27 JANOARY 2022
ROSIA

Be Herim-po ny Rahalahy Roa Satria Mahatsapa hoe Ampian’i Jehovah

HANDEFA

Kely sisa dia hamoaka didim-pitsarana momba ny Rahalahy Anton Kuzhelkov sy Nikolay Prokhorov ny fitsaram-paritr’i Kirsanov, any Tambov. Mbola tsy fantatra ny sazy angatahin’ny mpampanoa lalàna hampiharina amin’izy ireo.

Zava-nitranga

21 Desambra 2020

Nampangaina ho mpanao heloka bevava i Anton sy Nikolay satria hoe mikarakara zavatra ataon’ny fikambanana mampidi-doza
24 Desambra 2020

Trano 19 no natao savahao, ary anisan’izany ny tranon’i Anton. Nentin’ireo mpanao famotorana tany amin’ny 350 kilaometatra niala teo i Anton mba halaina am-bavany. Nalaina am-bavany koa i Nikolay ary tsy navela hiala an’ilay faritra misy azy
25 Desambra 2020

Tsy navela hody tany an-tranony i Anton fa notanana am-ponja vonjimaika
30 Aogositra 2021

Nafindra tany amin’ny fonja hafa i Anton

Ireo voampanga

Anton Kuzhelkov

Teraka: 1993 (Sortavala, Repoblikan’i Carélie)

Mombamomba azy: Manana rahalahy roa ary izy no lahimatoa. Tia manjono sy mikorisa amin’ny lanezy, tamin’izy mbola kely. Nampianarin’ny dadany nanao trano

Natao batisa tamin’ny 2007. Nanambady an’i Alyona tamin’ny 2015

Resadresaka nifanaovana tamin’i Alyona, vadin’i Anton a

Inona avy ny olana natrehinao rehefa hitsidika an’i Anton?

Rehefa mba azo notsidihina kely izy, dia tsy maintsy nankany amin’ilay mpanao famotorana aho indroa isam-bolana mba hangataka alalana. Nitaintaina be foana aho isaky ny nanao an’izany. Raha te ho any amin’ilay fonja koa aho, dia tsy maintsy manana porofo aloha hoe tsy voan’ny COVID. Lafo be anefa ny manao test.

Diso fanantenana aho satria najanona daholo aloha amin’izao ny fitsidihana. Ny fitsarana azy koa anefa etsy andaniny efa nanomboka, dia izaho avelan-dry zareo manatrika. Ilay izy anefa any amin’ny 100 kilaometatra miala ny tranonay no atao.

Inona no manampy ny vadinao hiaritra amin’izao izy any am-ponja izao?

Vavaka voafaritra tsara sy vokatry ny fo no manampy azy hiaritra. Indraindray aza izy sady mitomany no mitalaho amin’i Jehovah. Tsapany hoe na inona na inona zavatra atrehiny, dia manampy azy foana i Jehovah. ... Miezaka mankafy ny zavaboary koa izy. Matetika, ohatra, izy no mandinika ny vorona rehefa mandehandeha eny an-tokotanin’ny fonja. ... Misaintsaina ny fahendren’ilay Mpamorona izy sady misaintsaina an’ilay fanoharan’i Jesosy momba ny fody. ... Ireo no manampy azy ho falifaly foana.

Nikolay Prokhorov

Teraka: 1964 (Morchan, Faritr’i Tambov)

Mombamomba azy: Nanao miaramila. Tia milomano sy mitety tany

Nanambady an’i Yelena tamin’ny 2008. Manan-janaka mianadahy. Nanomboka nianatra Baiboly rehefa nahita ny fitondran-tena tsaran’ny Vavolombelon’i Jehovah. Natao batisa tamin’ny 2008

Resadresaka nifanaovana taminy

Nisy fotoana ve ianao nahatsapa hoe nampian’i Jehovah?

Nanohana be [ahy] foana i Jehovah, na dia tao anatin’ny fotoana mafy indrindra [tamiko] aza. ... Indray mandeha, ohatra, izaho irery no teo niaraka tamin’ny manam-pahefana niezaka nanery ahy hiara-miasa amin-dry zareo na, fara faharatsiny, hiaiky hoe “nanao heloka bevava” aho. ... Nisy fotoana indray nipetraka aho sady lasa saina hoe ho vitako ve ny tsy hivadika. Natahotra be mantsy aho tamin’izay. Nivavaka tamin’i Jehovah aho mba homeny hery sy hampiany ho tony. Voamariky ny polisy iray ilay izaho niondrika nivavaka, dia nanontany izy hoe: “Fa inona no angatahinao amin’ny vavaka?” Dia hozy aho hoe: “Mivavaka aho mba hampian’Andriamanitra tsy hitsetra tena.” Tadidiko avy eo ny Isaia 54:17, dia tonga saina aho hoe tsy afaka manao inona ahy ry zareo. Lasa tsy natahotra intsony àry aho, ka na ny polisy aza nahamarika an’ilay izy. Tsy niezaka nampitahotra ahy intsony ry zareo, tamin’ny farany. Nangataka tamiko mihitsy aza ry zareo mba tsy hitana lolompo aminy.

Inona no nataon’ny mpiara-manompo mba hanampiana anareo mivady?

Tena nanampy be anay ny fiangonana. Betsaka tamin’ny mpiara-manompo no niezaka nifandray taminay, na dia mety hahatonga an-dry zareo ho voamariky ny manam-pahefana aza izany. Nahazo antso an-telefaonina avy any amin’ny faritra samihafa eran’i Rosia sy avy any an-tany hafa koa izahay.

Nanohana anay daholo ny rehetra tao anatin’izay fotoan-tsarotra izay. Na tamin’izaho niakatra fitsarana aza, dia teo foana ry zareo ... Hita hoe tena mifankatia isika Kristianina, ka fitoriana vita ho azy ho an’ny olona rehetra tany amin’ny tribonaly izany. Ny fanohanan’ny mpiara-manompo no tena manampy anay mivady ho tapa-kevitra ny tsy hivadika amin’i Jehovah [amin’izao fotoan-tsarotra izao].

Matoky isika fa homen’i Jehovah herim-po sy hotohanany foana ireo rahalahy sy anabavintsika enjehina.—Ohabolana 1:33.

a Tanana am-ponja vonjimaika izao ny Rahalahy Kuzhelkov, dia izay no mbola tsy nahafahana niresaka taminy.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO