28 JONA 2024
ROSIA

Anabavy Telo Voaheloka any Amin’ny Repoblikan’i Kalmoukie, any Rosia

HANDEFA

Nomelohin’ny Fitsaran’i Elista, ao amin’ny Repoblikan’i Kalmoukie, ny Ranabavy Tsagan Khalgaeva sy Yekaterina Menkova ary Kishta Tutinova, tamin’ny 24 Jona 2024. Samy nahazo sazy mihantona roa taona i Tsagan sy Yekaterina. I Kishta kosa nahazo sazy mihantona telo taona. Tsy voatery migadra aloha ry zareo izao.

Ilay voampanga

Tsagan Khalgaeva

Teraka: 1978 (tany Lagan, Repoblikan’i Kalmoukie)

Mombamomba azy: Mpanjaitra

Efa nitety fivavahana satria nanana fanontaniana be dia be. Nanomboka nianatra Baiboly tamin’ny Vavolombelon’i Jehovah, dia afa-po tamin’ny valin’ny fanontaniany

Natao batisa tamin’ny 2004

Resadresaka nifanaovana taminy

Inona no tena mahafaly anao mandritra an’izao fotoan-tsarotra izao?

Tena faly aho fa mivavaka ho ahy ny anadahiko sy ny rahavaviko. Rehefa kivy iny aho indraindray, dia tsapako hoe ny mitomany sy mivavaka amin’i Jehovah sisa no mba azoko atao. Tsy hitako izay teny holazaina amin’ilay vavaka. Haiko anefa hoe misy olon-kafa mivavaka ho ahy koa any ho any, sady hitako hoe mamaly an’ireny vavaka ireny i Jehovah. Dia mandrisika ahy hanao vavaka voafaritra ho an’ny hafa koa izany. Mampahery ilay hoe isika mifampivavaka, satria mampahatsiahy ahy izany hoe tsy irery aho miaritra an’ilay zava-tsarotra.

Yekaterina Menkova

Teraka: 1982 (tany Tavn-Gashun, Repoblikan’i Kalmoukie)

Mombamomba azy: Niasa tao amin’ny laboratoara

Nanambady tamin’ny 2009. Manan-janaka lahy iray

Nahavariana azy ny nahita hoe tena mampihatra an’izay lazain’ny Baiboly ny Vavolombelon’i Jehovah. Gaga koa izy nahita hoe nihatsara ny fiainany rehefa nampihariny ny torolalan’ny Baiboly. Natao batisa tamin’ny 2017

Resadresaka nifanaovana taminy

Inona no andinin-teny manampy anao hatoky an’i Jehovah?

Tena mampahery ahy ny Salamo 8:3, 4 hoe: “Rehefa jereko ny lanitrao, izay asan’ny rantsantananao, sy ny volana ary ny kintana noforoninao, dia inona moa izay olombelona mety maty no tsaroanao? Ary inona moa izay zanak’olombelona no karakarainao?” Te hilaza io andininy io hoe ny rantsantanany fotsiny dia efa nahavitan’i Jehovah namorona an’izao rehetra izao. Rehefa misaintsaina an’izany aho, dia lasa mahazo antoka hoe tsy misy tokony hatahorako rehefa manome hery ahy i Jehovah.

Kishta Tutinova

Teraka: 1961 (tany Novolesnoy, Faritanin’i Astrakhan)

Mombamomba azy: Mpanjaitra. Reny nitaiza irery ny zanany roa lahy

Bodista ny fianakaviany. Vavolombelon’i Jehovah iray nampanjaitra akanjo azy, no niresaka taminy voalohany momba ny Baiboly. Faly i Kishta rehefa nianatra hoe ahoana no atao rehefa mivavaka amin’Andriamanitra, sy hoe tsy ilaina ny manaraka fombafomba na minomino foana rehefa manompo azy. Natao batisa tamin’ny 2003

Resadresaka nifanaovana taminy

Inona manampy anao ho falifaly foana?

Tsy navela hivoaka ny trano nandritra ny efa-bolana mahery aho, tamin’izaho nambenana tao an-tranonay. Tena tsy mora ilay izy, satria izaho niara-nipetraka tamin’ny zanako lahy sy ny vady aman-janany, tao amin’ny trano kely iray. Fito mianaka izahay no tao. Nisy vokany be tamin’ny fahasalamako izany. Nanampy ahy anefa ny nisaintsaina ny Ohabolana 24:10 hoe: “Raha kivy ianao rehefa ao anatin’ny sarotra, dia ho kely ny herinao.” Tonga saina aho hoe mila mifidy aho izany hoe na hifantoka amin’ny zavatra mahakivy na hifantoka amin’izay tsara ananako. Tadidiko ilay modelin’i Josefa hoe tsy navelany hampahatezitra azy ny zavatra niainany tamin’izy nigadra. Dia tapa-kevitra aho hoe aleo mifantoka amin’ny zavatra tsara, dia izany no manampy ahy ho faly foana.

Mendri-piderana ireny mpiara-manompo amintsika manam-pinoana ireny. Faly koa isika mahalala hoe hitan’i Jehovah daholo ny fitsapana atrehintsika ary hamaly soa antsika izy raha tsy mivadika isika.—Salamo 37:18.

Zava-nitranga

16 Febroary 2023

Nampangaina ho mpanao heloka bevava i Kishta
28 Febroary 2023

Nosavana ny tranon-dry zareo. Notanana am-ponja vonjimaika i Kishta
1 Martsa 2023

Voaroaka tamin’ny asany i Tsagan satria nalaza be hoe mpanao heloka bevava izy. Tsy notanana am-ponja vonjimaika intsony i Kishta, fa nambenana tao an-tranony indray
21 Jolay 2023

Tsy nambenana tao an-tranony intsony i Kishta
19 Desambra 2023

Nampangaina ho mpanao heloka bevava i Yekaterina sy Tsagan. Samy tsy navela nanao dia lavitra ry zareo
9 Febroary 2024

Tsy navela nanao dia lavitra i Kishta
1 Aprily 2024

Nanomboka ny fitsarana azy ireo
24 Jona 2024

Nomelohina izy telo vavy ary nomena sazy mihantona

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO