3 AOGOSITRA 2021
ROSIA

Miantehitra Amin’ny Hery Omen’i Jehovah ny Rahalahy Andrey Okhrimchuk

HANDEFA

VAOVAO FARANY | Nolavin’ny fitsarana ambony ambaratonga fahefatra ny fitarainana nalefan’ny Rahalahy Andrey Okhrimchuk, tamin’ny 3 Febroary 2022. Mbola manan-kery àry ilay sazy mihantona efa-taona nomena azy tamin’ny voalohany. Mbola tsy nampidirina am-ponja aloha izy izao.

Zava-nitranga

22 Mey 2019

Vao maraina be dia nisy polisy nisaron-tava nanao savahao ny tranon-dry Andrey sy ny fiarany
29 Oktobra 2020

Nampangaina ho mpanao heloka bevava izy, satria hoe nandray anjara tamin’ny fivoriana ara-pivavahana tsy ara-dalàna sady nanohana ny zavatra ataon’ny fikambanana mampidi-doza
5 Aprily 2021

Nanomboka ny fitsarana azy
2 Aogositra 2021

Nomelohin’ny Fitsaram-paritr’i Leninskiy any Rostov-on-Don i Andrey. Sazy mihantona efa-taona no nomen’ny fitsarana azy
4 Oktobra 2021

Nolavin’ny Fitsaram-paritr’i Rostov ny fampakarana fitsarana nataon’i Andrey. Mbola manan-kery ny sazy nomena azy tamin’ny voalohany

Ilay voampanga

Andrey Okhrimchuk

Teraka: 1979 (Korosten, Ukraine)

Mombamomba azy: Nianatra ho injeniera amin’ny resaka mekanika. Miaramila talohan’izy lasa Vavolombelon’i Jehovah

Nanambady an’i Yekaterina tamin’ny 2006. Nahavariana azy mivady ny nahita hoe tanteraka daholo ny faminanian’ny Baiboly. Natao batisa izy ireo tamin’ny 2007. Manan-janaka vavitokana

Resadresaka nifanaovana taminy

Nahoana no nihatsara ny fifandraisanao tamin’i Jehovah tao anatin’ireny fitsapana ireny?

Tsy ho vitako ny niaritra an’ireny fitsapana ireny raha tsy teo ny fanampian’i Jehovah. Mbola tsy nivavaka im-be dia be hoatr’izany aho teo amin’ny fiainana. Noresahiko tamin’i Jehovah daholo izay nampanahy ahy. Nangataka koa aho mba homeny finoana sy herim-po bebe kokoa, amin’izay aho tsy hatahotra n’iza n’iza sady tsy hatahotra n’inona n’inona. Tsapako hoe nihaino ahy i Jehovah sady izy no mifehy ny zava-drehetra.

Inona no nandrisika anao tsy hivadika amin’i Jehovah nandritra an’ireny fitsapana ireny?

Tadidiko ilay voalazan’ny Jaona 6:67, 68. Nanontanian’i Jesosy ny apostoly hoe ry zareo koa ve mba te hiala, dia namaly i Petera hoe: ‘Hankany amin’iza moa izahay?’ Hoatr’izany koa no tsapako. Hankany amin’iza tokoa moa aho? Ny Tenin’i Jehovah ihany no hahazoana fiainana mandrakizay, sady izy ihany no afaka mampanjaka ny rariny indray. Tena nanampy ahy koa ny Isaia 30:15. Rehefa miatrika zavatra mahakivy aho sady tsisy n’inona n’inona azoko atao amin’ilay izy, dia io andinin-teny io no manampy ahy ho tony foana sy hatoky an’i Jehovah.

Inona no soso-kevitra tianao homena an’izay miomana hiatrika fanenjehana?

Aza miantehitra amin’ny herinao mihitsy. Angataho kosa i Jehovah hanome anao finoana sy fahasahiana ary herim-po bebe kokoa. Miezaha ho mpinamana be amin’ireo rahalahy sy anabavy, amin’izay dia hanana olona hizarana an’izay mampanahy anao ianao rehefa mafy ny mahazo anao.

Ohatra tsara ho antsika ireo rahalahy sy anabavy any Rosia satria tena manam-pinoana. Mino isika fa hahavita hiaritra ny fitsapana mahazo azy i Andrey sy ny fianakaviany. Miantehitra tanteraka amin’i Jehovah, ilay Raintsika any an-danitra, mantsy izy ireo.—Salamo 37:5.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO