Navoaka tamin’ny fiteny lingala Ny Fandikan-tenin’ny Tontolo Vaovao nohavaozina, tamin’ny talata 29 Aogositra 2023. Navoaka tamin’io koa ny ampahany amin’ny Fandikan-tenin’ny Tontolo Vaovao amin’ny fiteny alur, kinande, kipende, kisonge, kituba, ary uruund. Tamin’ilay Fivoriamben’ny Vondrom-paritra hoe “Manàna Faharetana”! ireo Baiboly ireo no navoaka, ary ny Rahalahy Mark Sanderson, izay anisan’ny Filan-kevi-pitantanana, no nanao ny lahateny. Tao amin’ny Kianjan’ny Maritiora tao Kinshasa, any amin’ny Repoblika Demokratikan’i Congo, ilay fivoriambe no natao ary 75 715 ny mpanatrika. Nisy 219 457 koa nanaraka an’ilay fandaharana tamin’ny alalan’ny vidéoconférence tany amin’ny toerana 53 samihafa, anisan’izany ny Efitrano Fivoriambe sy ny toerana hafa ao amin’ny faritra iandraiketan’ny sampana. Tonga dia azo nalaina tamin’ny endrika elektronika daholo ireo Baiboly vaovao ireo. Efa vita pirinty ny Fandikan-tenin’ny Tontolo Vaovao nohavaozina amin’ny fiteny lingala sy Ny Soratra Grika Kristianina​—Fandikan-tenin’ny Tontolo Vaovao amin’ny fiteny kisonge, dia nizarana tamin’izany ny mpanatrika. Hivoaka any aoriana kokoa Ny Fandikan-tenin’ny Tontolo Vaovao vita pirinty amin’ireo fiteny hafa. Ireto misy tsipiriany vitsivitsy momba an’ireo fandikan-teny ireo:

• Olona 1 750 000 eo ho eo no miteny alur. Mipetraka ao Mahagi ny ankamaroany

• Fiangonana 45 no mampiasa ny teny alur ary 1 609 ny mpitory ao amin’ireo fiangonana ireo

• Tamin’ny 2013 ny Vavolombelon’i Jehovah no nanomboka nandika boky sy gazety tamin’ny fiteny alur

• Any Bunia no misy ny Biraon’ny Fandikan-teny Mitokana

• Olona 903 000 eo ho eo no miteny kinande any Ituri sy Kivu Avaratra

• Fiangonana 78 no mampiasa ny teny kinande ary 4 793 ny mpitory ao amin’ireo fiangonana ireo

• Tamin’ny 1998 ny Vavolombelon’i Jehovah no nanomboka nandika boky sy gazety tamin’ny fiteny kinande

• Any Butembo no misy ny Biraon’ny Fandikan-teny Mitokana

• Olona 2 tapitrisa eo ho eo no miteny kipende any amin’ny faritanin’i Kasai sy Kwango ary Kwilu

• Fiangonana 88 no mampiasa ny teny kipende ary 3 349 ny mpitory ao amin’ireo fiangonana ireo

• Tamin’ny 1996 ny Vavolombelon’i Jehovah no nanomboka nandika boky sy gazety tamin’ny fiteny kipende

• Any Kikwit no misy ny Biraon’ny Fandikan-teny Mitokana

• Olona 1 tapitrisa eo ho eo no miteny kisonge. Any amin’ny faritanin’i Lomami ny ankamaroany

• Fiangonana 31 no mampiasa ny teny kisonge ary 1 043 ny mpitory ao amin’ireo fiangonana ireo

• Tamin’ny 2006 ny Vavolombelon’i Jehovah no nanomboka nandika boky sy gazety tamin’ny fiteny kisonge

• Any Kinshasa no misy ny Biraon’ny Fandikan-teny Mitokana

• Olona 12 tapitrisa mahery no miteny kituba any amin’ny faritra avaratry ny Repoblikan’i Congo ary any Angola sy Gabon

• Fiangonana 30 no mampiasa ny teny kituba ary 2 137 ny mpitory ao amin’ireo fiangonana ireo

• Any Pointe-Noire no misy ny Biraon’ny Fandikan-teny Mitokana ho an’ny fiteny kituba, ary tamin’ny 2019 izy io no nisokatra

• Olona 40 tapitrisa mahery no miteny lingala

• Fiangonana 1 266 no mampiasa ny teny lingala ary 74 023 ny mpitory ao amin’ireo fiangonana ireo

• Tany amin’ny taona 1960 tany ho any ny Vavolombelon’i Jehovah no nanomboka nandika boky sy gazety tamin’ny fiteny lingala

• Tamin’ny 2009 no nivoaka Ny Fandikan-tenin’ny Tontolo Vaovao amin’ny fiteny lingala

• Any Kinshasa no misy ny Biraon’ny Fandikan-teny Mitokana

• Olona 153 000 eo ho eo no miteny uruund. Any amin’ny faritanin’i Lualaba ny ankamaroany

• Fiangonana 19 no mampiasa ny teny uruund ary 553 ny mpitory ao amin’ireo fiangonana ireo

• Tamin’ny taona 1994 ny Vavolombelon’i Jehovah no nanomboka nandika boky sy gazety tamin’ny fiteny uruund

• Any Kolwezi no misy ny Biraon’ny Fandikan-teny Mitokana

Azo antoka fa handray soa be dia be avy amin’ireo fandikan-teny nohavaozina sy fandikan-teny vaovao ireo ny rahalahy sy anabavy mampiasa an’ireo fiteny samihafa ireo. Izao no nolazain’ny mpitory iray miteny kituba: “Voamarikay hoe matetika ny olona ao amin’ny faritany no tsy mihaino anay satria tsy mampiasa boky sy gazety amin’ny fiteninay izahay. Taloha izao izahay namaky andinin-teny tamin’ny teny frantsay, dia tsy azon-dry zareo ilay izy. Fa izao izahay manana an’ilay fandikan-teny vaovao, dia afaka mihaino ny Tenin’Andriamanitra sy mandray soa avy amin’izany ny olona na dia tsy mahay mamaky teny tsara aza.” Izao koa no nolazain’ny olona anankiray momba ny soa azo avy amin’ilay Fandikan-tenin’ny Tontolo Vaovao nohavaozina amin’ny teny lingala: “Tsotra ny fehezanteny ao amin’ilay Baiboly dia mety tsara amin’ny fanompoana. Hoatran’ny hoe manana harena hozaraina amin’izay olona hitanay izahay izao.”

Matoky isika hoe hotahin’i Jehovah ny ezaka hataon’ireo rahalahy sy anabavy rehefa hampiasa an’ireo fandikan-teny vaovao ireo ry zareo mba hitoriana amin’izay “maniry mafy haheno ny tenin’Andriamanitra.”​—Asan’ny Apostoly 13:7.