Mety amin’ny 14 Jolay 2020 ny Fitsarana any Furmanovsky, any amin’ny faritr’i Ivanovo, dia efa hamoaka didim-pitsarana amin’ilay raharaha mahakasika ny Rahalahy Yevgeniy Spirin. Mangataka ny hanagadrana azy fito taona ny mpampanoa lalàna.

Ampangaina ho niandraikitra ny asan’ny fikambanana iray “mampidi-doza” ny Rahalahy Spirin, izay 34 taona. Mpanao fanadihadiana iray ao amin’ny Sampan-draharahan’ny Fiarovam-pirenena (FSB) no nanomboka ny fiampangana azy, tamin’ny 21 Janoary 2019. Enina andro taorian’izay, dia nanao bemidina tao amin’ny tranon’ny Rahalahy Spirin sy Natalya vadiny ireo anisan’ny FSB. Nasain’ny Fitsaram-paritr’i Oktyabrsky notazonina am-ponja vonjimaika nandritra ny roa volana, fara fahakeliny, ny Rahalahy Spirin, satria fotsiny hoe Vavolombelon’i Jehovah izy. Nitarina avy eo ny fotoana nitazonana azy am-ponja.

Nafahana tao am-ponja izy tamin’ny 5 Jolay 2019, rehefa avy nigadra 160 andro. Nasaina nambenana tao an-tranony ihany anefa izy. Na dia tsy nanaiky aza ireo mpanao fanadihadiana, dia nandidy ny Fitsaram-paritr’i Oktyabrsky, tamin’ny 18 Desambra 2019, hoe tsy tokony hambenana ao an-tranony intsony ny Rahalahy Spirin. Tsy nisy sazy hafa nomena azy taorian’izay.

Mivavaka isika mba hanohana an’ireo rahalahy sy anabavintsika any Rosia foana i Jehovah, ilay Raintsika be fitiavana. Matoky isika fa tena hanampy azy ireo izy.—1 Petera 4:14.