22 MEY 2023
ROSIA

“Ny Tahotra Aloha Tsy Maintsy Misy, fa Afaka ny ho Be Herim-po Ianao”

HANDEFA

Namoaka didim-pitsarana momba ny Ranabavy Nataliya Voropaeva ny Fitsaram-paritr’i Zheleznodorozhny, any Krasnoïarsk, tamin’ny 24 Martsa 2023. Tsy maintsy mandoa onitra 360 000 roubles (21 384 330 ariary) izy.

Ilay voampanga

Nataliya Voropaeva

Teraka: 1971 (tany Krasnoïarsk)

Mombamomba azy: Mpanao volo

Niady saina izy hoe: ‘Raha tena misy Andriamanitra, dia nahoana no mijaly be daholo ny olona eran-tany?’ Ny Vavolombelon’i Jehovah no nahavaly ny fanontaniany, tao amin’ny Baiboly. Natao batisa izy tamin’ny 1996

Resadresaka nifanaovana taminy

Inona avy no nataon’ny rahalahy sy anabavy mba hampaherezana anao?

Izao no teny farany nolazain’ny Ranadahy Feliks Makhammadiyev tany amin’ny fitsarana: “Ny fiainana tsisy namana hoatran’ny hoe izao tontolo izao tsisy masoandro.” Tena marina io teniny io. Hoatran’ny hoe nitondra tara-masoandro sy hafanana ho ahy foana ny namako, sady tsy reraka mihitsy nanao an’izany. Nianjera, ohatra, aho, dia tapaka ny tongotro, nandritra an’ilay fotoana nanaovan’ny polisy famotopotorana momba ahy. Nodidiana ilay tongotro avy eo, dia tsy maintsy nasiana platra nandritra ny roa volana. Dia ny mpiara-manompo daholo tamin’izany no nampahery sy nikarakara ahy. Tena nanao izay vitany mihitsy ry zareo, ohatra hoe nitondra ahy tany amin’izay toerana nila nalehako, niantsena ho ahy, dia nikarakara ny sakafoko. Ranadahy sy rahavavy 100 mahery koa no tonga nanotrona ahy teny amin’ny fitsarana rehefa nivoaka ny didim-pitsarana momba ahy. Tena misaotra an’i Jehovah aho nanome ahy namana mahafinaritra be hoatr’ireny. Ry zareo no nampiasainy hanampy ahy. Hitako hoe hay tsy misy mahasakana an’i Jehovah mihitsy, rehefa te hampiseho amiko izy hoe tiany aho.

Inona no nianaranao avy tamin’iny zavatra nahazo anao iny?

Nianarako hoe ny tahotra aloha tsy maintsy misy, fa afaka ny ho be herim-po ianao. Voamariko mantsy hoe vao mainka mitombo ny herim-poko rehefa tsapako hoe tian’i Jehovah ny zavatra nataoko. Vao mainka koa aho mahita hoe manampy ahy izy arakaraka ny ifandraisako akaiky aminy sy amakiako ny Teniny isan’andro. Dia lasa matoky aho hoe tsy hanary ahy mihitsy izy.

“Ho be herim-po” hoatran’i Nataliya foana koa isika, ka hilaza hoe: “I Jehovah no mpanampy ahy, ka tsy hatahotra aho.”—Hebreo 13:6.

Zava-nitranga

Novambra 2017–Novambra 2020

Narahin’ny polisy maso, dia nosavana ny tranony. Nalaina am-bavany nandritra ny famotorana momba ny Rahalahy Andrey Stupnikov
5 Septambra 2022

Nanomboka ny famotopotorana momba azy
6 Septambra 2022

Tsy navela nanao dia lavitra
20 Oktobra 2022

Nampangaina hoe nanao heloka bevava
27 Febroary 2023

Nanomboka notsaraina
24 Martsa 2023

Nasaina nandoa onitra 360 000 roubles (21 384 330 ariary)

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO