10 JOLAY 2023
ROSIA

Anabavy Telo Voaheloka any Komsomolsk-sur-l’Amour

HANDEFA

Nomelohin’ny Fitsaram-paritr’i Centralniy any Komsomolsk-sur-l’Amour ny Ranabavy Tatyana Bondarenko sy Yelena Nesterova ary Tatyana Svoboda, tamin’ny 23 Martsa 2023. Samy nahazo sazy mihantona dimy taona avy ry zareo. Tsy mila mankany am-ponja aloha ry zareo izao.

Ireo voampanga

Tatyana Bondarenko

Teraka: 1960 (Komsomolsk-sur-l’Amour, Faritanin’i Khabarovsk)

Mombamomba azy: Mpampiasa masinina fitotoana voan-javatra tao amin’ny orinasa iray taloha, dia avy eo mpanadio trano

Nanambady an’i Vladimir tamin’ny 1992. Manan-janaka roa lahy ry zareo

Nanomboka nianatra Baiboly rehefa nahafantatra ny fikasan’Andriamanitra ho an’ny olombelona sy ilay fampanantenany hoe ho lasa paradisa ny tany. Natao batisa tamin’ny 2005

Resadresaka nifanaovana taminy

Ahoana no nanampian’i Jehovah anao amin’izao zava-tsarotra iainanao izao?

Tsy Vavolombelon’i Jehovah ny vadiko. Tany amin’ny hopitaly izy, tamin’ny tranonay nosavana. Niantso ahy izy ny harivan’iny satria nasain’ny dokotera nody amin’izay, fa nalain’ny manam-pahefana ny telefaoniko dia tsy nahazo ahy mihitsy izy. Efa hariva be vao vita ny famotorana ahy, dia izay aho vao afaka nividy telefaonina vaovao sy niantso azy ary nanazava taminy ny zava-drehetra. Nahakivy ilay zava-niseho. Fa tadidiko hoe nivavaka aho tamin’izay dia nangataka tamin’i Jehovah mba ho tony, dia novaliany ilay vavaka nataoko. Tonga tany an-trano ihany izahay ny farany. Dia rehefa tonga tany izahay, dia tsara fanahy be ny vadiko sady nanampy ahy handamina an’ilay trano nikorontana be. Nanampy ahy hatoky kokoa an’i Jehovah iny zava-nitranga iny.

Yelena Nesterova

Teraka: 1967 (Komsomolsk-sur-l’Amour)

Mombamomba azy: Mpanao kaonty no asany taloha

Manan-janaka roa vavy. Maty ny zanany iray tamin’ny 1998

Lasa nahafantatra ny Vavolombelon’i Jehovah satria Vavolombelona ny mpisolovavany. Resy lahatra rehefa nahita hoe manao ny marina ry zareo sady nahavita namaly ny fanontaniany tamin’ny alalan’ny Baiboly. Natao batisa tamin’ny 1997

Resadresaka nifanaovana taminy

Inona no nianaranao avy amin’izao zava-tsarotra iainanao izao?

Vao mainka izao hitako hoe mahasoa ny manaraka ny torohevitra omena antsika. Vao avy nampangaina hoe mpanao heloka bevava aho, dia nisy anadahy izay nanoro hevitra ahy hoe tamin’izay aho dia tokony hanomboka hanomana ny zavatra hoteneniko amin’ny faran’ny fitsarana ahy. Hoy aho tany an-tsaiko tany hoe: ‘Ilay fitsarana aza ange mbola tsy nanomboka akory e!’ Fa nivavaka momba an’ilay izy aho tamin’izay, dia tapa-kevitra hoe aleo tonga dia homanina ihany ilay izy, dia hosoratako daholo izay tiako hotenenina. Tena nahasoa ahy ilay izy. Nandeha haingana be mantsy ny zava-drehetra avy eo. Raha tsy niomana mialoha aho dia tsy ho nahavita nijoro sy niteny tsara tamin’ilay fitsarana. Soa ihany aho fa nihaino ny torohevitr’ilay anadahy, na dia tsy tena azoko tsara aza ilay izy tamin’ny voalohany.

Mivavaka isika mba hotahin’i Jehovah sy homeny hery foana ny rahalahy sy anabavintsika, satria tsy mivadika ry zareo na dia miatrika ny mafy aza.—Rota 2:12.

Zava-nitranga

21 Septambra 2021

Nisokatra ny raharaha niampangana an’i Tatyana Svoboda ho mpanao heloka bevava
18 Oktobra 2021

Nanomboka natao famotorana koa i Tatyana Bondarenko sy Yelena Nesterova
20 Oktobra 2021

Nosavana ny tranon-dry zareo
28 Aogositra 2022

Voafaritra ny zavatra iampangana an-dry zareo
28 Desambra 2022

Nanomboka ny fitsarana
23 Martsa 2023

Voaheloka sy nomena sazy mihantona dimy taona avy

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO