12 SEPTAMBRA 2023
ROSIA

“Manampy Foana i Jehovah”

HANDEFA

Nomelohin’ny Fitsaran’i Solikamsk any amin’ny Faritanin’i Perm ny Rahalahy Vladimir Poltoradnev, Aleksandr Sobyanin, ary Vladimir Timoshkin. Nasaina nandoa lamandy 638 000 roubles (29 862 800 Ariary eo ho eo), 494 000 roubles (23 122 000 Ariary eo ho eo), ary 512 000 roubles (23 966 800 Ariary eo ho eo) avy ry zareo. Mbola tsy naiditra am-ponja aloha izy ireo izao.

Ireo voampanga

Vladimir Poltoradnev

Teraka: 1962 (Krasnoshekovo, Faritr’i Orenbourg)

Mombamomba azy: Mpanamboatra masinina fanjairana simba no asany taloha

Lasa te hianatra Baiboly rehefa nahafantatra hoe tanteraka ny faminaniana. Natao batisa dia lasa Vavolombelon’i Jehovah tamin’ny 2001

Resadresaka nifanaovana taminy

Inona ny tantara ao amin’ny Baiboly nanampy anao hanatanjaka ny finoanao an’i Jehovah?

Nanampy ahy ny namaky sy nisaintsaina ny 1 Samoela toko 17. Sahy niady tamin’i Goliata i Davida satria tadidiny ny fomba efa nanampian’i Jehovah azy taloha. Hoy izy eo amin’ny andininy faha-37 hoe: “I Jehovah, ilay namonjy ahy teo an-tanan’ny liona sy ny orsa, no hamonjy ahy eo an-tanan’io Filistinina io.” Nampitahorin’ilay mpanao famotorana aho hoe hogadrainy folo taona, hono, aho, dia natahotra aho tamin’ny voalohany. Tadidiko anefa avy eo hoe efa im-be dia be i Jehovah no nanampy ahy. Nanomboka nieritreritra an’ireny fotoana ireny aho dia izay no nanatanjaka ny finoako azy. Tsy navelan’i Jehovah hiatrika zavatra tsy ho zakako mihitsy aho. Fantatro hoe voafehiny foana ny zava-drehetra.

Aleksandr Sobyanin

Teraka: 1973 (Krasnovishersk, Faritanin’i Perm)

Mombamomba azy: Mpanefy vy no asany. Lasa saina hoe fa maninona ny olona no maty, tamin’izy mbola tanora. Faly nahafantatra fa mampanantena ny Baiboly hoe hiaina mandrakizay ny olona. Natao batisa tamin’ny 1992

Nanambady an’i Mariya tamin’ny 2020

Resadresaka nifanaovana taminy

Inona no nanampy anao hatoky an’i Jehovah foana?

Misy fotoana aho misalasala, dia ilay tenin’i Jehovah tamin’i Jakoba ao amin’ny Genesisy 31:12 no ezahiko tadidina. Hoy i Jehovah taminy hoe: “Hitako daholo ... izay ataon’i Labana aminao.” Nanome toky an’i Jakoba i Jehovah hoe mijery Izy, dia eo foana hanampy sy hiaro azy. Fantatro hoe hoatr’izany koa no ataon’i Jehovah amiko. Tsy manary ahy mihitsy izy rehefa ilay mahatsapa iny aho hoe kely ny heriko. Manampy ahy hiaritra foana izy. Nianarako tamin’ny zava-tsarotra rehetra natrehiko hoe manampy foana i Jehovah.

Azontsika antoka fa ho tsapan’izay rehetra matoky an’i Jehovah foana hoe tena tia an-dry zareo izy sady tsy mivadika aminy.—Salamo 13:5, 6.

Zava-nitranga

28 Jolay 2020

Nosavana ny tranon-dry zareo. Nampidirina am-ponja vonjimaika izy telo mirahalahy
29 Jolay 2020

Nafahana i Vladimir Timoshkin dia lasa nambenana tao an-tranony
30 Jolay 2020

Nafahana i Aleksandr dia tsy navela hiala lavitra ny toerana misy azy
31 Jolay 2020

Nafahana i Vladimir Poltoradnev dia lasa nambenana tao an-tranony
24 Septambra 2020

Tsy nambenana tao an-tranony intsony i Vladimir Poltoradnev kanefa tsy navela hiala lavitra ny toerana misy azy
26 Oktobra 2020

Tsy nambenana tao an-tranony intsony i Vladimir Timoshkin kanefa tsy navela hiala lavitra ny toerana misy azy
16 Mey 2023

Nanomboka ny fitsarana iampangana an-dry zareo ho mpanao heloka bevava

a Tsy nisy resadresaka nifanaovana tamin’ny Rahalahy Vladimir Timoshkin.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO