Nafahana avy any amin’ny fonja rosianina iray any amin’ny Tanànan’i Astrakhan ny Rahalahy Sergey Klimov, tamin’ny 26 Jolay 2023, rehefa avy nigadra nandritra ny dimy taona teo ho eo. Tamin’ny 3 Jona 2018 izy no nosamborina voalohany, dia notanana am-ponja vonjimaika izy mandra-piandry ny fitsarana azy. Voaheloka izy tamin’ny 5 Novambra 2019, dia nafindra tany amin’ny fonja hafa taoriana kelin’izay.

Tsy navela hihaona tamin’i Yuliya vadiny nandritra ny sivy volana i Sergey, tamin’izy nigadra. Tsy vitan’izay fa tsy tonga tany aminy mihitsy ny ankamaroan’ny taratasy nosoratana ho azy. Ratsy be koa ny fiainana tany am-pigadrana, dia lasa narary be i Sergey. Na dia teo aza anefa izany rehetra izany, dia falifaly foana i Sergey, satria izy nivavaka sy namaky Baiboly tsy tapaka.

Nampangain’ny manam-pahefana hoe manao zavatra mampidi-doza i Sergey, noho ny zavatra inoany. Be herim-po anefa i Sergey nandritra ny fitsarana azy, dia noporofoiny hoe diso ilay fiampangana azy. Nohazavainy koa hoe fa maninona izy no manampy ny olona hianatra Baiboly. Izao no nolazainy tamin’izay: ‘Andriamanitra be fitiavana sy tia rariny i Jehovah, ilay Andriamanitra ivavahako. Fitiavana no manosika ahy hanao zavatra sy hanampy olona, fa tsy fankahalana akory na hoe fitiavana te hampidi-doza ny hafa.’

Miara-paly amin’i Sergey sy Yuliya isika satria tafaraka indray ry zareo. Faly koa isika mahita hoe notahian’i Jehovah i Sergey satria tapa-kevitra ny tsy hivadika izy.​—Josoa 24:14.