20 SEPTAMBRA 2022
ROSIA

Misy Vokany Tsara ny Fiaretana

HANDEFA

Tsy ho ela ny Fitsaram-paritr’i Levoberezhniy, any Voronej, dia hamoaka didim-pitsarana momba ny Rahalahy Aleksey Antyukhin, Sergey Baev, Yuriy Galka, Valeriy Gurskiy, Igor Popov, Vitaliy Nerush, Stepan Pankratov, a Yevgeniy Sokolov, Mikhail Veselov, ary Anatoliy Yagupov. Tsy mbola nilaza ny sazy homena azy ireo ny mpampanoa lalàna.

Zava-nitranga

13 Jolay 2020

Tranona Vavolombelon’i Jehovah 100 mahery tany Voronej sy ny teo amin’ny faritra manodidina no nosavana. Rahalahy sy anabavy 40 mahery no nentina natao famotorana. Notanana am-ponja tsy maharitra ireo rahalahy 10 nolazaina tetsy ambony
14, 15 Jolay 2020

Notanana am-ponja vonjimaika ireo rahalahy 10 ireo
3 Aogositra–18 Septambra 2020

Navoaka tany am-ponja ny Rahalahy Baev, Pankratov, Popov, ary Yagupov, dia nambenana an-trano indray
1-3 Desambra 2020

Navoaka tany am-ponja ny Rahalahy Antyukhin, Galka, Gurskiy, Nerush, Sokolov, ary Veselov. Tsy nambenana an-trano intsony ny Rahalahy Baev, Pankratov, Popov ary Yagupov
13 Desambra 2021

Nanomboka notsaraina satria hoe nanao heloka bevava

Ireo voampanga

Aleksey Antyukhin

Teraka: 1976 (tany Shymkent, any Kazakhstan)

Mombamomba azy: Elektrisianina izy sady mpanao sodiora amin’ny gazy

Natao batisa tamin’ny 2013. Nanambady an’i Natalya tamin’ny 2014

Resadresaka nifanaovana taminy

Inona no manampy anao hanana toe-tsaina tsara foana mandritra an’izao fotoan-tsarotra izao?

Ezahiko tadidina foana hoe miady amin’i Satana sy ny tontolony daholo isika. Fantatry ny rahalahintsika maneran-tany ny olana hatrehin’ny sasany amintsika, fa ny an’ny hafa indray izy irery ihany no mahafantatra azy. Samy miatrika ny mafy daholo anefa isika. Tsy irery anefa isika, sady samy manana tombontsoa hanohana ny zon’i Jehovah hitondra. Rehefa mieritreritra an’izany aho dia lasa sahy sy be herim-po. Lasa manana hery hanohizana an’ilay ady koa aho.

Sergey Baev

Teraka: 1973 (tany Almaty, any Kazakhstan)

Mombamomba azy: Mpikojakoja lalana sy zaridainam-panjakana ao amin’ny tanànany no asany

Vita batisa tamin’ny 1994. Nanambady an’i Olga tamin’ny 2003. Manan-janaka vavitokana

Resadresaka nifanaovana taminy

Inona no nanampy anao ho falifaly foana na dia tany am-ponja aza?

Matetika aho no nivavaka tamin’i Jehovah ela be mihitsy. Nisaintsaina ny olana natrehin’ny mpiara-manompo koa aho. Izaho mihitsy koa no nahita hoe notanterahin’i Jehovah ny fampanantenany tao amin’ny Hebreo 13:5 hoe: “Tsy handao anao mihitsy aho, ary tsy hahafoy anao mihitsy.” Nihanarary aho tamin’ireny. Na dia niatrika zava-tsarotra be aza anefa aho, dia tsapako mihitsy hoe tony aho sady nilamin-tsaina nandritra an’ireny fotoana nigadrako ireny.

Yuriy Galka

Teraka: 1975 (tany Marhanets, any Ukraine)

Mombamomba azy: Mpametaka karô no asany. Vita batisa tamin’ny 1997. Nanambady an’i Nadezhda tamin’ny 2009. Manan-janaka vavitokana

Resadresaka nifanaovana taminy

Inona no nanampy anao hatoky an’i Jehovah foana?

Tsy mora tamiko ny natoky an’i Jehovah foana nandritra ny fotoana nigadrako. Hitako tamin’ireny fotoana ireny hoe tena zava-dehibe ilay zatra manao zavatra ara-panahy tsy tapaka. Tsy nahavita niaritra ela be hoatran’ireny aho raha tsy niezaka nanana toe-tsaina tsara foana. Vao manao tsirambina ny zavatra ara-panahy fanaoko aho, dia tonga dia manomboka misalasala. Mamaky Baiboly tsy tapaka aho dia mamaky ny taratasy nalefan’ny namako sy ny fianakaviako. Nahazo sakafo ara-panahy foana aho rehefa nanao an’ireo. Lasa vitako ny nifantoka tamin’ny hoe afaka ny ho mpandresy tanteraka sy tsy mivadika amin’i Jehovah aho.

Stepan Pankratov b

Teraka: 1995 (tany Voronej, any amin’ny Faritr’i Voronej)

Mombamomba azy: Mpametaka karô no asany. Vita batisa tamin’ny 2014

Resadresaka nifanaovana taminy

Inona no nahatonga anao ho tony nandritra an’ireny fotoana nampitebiteby be ireny?

Tonga saina aho hoe tokony hiantehitra kokoa amin’i Jehovah aho fa tsy amin’ny tenako. Nangataka taminy aho mba ho tony. Izany mantsy ny zavatra tsy vitako mihitsy taloha. Tamin’ny fotoana iray izay tena niatrika zava-tsarotra be aho tany am-ponja. Nangataka tamin’i Jehovah aho tamin’izay hoe mba omeo hery aho dia mba ampio. Namaky ny tantaran’ny Israelita teo amin’ny Ranomasina Mena aho avy eo. Efa imbetsaka aho no namaky an’io tantara io, fa tamin’izay fotoana izay vao tsapako hoe tena izay mihitsy no nilaiko. Lasa tony kokoa aho avy eo.

Igor Popov

Teraka: 1966 (tany Blagoveshchensk, any amin’ny Faritr’i Amour)

Mombamomba azy: Mpametaka platra amin’ny trano no asany, dia mpandoko sy mpikarakara fantson-drano

Nanambady an’i Lucyena tamin’ny 1988. Natao batisa tamin’ny 2001. Manan-janaka vavitokana ry zareo

Resadresaka nifanaovana taminy

Nahoana no nanampy anao ny fampaherezan’ny hafa?

Ireny zavatra niainako rehetra ireny no nahatonga ahy ho resy lahatra tanteraka hoe anisan’ny fianakavian’i Jehovah aho. Niezaka nitady fomba hihaonana tamiko foana ny mpiara-manompo dia niteny zavatra nampahery ahy, na dia mety nampidi-kizo an-dry zareo aza izany. Nampahery be ahy ny tenin-dry zareo hoe modely tsara ho azy ireo, hono, aho satria tsy mivadika, dia lasa vonona hanompo an’i Jehovah foana koa ry zareo. Nandrisika ahy haneho fitiavana amin’ny mpiara-manompo arak’izay azoko atao ireny.

Faly isika hoe misy vokany tsara ny fiaretan’ny mpiara-manompo amintsika any Rosia, satria miezaka miantehitra amin’i Jehovah foana izy ireo.—Jakoba 1:4.

a b Tsy nanana ny sarin’ny Rahalahy Pankratov izahay.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO