5 AOGOSITRA 2021
ROSIA

Mety Higadra Fanindiminy ny Rahalahy Dmitriy Terebilov, fa Izay vao hoe Noho ny Finoany

HANDEFA

VAOVAO FARANY | Nolavin’ny Fitsarana Rosianina ny Fampakarana Fitsarana Nataony

Nampakatra fitsarana ny Rahalahy Dmitriy Terebilov, nefa nolavin’ny Fitsaram-paritr’i Kostroma izany tamin’ny 12 Janoary 2022. Mbola migadra izy izao.

Zava-nitranga

6 Septambra 2021

Nomelohin’ny Fitsaram-paritr’i Sverdlovskiy any Kostroma higadra telo taona i Dmitriy. Tonga dia naiditra am-ponja izy taorian’ny nivoahan’ilay didim-pitsarana
8 Septambra 2020

Nanomboka ny fitsarana an’i Dmitriy
25 Mey 2020

Nomelohina tamin’ny fomba ofisialy i Dmitriy, ary noferana ny toerana azony aleha
19 Septambra 2019

Tsy nahazo naka ny volany tany amin’ny banky intsony i Dmitriy
13 Jona 2019

Nampangaina ho mpanao heloka bevava i Dmitriy satria hoe nizara boky sy gazety voarara sady nandray anjara tamin’ny fivorian’ny fikambanana voararan’ny fanjakana
25 Jolay 2018

Natao savahao ny tranon’i Dmitriy. Izy mivady tamin’io mbola teny an-dalana hody avy namonjy fivoriambe tany Moldavia. Vao tonga tao an-trano izy ireo dia nosamborin’ny polisy sy nalainy am-bavany

Ilay voampanga

Dmitriy Terebilov

Teraka: 1980 (Kostroma)

Mombamomba azy: Mbola kely dia efa kamboty reny. Tia nanao tolona sy ady totohondry, tamin’ny mbola kely. Inefatra nigadra satria voarohirohy tamin’ny resaka rongony

Nanomboka nianatra Baiboly an-taratasy tany am-ponja tamin’ny 2010. Nafahana tamin’ny 2013. Natao batisa tamin’ny 2014. Nanambady an’i Irina tamin’ny 2015. Tia miara-mandehandeha sy mianika tendrombohitra ary mitaingina bisikileta ry zareo

Resadresaka nifanaovana taminy

Ahoana no nifankahalalanao tamin’ny Vavolombelon’i Jehovah?

Tamin’izaho nigadra faninefany no nifankahalala tamin’ny Vavolombelon’i Jehovah. Resaka rongony moa no nahavoarohirohy ahy. Tamin’ny Aogositra 2010 aho no nahazo taratasy voalohany avy amin’ny rahalahy iray any Udmurtia. Nampahery ahy foana izy nandritra an’ireo taona nigadrako, dia nanoratra ho ahy sy nandefa boky sy gazety koa. Mbola mpinamana be izahay hatramin’izao.

Nafahana aho tamin’ny 21 Jona 2013 rehefa avy nanefa ny saziko. Nifindra teto Kostroma aho avy eo, dia nitady Vavolombelon’i Jehovah.

Inona no nanampy anao ho faly foana sy tsy hanahy be loatra?

“Manàna Herim-po”! no lohatenin’ilay fivoriamben’ny vondrom-paritra natrehintsika tamin’ny 2018. Vao avy namonjy an’iny fivoriambe iny izahay, dia niezaka nampihatra an’izay henonay tany. ... Tadidiko tamin’izahay nandeha nody [avy nalaina am-bavany taorian’ny fisavana ny tranonay fanindroany]. Nahita rahalahy sy anabavy be dia be izahay rehefa tonga. Nidodododo nankany aminay ry zareo raha vao naheno an’ilay fisavana. Tena hitanay mihitsy tamin’izay hoe tsy lavitra anay i Jehovah.

Mety higadra indray izany ianao, fa izay vao hoe noho ny finoanao. Ahoana no fihetseham-ponao?

Matoky tanteraka aho hoe hanohana ahy sy ny fianakaviako i Jehovah. Hitako mantsy hoe nanampy ahy foana izy hatramin’izay sady manohana an’ireo rahalahy sy anabavy gadraina noho ny finoany. Tapa-kevitra be mihitsy aho tamin’izaho nivoaka ny fonja hoe: ‘Izaho te ho lasa Vavolombelon’i Jehovah.’ Mbola tsy niova izany hatramin’izao.

Faly i Dmitriy satria “haratsiratsin’ny olona noho ny anaran’i Kristy.” Matoky àry isika hoe “manana ny fanahin’ny voninahitra, dia ny fanahin’Andriamanitra” izy.—1 Petera 4:14.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO