpitondra tenin’ny Vavolombelon’i Jehovah any Philippines: “Nahavita nanamboatra tranon’ny mpiara-mivavaka aminay 271 sy Efitrano Fanjakana 22 ny mpiasa an-tsitrapo hatreto. Mbola hanohy an’ilay asa foana ry zareo mandra-pahavitan’ny trano 38 sy ireo Efitrano Fanjakana 2 ambiny. Ny hamitana azy tanteraka amin’ny faran’ny volan’ny Aprily 2017 no tanjonay.”

Mandrindra ny asa maneran-tany ataon’ny Vavolombelon’i Jehovah ny Filan-kevi-pitantanana, ary tafiditra amin’izany asa izany ny fanampiana tra-boina. Vola fanomezana an-tsitrapo no ampiasaina amin’izany. Misy 8 tapitrisa mahery ny Vavolombelon’i Jehovah maneran-tany, ka mipetraka any Philippines ny 209 000 mahery amin’izy ireo.

Nomerao azon’ny mpanao gazety antsoina:

Iraisam-pirenana: David Semonian, Biraon’ny Filzam-baovao, +1 845 524 3000

Philippines: Dean Jacek, +63 2 224 4444