23 MEY 2024
ROSIA

“Eo Foana i Jehovah Hanampy Ahy”

HANDEFA

Tsy ho ela ny Fitsaram-paritry ny Repoblikan’i Karatchaïévo-Tcherkessie dia hamoaka didim-pitsarana momba ny raharaha mahakasika ny Rahalahy Aleksey Pasynkov. Tsy mbola nilaza ny sazy tokony homena azy ny mpampanoa lalàna.

Ilay voampanga

Aleksey Pasynkov

Teraka: 1988 (tany Moscou, Faritr’i Moscou)

Mombamomba azy: Ny reniny irery no nitaiza azy. Manao ny pitsipitsiny farany amin’ny fanamboarana ny ao anaty trano sy mpikarakara fantson-drano no asany

Nanomboka nianatra Baiboly tamin’ny Vavolombelon’i Jehovah izy sy ny mamany tamin’izy folo taona. Nanohina ny fon’izy mianaka ny nahita hoe manaja tsara ny Baiboly sy mifankatia ny Vavolombelon’i Jehovah. Natao batisa tamin’ny 2000 ny maman’i Aleksey, dia izy indray tamin’ny 2002

Nanambady an’i Yuliya tamin’ny 2013. Manan-janaka lahy iray kilemaina ry zareo

Resadresaka nifanaovana taminy

Inona no andinin-teny manampy anareo mivady hiaritra amin’izao fotoan-tsarotra iainanareo izao?

Matetika aho no misaintsaina ny 1 Korintianina 10:13. Hoy izy ao hoe: “Tsy misy fakam-panahy mahazo anareo, afa-tsy izay mpahazo ny olona. Tsy mivadika amin’ny teniny anefa Andriamanitra, ka tsy hamela anareo halaim-panahy mihoatra noho izay zakanareo. Fa rehefa misy fakam-panahy dia hasiany lalan-kivoahana koa, mba hahazakanareo an’izany.” Niatrika olana be dia be izahay mivady nandritra ny taona vitsivitsy lasa. Vao teraka ilay zanakay lahy dia tsy salama saina. Valo taona izy izao, dia tsy maintsy karakaraina foana. Tratran’ny lozam-piarakodia koa ny ray aman-drenin’ny vadiko tamin’ny 2021. Maty tamin’ilay izy ny dadany, dia ny mamany indray lasa kilemaina. Dia avy eo indray izahay nanomboka nenjehina. Mampahatsiahy ahy io andininy io hoe tsy maintsy iharan’ny fitsapana hoatran’ireny nahazo anay ireny isika raha mbola miaina eto amin’ny tontolon’i Satana. Tsapanay im-be dia be koa anefa tamin’ireny hoe eo akaiky eo i Jehovah, dia manome anay hery hiaretana. Tsoriko aloha fa satriko hoe hivaha haingana araka izay azo atao daholo ireo olana rehetra ireo e! Fa matoky anefa aho hoe na dia mbola mitohy foana aza ny fitsapana mahazo ahy, dia eo foana i Jehovah hanampy ahy.

Faly isika mahalala hoe na dia miatrika fitsapana isan-karazany aza isika, dia afaka mialoka amin’i Jehovah sady hifaly aminy.—Salamo 5:11.

Zava-nitranga

23 Novambra 2021

Nisambotra azy tany amin’ny toeram-piasany ny manam-pahefana dia avy eo nisava ny tranony
8 Desambra 2022

Nampangaina ho mpanao heloka bevava
3 Martsa 2023

Nosavana fanindroany ny tranony. Natao famotorana i Aleksey sy Yuliya
31 Martsa 2023

Nosavana koa ny tranon’ny maman’i Aleksey sy ny rahalahiny
4 Oktobra 2023

Tsy navela nanao dia lavitra izy
14 Desambra 2023

Nanomboka ny fitsarana azy

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO