9 FEBROARY 2024
ROSIA

Be Herim-po sy Matoky An’i Jehovah ry Zareo

HANDEFA

Tsy ho ela ny Fitsaran’i Blagovechtchensk, any amin’ny Faritr’i Amour, dia hamoaka ny didim-pitsarana momba ny Ranabavy Kristina Golik, Yekaterina Olshevskaya, Mariya Myasnikova, ary Valentina Yermilova. Mbola tsy nilaza ny sazy homena azy ireo ny mpampanoa lalàna.

Ireo voampanga

Kristina Golik

Teraka: 1992 (Ukraine)

Mombamomba azy: Nianatra momba ny sary sy famoronana pejy ao amin’ny Internet

Efa hatramin’ny dadaben’ny dadabeny no Vavolombelon’i Jehovah. Natao batisa tamin’ny 2006

Nanambady an’i Dmitriy tamin’ny 2012. Nomelohina higadra enin-taona sy roa volana i Dmitriy tamin’ny Jona 2021, ary any am-ponja amin’izao

Resadresaka nifanaovana taminy

Inona no andinin-teny manampy anao ho faly foana?

Tsy haiko mihitsy izay tokony handraisana an’ilay tsy rariny, tamin’izahay sy Dmitriy vao tafasaraka. Nalahelo azy aho, satria tsy teo intsony izy hampahery sy hanohana ahy. Nitalaho tamin’i Jehovah aho mba hanampy ahy. Tonga teo amin’ny Salamo faha-17 aho rehefa namaky Baiboly. Tena nanohina ny foko ny andininy faha-15 hoe: “Fa izaho kosa manao ny marina, ka hahita ny tarehinao; afa-po aho rehefa mifoha eo anatrehanao.” Rehefa mifoha aho izao isa-maraina, dia miezaka mitadidy hoe i Jehovah Andriamanitro no tena mahafantatra hoe ahoana no hahazoako ny fampiononana sy ny fampaherezana ilaiko. Mahita antony hitsikiana foana aho izao, na dia miaritra ny mafy aza.

Yekaterina Olshevskaya

Teraka: 1984 (Blagovechtchensk)

Mombamomba azy: Nanambady an’i Anton tamin’ny 2010. Manan-janakalahy efa-taona ry zareo

Nomelohina higadra enin-taona mahery i Anton sy Sergey Afanasiyev dadan’i Yekaterina tamin’ny Desambra 2022, ary any am-ponja ry zareo amin’izao

Resadresaka nifanaovana taminy

Nahoana ianao no lasa akaiky kokoa an’i Jehovah tao anatin’ireny fitsapana ireny?

Nandreraka be ahy ny nivezivezy teny amin’ny fitsarana nandritra an’izay dimy taona izay, tamin’ilay raharaha mahakasika an’i Dada sy ny vadiko, dia amin’izao ny ahy. Mety halefa any am-ponja aho, dia tsy hisy ray aman-dreny hikarakara azy intsony ilay zanakay efa-taona. Na izany aza, dia mahatsapa hoatran’ny tsapan’i Joba aho. Izao no lazainy ao amin’ny Joba 42:5: “Efa naheno momba anao aho, fa izao kosa dia ny masoko mihitsy no mahita anao.” Tsy mora ny mahazo ahy sady tsy misy vady hianteherana koa aho. Tsapako anefa hoe lasa akaiky kokoa an’i Jehovah noho ny hatramin’izay aho. Izao no nolazain’i Anton indray andro izay: “Marina hoe mety higadra sy tsy ho afaka hamelona anareo aho. Ho hitanareo anefa hoe tsy misy loham-pianakaviana tsara hoatran’i Jehovah. Hikarakara anareo izy.” Tena tsara fanahy tamiko tokoa i Jehovah. Tsy hoe nitsetra ahy fotsiny izy fa nanao zavatra mihitsy. Mampahery sy manome izay ilaiko izy, ary matetika na mbola tsy mangataka akory aza aho dia efa manao zavatra izy.

Mariya Myasnikova

Teraka: 1994 (Chernigovka, Faritr’i Amour)

Mombamomba azy: Mpiandraikitra tao amin’ny orinasa iray

Ny mamany no nampianatra Baiboly azy. Nampiaiky azy ny fahatanterahan’ny faminanian’ny Baiboly sy ilay fampanantenana hoe hisy ny fiainana mandrakizay. Natao batisa tamin’ny 2006

Nanambady an’i Nikolay tamin’ny 2021

Resadresaka nifanaovana taminy

Inona no nanampy anao hanana toe-tsaina tsara foana na dia miatrika zava-tsarotra aza?

Iezahako atao an-tsaina hoe tsy zavatra ratsy ny fitsapana, fa fomba hahafahako manatsara ny toetrako. Ao anaty hafanana mivaivay mantsy ny volamena no voadio. Ny zava-tsarotra atrehiko amin’izao no manampy ahy hanana ny toetra tian’i Jehovah sy ny toetra hanampy ahy amin’ny hoavy. Tiako koa ilay resahin’ny 1 Jaona 2:17 hoe: “Mandalo izao tontolo izao sy ny faniriany, fa izay manao ny sitrapon’Andriamanitra no maharitra mandrakizay.” Tsy maharitra daholo izay mitranga amin’izao. Manampy ahy tsy hilavo lefona ny fahafantarana an’izany.

Valentina Yermilova

Teraka: 1970 (Shimanovsk, Faritr’i Amour)

Mombamomba azy: Teknisianina tao amin’ny laboratoara iray

Nanambady an’i Sergey tamin’ny 1995. Manan-janakalahy iray ry zareo

Faly be rehefa nahafantatra hoe mbola hatsangana ny maty. Natao batisa tamin’ny 2009

Nomelohina higadra enin-taona sy telo volana i Sergey tamin’ny Desambra 2022, ary any am-ponja ry zareo amin’izao

Resadresaka nifanaovana taminy

Inona no nianaranao tamin’ilay fitsapana nahazo anao?

Hitako hoe nandray soa aho rehefa tsy nifantoka be tamin’ny zavatra nahazo ahy. Notadidiko hoe ny hanamasina ny anaran’i Jehovah no zava-dehibe indrindra. Olona maro no mieritreritra fa voninahitra be izany maty ho an’ny fireneny izany. Tsapako anefa hoe mahazo voninahitra be noho izany aho rehefa miaro ny anaran’i Jehovah. Te hanome ny tsara indrindra ho an’i Jehovah àry aho sady te hanome voninahitra azy. Fantatro hoe tsy handao ahy mihitsy izy.

Mankasitraka ny modely omen’ireo anabavy ireo isika. Miantehitra amin’i Jehovah mantsy ry zareo. Matoky isika fa hikarakara sy tena hitahy an-dry zareo foana izy.—Salamo 27:3.

Zava-nitranga

20 Jolay 2018

Nosavana ny tranony
22 Jolay 2021

Nampangaina ho mpanao heloka bevava izy efatra mirahavavy
27 Jolay 2021

Noferana ny toerana azon’i Kristina sy Mariya aleha
3 Aogositra 2021

Noferana ny toerana azon’i Yekaterina aleha
4 Aogositra 2021

Noferana ny toerana azon’i Valentina aleha
26 Mey 2023

Nanomboka ny fitsarana an-dry zareo

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO