4 JANOARY 2022
ROSIA

Niomana Mialoha ny Rahalahy Pyotr Krupnov sy Maya Vadiny Sady Be Fanantenana

HANDEFA

Zava-nitranga

30 Desambra 2021

Nomelohin’ny Fitsaram-paritr’i Nikolskiy any Penza ny Rahalahy Pyotr Krupnov sy Maya vadiny. Nomena sazy mihantona telo taona izy mivady. Tsy voatery mankany am-ponja ry zareo izao
25 Oktobra 2021

Nanomboka ny fitsarana azy
12 Oktobra 2021

Nampidirina ho anisan’ny mpampihorohoro sady mahery fihetsika i Pyotr sy Maya, satria nanazava boky ara-pivavahana tamin’ny namany
15 Septambra 2021

Nampangaina hoe mpanao heloka bevava i Maya. Nampangaina hoe mpandika lalàna koa i Pyotr, tatỳ aoriana
11 Oktobra 2020

Nanao savahao trano efatra ana fianakaviana Vavolombelon’i Jehovah tany Nikolsk ny manam-pahefana, anisan’izany ny tranon-dry Krupnov

Ilay voampanga

Pyotr Krupnov

Teraka: 1963

Mombamomba azy: Mpikarakara fantson-drano no asany. Nanomboka nianatra Baiboly tamin’ny Vavolombelon’i Jehovah tamin’ny 1996. Namaky ny boky sy gazetintsika izy sady nahita hoe tsara fitondran-tena be ilay mpampianatra Baiboly azy, dia izay no nandresy lahatra azy hoe nahita ny fahamarinana. Natao batisa tamin’ny 2002

Nihaona tamin’i Maya tany amin’ny fivorian’ny Vavolombelon’i Jehovah. Nivady ry zareo tamin’ny 2008

Resadresaka nifanaovana taminy

Azonao tantaraina ve hoe oviana, ohatra, i Jehovah no nanampy anao?

[Nisy fotoana aho] nangataka fanahy masina tamin’ny vavaka, dia nahatsiaro an’ilay voalaza ao amin’ny Jaona 10:28 hoe: “Tsy hisy handrombaka azy etỳ an-tanako.” Lasa natanja-tsaina be sady falifaly aho rehefa nisaintsaina an’io hevitra io. Tena tsapako mihitsy hoe teo akaikiko teo ilay Raiko. Tony kokoa izaho avy eo, sady natoky hoe hanampy ahy izy.

Inona no manampy anao hiaritra?

Iezahako atao an-tsaina foana hoe na mafy hoatran’ny inona aza ny zavatra atrehiko dia tsy misy dikany izany raha ampitahaina amin’ny [tombontsoa] hoe manompo an’i Jehovah sy ilay fiainana mandrakizay ao amin’ny paradisa. Tena tia be an’Andriamanitra sy ny mpiara-manompo amiko aho, dia izany no manome hery ahy hahafahako miatrika an’izao mahazo ahy izao.

Maya Krupnova

Teraka: 1957 (tany Atasu, any Kazakhstan)

Mombamomba azy: Mpanao mofomamy. Efa misotro ronono izy izao, dia tia manao zaridaina

Ny zanany vavy no nahalalany momba ny Vavolombelon’i Jehovah. Niara-natao batisa ry zareo tamin’ny 2001

Resadresaka nifanaovana taminy

Inona no nataonao hiomanana tamin’izao zavatra iaretanao izao?

Rehefa nanomboka nisy mpiara-manompo nosamborina [teny amin’ny faritra teny akaikinay] dia tamin’izay aho no nanomboka niomana. Namaky ny bokin’i Estera sy Jeremia aho. . . . Namaky ny tatitra nivoaka tao amin’ny tranonkalantsika koa aho, dia nianarako tsianjery ny hirantsika. Nanomana kitapo roa aho. Ny anankiray nasiako an’izay ilaiko raha sendra misy loza, dia ny iray kitapo hoentiko any am-ponja. . . . Nivavaka aho mba hahazo fahendrena sy herim-po, amin’izay tony sy mahavita miaritra rehefa hampijalina.

Ahoana no nanampian’ny mpiara-manompo anao?

Nampahery be ahy daholo ny olon-drehetra, indrindra tamin’ny fotoana tena nilako an’izany. Nisy fotoana aho kivy be, dia tamin’izay mihitsy ry zareo no nanome toky ahy hoe tia an’ahy. Ny sasany niantso dia ny sasany nanoratra. . . . Efa haiko foana hoe anisan’ny fianakaviambe anankiray be fitiavana aho, fa nanomboka tamin’ny 2020 vao tena tsapako izany.

Tena mampahery antsika ny modely nomen’i Pyotr sy Maya, satria nataon’izy ireo toy ny vatofantsika ny fanantenany dia nifikirany foana. (Hebreo 6:19) Niantehitra tamin’i Jehovah foana koa izy ireo.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO