18 OKTOBRA 2022
ROSIA

“Ireharehako Mihitsy ny Mitondra ny Anaran’i Jehovah”

HANDEFA

Nomelohin’ny Fitsaram-paritr’i Kezhemskiy, any amin’ny Faritr’i Krasnoïarsk ny Rahalahy Ildar Urazbakhtin, tamin’ny 10 Oktobra 2022. Nomena sazy mihantona telo taona izy fa tsy migadra.

Zava-nitranga

20 Jolay 2021

Nosavana ny tranon’ny Vavolombelon’i Jehovah dimy fara fahakeliny, tany Kodinsk, anisan’izany ny an-dry Ildar mianakavy. Notazonina tsy maharitra tany amin’ny toby fitanana izy avy eo
21 Jolay 2021

Nafahana dia nambenana an-trano. Tsy navela nampiasa telefaonina sy Internet
20 Septambra 2021

Tsy nambenana an-trano intsony fa tsy nahazo nivoaka ny faritra nisy azy
13 Janoary 2022

Nampangaina hoe nanao vidéoconférence, dia sady “nampirisika ny rahalahy sy anabavy hianatra lalina ny Baiboly sy hifampahery”
30 Martsa 2022

Nanomboka ny fitsarana

Ilay voampanga

Ildar Urazbakhtin

Teraka: 1963 (tany Bratsk, Faritr’i Irkoutsk)

Mombamomba azy: Nianatra elektrisite. Mpiasam-panjakana mpanara-maso ny aro loza any amin’ny orinasa no asany

Nanambady an’i Gulnora tamin’ny 1987. Nivavaka tamin’Andriamanitra izy mba hahafantatra hoe inona no tena dikan’ny fiainany. Nihaona tamin’ny Vavolombelon’i Jehovah dia nianatra Baiboly. Natao batisa tamin’ny 1999. I Gulnora indray natao batisa tamin’ny 2006

Manan-janaka mianadahy ry zareo, dia manana zafikely telo vavy

Resadresaka nifanaovana taminy

Ahoana no nampaherezan’i Jehovah anao nandritra an’ilay ianao voatana tany?

Tsy hitako izay natao tamin-dry zareo nitazona ahy tany amin’ny toby, sady tsy haiko koa izay niandry an’ahy tany. Nampaherezin’i Jehovah tamin’ny fomba niavaka be anefa aho. Nitsikirika teo amin’ny varavaran-keliko ilay mpiambina iray izay sady hozy izy tamiko hoe: “Sao dia te hamakimaky boky ianao?” Dia hozy aho hoe: “Manana Baiboly angaha ianao?” Dia nitondrany Baiboly aho. Faly erỳ aho avy eo fa efa adiny firy aho teo foana, namaky ny tantara tiako indrindra ao amin’ny Baiboly. Dia avy eo indray, nisy mpiambina hafa nahita an’ahy hoe mpivavaka be, dia nanontany an’izao fanontaniana rehetra izao tamiko. Niresaka ela be mihitsy izahay. Izany mihitsy no nilaiko.

Ary inona no nanampy anao ho sahy foana?

Ilay Ohabolana 28:1 hoe: “Mandositra ny ratsy fanahy na dia tsy misy manenjika aza, fa feno toky hoatran’ny liona kosa ny olo-marina.” Resy lahatra aho hoe tsy nanao heloka bevava izany, dia sahy nijery ny mpanohitra tamin’ny masony satria tsy misy antony tokony hahamenatra ahy mihitsy. Ireharehako mihitsy ny mitondra ny anaran’i Jehovah! Natao hanatanjahana anay fotsiny ilay fanenjehana atỳ Rosia. Tsy maintsy mitana ny teniny mantsy i Jehovah ka hamita ny fampiofanana anay izy sady hanatanjaka anay.—1 Petera 5:10.

Hitantsika tamin’ny tantaran’i Ildar sy ny mpiara-manompo hafa any Rosia fa vonona hanampy antsika i Jehovah “amin’ny fotoan-tsarotra” sady tsy andriny izay hanaovana an’izany.—Salamo 46:1.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO