24 SEPTAMBRA 2021
ROSIA

Raha Tsy Zatra Nanao Zavatra Ara-panahy ny Rahalahy Maksim Beltikov Tsy ho Nanana Hery Hiaretana

HANDEFA

VAOVAO FARANY | Nomelohin’ny Fitsarana Rosianina ny Rahalahy Maksim Beltikov

Nomelohin’ny Fitsaram-paritr’i Pavlovskiy, any amin’ny Faritanin’i Krasnodar ny Rahalahy Maksim Beltikov tamin’ny 17 Janoary 2022. Voaheloka higadra roa taona ilay rahalahy, ary tonga dia mihatra ilay sazy.

Zava-nitranga

29 Jona 2020

Nivoaka ny didy hoe tsy mahazo mivoaka an’ilay faritra izy
23 Jona 2020

Nampangaina ho mpanao heloka bevava izy. Izao ilay fiampangana: “Nandray anjara tamin’ny fampianarana fivavahana”, ka anisan’izany ny “nandaha-teny sy nihaino lahateny miorina amin’ny boky ara-pivavahana”
29 Aprily 2020

Nataon’ny manam-pahefana savahao ny tranon-dry Maksim. Natao famotorana izy avy eo

Ilay voampanga

Maksim Beltikov

Teraka: 1980 (tany Baltiysk, Faritr’i Kaliningrad)

Mombamomba azy: Tia mitendry kalon’ny fahiny, tamin’izy mbola kely. Mpanamboatra trano biriky no asany. Zanak’olo-mpiray tam-po taminy no nampianatra Baiboly azy voalohany. Gaga be izy rehefa nahafantatra hoe Jehovah no anaran’Andriamanitra. Tena nahagaga azy koa ny nahita hoe tanteraka ny faminanian’ny Baiboly ary azo ampiharina tsara ny torohevitra ao. Natao batisa izy tamin’ny 2001 dia lasa Vavolombelon’i Jehovah. Nanambady an’i Mariya tamin’ny 2005. Manan-janaka kely telo

Resadresaka nifanaovana taminy

Ahoana no nanampian’i Jehovah anao sy ny vady aman-janakao nandritra an’izao fitsapana izao?

Nanao zavatra be i Jehovah mba hifandray akaiky aminy foana izahay. Tsy izay ihany fa nomeny an’izay ilainay andavanandro koa izahay. Niezaka nahatakatra ny fihetseham-poko ny vady aman-janako, dia nataon-dry zareo izay hahatonga an’ahy tsy hieritreritra zavatra mahakivy. Nisy rahalahy iray izay nampahery ahy tamin’ny Salamo 23. Hozy ilay rahalahy hoe: “Aza misaraka amin’i Jehovah sy ny fandaminany mihitsy, fa avelao i Jehovah hikarakara anao.”

Nahoana no nanampy anao ho falifaly foana ny hoe zatra manao zavatra ara-panahy?

Namaky Baiboly tsy tapaka aho, dia nanatrika ny fivoriana rehetra. Izay no nanampy ahy ho falifaly sy hino hoe voafehin’i Jehovah ny zava-drehetra. Afaka nanatrika fivoriambe tany Séoul, any Korea Atsimo, izahay mivady tamin’ny 2018. Navantan’ilay mpandahateny tamin’izay miteny koreanina ny lahateniny, ny alahady, dia nasainy nitsangana izay efa nigadra noho ny finoany. Rahalahy an’arivony no nitsangana. Tadidiko ilay izy dia hozy aho hoe: ‘Ho vitako koa izany ny tsy hivadika satria ry zareo aza nahavita.’

Hitanao ve hoe vao mainka nifandray be tamin’i Jehovah ianao, noho izao zavatra atrehinao izao?

Tsy hoe vao mainka nifandray tamin’i Jehovah fotsiny aho, fa tena niova be mihitsy izany. Lasa manao vavaka voafaritra kokoa aho izao. Tsy hoe ny zavatra angatahiko no voafaritra kokoa, fa ny zavatra isaorako azy. Niova koa ny fomba famakiako Baiboly. Izay tantaran’olona mitovitovy amin’ny zavatra iainako no vakiko.

Enga anie mba hiorina mafy sy hatanjaka tsara foana ny rahalahy sy anabavintsika any Rosia. Zatra manao zavatra ara-panahy foana mantsy izy ireo, dia ny mpiara-manompo koa tena tia sy miahy azy ireo. Fantatsika fa hanohana azy ireo foana “ilay Andriamanitry ny fitiavana sy ny fiadanana.”—2 Korintianina 13:11.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO