25 JOLAY 2023
ROSIA

Manantanjaka ny Vavolombelona any Vladivostok ny Vavaka sy ny Toe-tsaina Tsara

HANDEFA

Tsy ho ela ny Fitsaram-paritr’i Pervorechensky any Vladivostok dia hamoaka didim-pitsarana momba ny raharaha mahakasika ny Ranabavy Nina Astvatsaturova, Yelena Barmakina, Ludviga Katanaeva, Yekaterina Treguba, ary Yelena Tsorn, sy mahakasika ny Rahalahy Igor Lonchakov sy Yuriy Redozubov. Tsy mbola nilaza ny sazy homena azy ireo ny mpampanoa lalàna.

Ireo voampanga

Yelena Barmakina

Teraka: 1967 (Tcherepanovo, Faritr’i Novossibirsk)

Mombamomba azy: Mpaka sary no asany

Ny mamany sy ny anadahiny no nianatra Baiboly tamin’ny Vavolombelon’i Jehovah voalohany. Natao batisa tamin’ny 2000

Nanambady an’i Dmitriy tamin’ny 2006. Voaheloka higadra valo taona i Dmitriy tamin’ny 2023

Resadresaka nifanaovana taminy

Inona no nampionona sy nanatanjaka anao?

Samy nosamborina izahay mivady rehefa avy nosavana ny tranonay, dia notazonina tany am-ponja i Dmitriy. Tena very aho tsy nisy ny vadiko, sady tsy hitako izay natao mba hanampiana azy. Sarotra be tamiko ny nivavaka tamin’ny voalohany satria mbola feno be ny foko. Tadidiko anefa hoe rehefa tototra aho sady tsy mahita tenenina rehefa mivavaka, dia afaka mamaky ny vavaka nataon’ny mpanompon’i Jehovah ao amin’ny Baiboly. Horaisin’i Jehovah hoatran’ny hoe avy amiko mantsy ireny vavaka ireny amin’izay. (Romanina 8:26) Nampahery be ahy izany rehefa tena mafy ny nahazo ahy.

Igor Lonchakov

Teraka: 1977 (Saratov, Faritr’i Saratov)

Mombamomba azy: Miasa ho an’ny paositra

Lasa Vavolombelon’i Jehovah ny mamany tamin’i Igor nianatra teny amin’ny oniversite. Lasa nianatra Baiboly rehefa nahita hoe falifaly ny mamany. Natao batisa tamin’ny 2008

Resadresaka nifanaovana taminy

Inona no andinin-teny tena nanampy anao?

Nisy vokany tamin’ny fahasalamako sy ny fihetseham-poko ilay fitsarana, sady niteraka olana ara-bola ho ahy. Lasa nanembona ny fiainako nilamina be taloha aho, vokatr’izany. Nivavaka tamin’i Jehovah momba ny zavatra tsapako aho. Dia avy eo aho nisaintsaina ny Mpitoriteny 7:10, hoe: “Aza miteny hoe: ‘Fa maninona re no tsara noho ny amin’izao ny taloha e?’ Tsy fahendrena ho anao mantsy ny manontany an’izany.” Nanampy ahy io andininy io mba hiato kely dia hisaintsaina ny fitahiana efa ananako, izany hoe ny mamako sy ny fofombadiko ary ny rahalahy sy anabavy ao amin’ny fiangonana. Tena manohana ahy daholo ry zareo. Ary ny tena zava-dehibe indrindra dia hoe eo foana i Jehovah hanampy ahy. Lasa misaotra an’i Jehovah amin’ireo fitahiana omeny ahy ireo foana aho izao rehefa mivavaka, fa tsy hoe mitantara ny olana atrehiko intsony fotsiny.

Yuriy Redozubov

Teraka: 1972 (Komsomolsk-sur-l’Amour, Faritanin’i Khabarovsk)

Mombamomba azy: Nianatra nanao hoso-doko tamin’ny mbola kely. Lasa mpampianatra zavakanto

Nanambady an’i Anastasiya tamin’ny 1998. Manan-janaka telo vavy izy mivady

Niara-namaky Baiboly izy mivady. Rehefa nihaona tamin’ny Vavolombelon’i Jehovah ry zareo dia faly be satria voavaly avy tao amin’ny Baiboly ny fanontaniany. Natao batisa tamin’ny 2003 i Anastasiya, dia i Yuriy tamin’ny 2004

Resadresaka nifanaovana taminy

Nahoana no hoe nanampy anao hiaritra ny vavaka?

Vao mainka nataoko voafaritra tsara ny vavaka nataoko rehefa nanomboka ilay fanenjehana. Tapa-kevitra koa aho hoe hivavaka foana na inona na inona mitranga. Anisan’ny zavatra nangatahiko tamin’i Jehovah ny hoe mba ho tony foana aho. Nanampy ahy sy ny fianakaviako tsy ho kivy be na hanahy be ireny vavaka ireny. Vao mainka aza aho nahatsapa hoe voninahitra ho ahy amin’izao zavatra iainako izao ny manompo an’i Jehovah. Mbola tsy akaiky an’i Jehovah hoatran’ny amin’izao mihitsy aho.

Yekaterina Treguba

Teraka: 1991 (Vladivostok, Faritanin’i Primorié)

Mombamomba azy: Mampianatra teny anglisy

Namakian’ny bebeny an’ilay hoe Ny Bokiko Misy Fitantarana avy ao Amin’ny Baiboly izy tamin’ny mbola kely. Nanomboka nianatra Baiboly tamin’izy 15 taona. Natao batisa tamin’ny 2008

Resadresaka nifanaovana taminy

Inona no lesona nianaranao avy amin’izao zavatra iainanao izao?

Anisan’ny zavatra sarotra indrindra tamiko ilay hoe falifaly foana na dia mafy aza ny mahazo ahy. Rehefa namaky momba ny anadahy sy rahavavy migadra aho dia tsikaritro hoe vao mainka faly ry zareo arakaraka ny nahamafy ny zavatra niainany. Tsy hitako mihitsy anefa izay tokony ho nahafaly ahy tamin’ny zavatra niainako. Nisaintsaina ny tonon’ilay hira faha-111 hoe “Maro ny Antony Mahafaly Antsika” aho, dia izay no tena nanampy ahy. Misy an’izao ao amin’ilay hira hoe: “Mankahery koa ny Baiboly isan’andro, isa-maraina; matanjaka indray ny finoana, ka faly ny fo sy ny saina.” Lasa hitako hoe tena nila nianatra Baiboly bebe kokoa aho, dia nila nivavaka imbetsaka kokoa mba ho falifaly. Izay mihitsy izao no ataoko amin’izao.

Yelena Tsorn

Teraka: 1972 (Vladivostok, Faritanin’i Primorié)

Mombamomba azy: Mpampianatra sy mpiandraikitra tao amin’ny toerana fikarakarana sy fanabeazana ankizy

Novalian’ny Vavolombelon’i Jehovah iray mpiara-monina taminy ny fanontaniany momba ny fijaliana sy ny fahafatesana. Natao batisa tamin’ny 2011

Resadresaka nifanaovana taminy

Inona no manampy anao tsy ho kivy be?

Rehefa mieritreritra an’izay taona vitsivitsy lasa izay aho dia lasa resy lahatra hoe voafehin’i Jehovah ny zava-drehetra. Fantany foana izay zavatra mitranga. Matetika aho no miezaka mitadidy an’ilay fampanantenan’i Jehovah ao amin’ny Isaia 54:17 hoe: “Tsy hisy hahomby izay fiadiana amboarina hamelezana anao . . . Izany no lovan’ny mpanompon’i Jehovah.” Mahatonga ahy hifantoka amin’ny hoavy io andininy io, sady mahatonga ahy hankasitraka foana ny fitiavana asehon’ny anadahy sy rahavavy amiko.

Tena mampionona antsika ny mahafantatra hoe mitahy sy mikarakara ny mpanompony tsy mivadika foana i Jehovah, ka ‘ataony manodidina azy toy ny ampinga lehibe ny fankasitrahany.’—Salamo 5:12.

Zava-nitranga

6 Aogositra 2019

Nampangaina hoe nanao heloka bevava i Yelena Barmakina
8 Jona 2020

Nosokafana ny raharaham-pitsarana iampangana an’i Nina sy Ludviga ary Yelena Tsorn ho mpanao heloka bevava
7 Jona 2020

Nosokafana ny raharaham-pitsarana iampangana an’i Yelena Barmakina ho mpanao heloka bevava
9 Jolay 2020

Nosavana ny tranon’i Nina, Ludviga, Yelena Tsorn, ary Yuriy. Nentina hatao famotorana i Yuriy. Tsy navela hanao dia lavitra kosa i Nina sy Ludviga ary Yelena Tsorn
4 Septambra 2020

Nampangaina hoe nanao heloka bevava i Igor
8 Septambra 2020

Nampangaina hoe nanao heloka bevava i Yekaterina
29 Septambra 2020

Naverina tany amin’ny mpampanoa lalàna ny raharaha mahakasika an’i Yelena Barmakina satria tsy ampy ny porofo hoe nanao zavatra mampidi-doza izy
11 Aogositra 2021

Voampanga ho mpanao heloka bevava i Yuriy. Naverina hatramin’ny voalohany ny raharaha mahakasika an’i Yelena Barmakina, dia natambatra ho lasa iray daholo ny raharaha mahakasika an-dry zareo
28 Septambra 2022

Nanomboka ny fitsarana

a b Tsy nisy ny resadresaka nifanaovana tamin’ny Ranabavy Astvatsaturova sy Katanaeva.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO