29 NOVAMBRA 2023
ROSIA

Rahalahy Dimy Nomelohin’ny Fitsarana Rosianina any Amin’ny Faritr’i Saratov

HANDEFA

Tamin’ny 23 Novambra 2023 ny Fitsaram-paritr’i Balakovskiy any amin’ny faritr’i Saratov no namoaka didy momba ny Rahalahy Aleksey Bogatov, Yevgeniy Fomashin, Vladimir Mavrin, Andrey Murych, ary Sergey Tyurin. Samy voaheloka izy dimy mirahalahy. Sazy mihantona enin-taona avy no azon’i Aleksey sy Vladimir. Nampandoavina lamandy mitentina 300 000 roubles (3 362 dolara amerikanina) avy kosa i Andrey sy Sergey ary Yevgeniy. Mbola tsy misy migadra aloha ireo rahalahy ireo amin’izao.

Ireo voampanga

Aleksey Bogatov

Teraka: 1960 (Baklushi, Faritanin’i Oulianovsk)

Mombamomba azy: Mpamily fiara mpitondra marary no asany taloha

Nanambady an’i Lyubov tamin’ny 1982. Manan-janaka telo mirahalahy

Rehefa niara-nianatra Baiboly tamin’ny Vavolombelon’i Jehovah izy dia lasa takany ny zavatra hataon’ny Fanjakan’Andriamanitra mba hampanjakana ny rariny. Natao batisa tamin’ny 1994

Resadresaka nifanaovana taminy

Ahoana no nanampian’i Jehovah anao tamin’ianao notanana am-ponja vonjimaika?

Tsy nanana Baiboly nandritra ny iray volana aho tamin’izaho vao nigadra, fa nanana kahie sy stylo izay aho. Nivavaka tamin’i Jehovah isan’andro aho tamin’izay mba hanampy ahy hitadidy andinin-teny. Andinin-teny 112 no tadidiko mandra-pahatapitry ny iray volana. Hitako avy tamin’iny hoe rehefa mamaky Baiboly tsy tapaka sy misaintsaina aho dia mampiasa ny fanahiny masina i Jehovah mba hanampy ahy hitadidy. Tena misaotra an’i Jehovah aho nanampy ahy.

Yevgeniy Fomashin

Teraka: 1977 (Balakovo)

Mombamomba azy: Elektrisianina no asany taloha

Nahaliana azy ny fampanantenan’ny Baiboly hoe hilamina sy hiray saina ny olona eto an-tany. Natao batisa tamin’ny 2013. Nianatra tenin’ny tanana mba hanampiana an’ireo marenina ao amin’ny faritan-dry zareo

Resadresaka nifanaovana taminy

Nahoana no manampy anao ny modelin’ireo rahalahy nigadra taloha?

Tamin’izaho tany am-ponja dia nieritreritra momba ny Rahalahy Konstantin Bazhenov, Aleksey Budenchuk, Gennadiy German, Roman Gridasov, Feliks Makhammadiyev, ary Aleksey Miretskiy aho, satria tato amin’ity toerana ity koa ry zareo no nigadra tamin’ny 2018 sy 2019. Nanam-pinoana sy tsy nivadika ry zareo, dia nampahery ahy ny ohatra nomeny. Mbola mampahery ahy koa ny rahalahy sy anabavy maneran-tany, satria ry zareo tsy mivadika mihitsy na dia miatrika zava-tsarotra samihafa aza. Hoatran’ny hoe miaraka eo isika rehetra, dia miara-miatrika an’ireny fitsapana ireny.

Vladimir Mavrin

Teraka: 1962 (Kamyshovka, Faritr’i Saratov)

Mombamomba azy: Mpanao trano sy mpamita ny pitsipitsiny farany amin’ny ao anaty trano no asany

Natao batisa tamin’ny 1994

Maty ny vadiny voalohany tamin’ny 2004, dia lasa nitaiza irery ny zanany lahy tanora izy. Nanambady an’i Irina tamin’ny 2013

Resadresaka nifanaovana taminy

Inona no nianaranao momba an’i Jehovah nandritra an’ireny fitsapana nahazo anao ireny?

Efa haiko ilay fampanantenan’i Jehovah ao amin’ny Hebreo 13:5 hoe: “Tsy handao anao mihitsy aho, ary tsy hahafoy anao mihitsy.” Tsapako anefa hoe tena niavaka ny fomba nikarakaran’i Jehovah ahy rehefa nosamborina sy notanana am-ponja aho. Nampiany aho mba ho tony sy hilamin-tsaina, dia nomeny hery be dia be. Hitako koa hoe mahita ny fomba tsara indrindra hamaliana ny vavaka ataoko foana i Jehovah. Tsy nahatsapa ho irery mihitsy aho nandritra an’ireny fotoan-tsarotra ireny.

Andrey Murych

Teraka: 1991 (Balakovo)

Mombamomba azy: Miasa amin’ny resaka vy

Ny bebeny no nampianatra Baiboly azy voalohany. Nahavariana azy ny fahatanterahan’ny faminaniana ao amin’ny Baiboly. Natao batisa tamin’ny 2007

Nanambady an’i Anastasiya tamin’ny 2009. Manan-janaka vavy iray ry zareo

Resadresaka nifanaovana taminy

Inona no nanampy anao hiatrika ny zava-tsarotra tany am-ponja?

Ny mafy indrindra tamiko tamin’izaho notanana am-ponja vonjimaika dia ilay hoe ho faly foana, indrindra fa nandritra ny roa volana voalohany nijanonako tany. Anisan’ny nanampy ahy ny nisaintsaina hoe inona no azoko atao mba hampisehoana amin’i Jehovah hoe mankasitraka an’izay rehetra efa nataony ho ahy aho. Rehefa tsy mivadika aho sady faly foana, dia izay no fomba tsara indrindra hampisehoako hoe mankasitraka azy aho. Ankoatra an’izay, dia lasa resy lahatra kokoa aho izao hoe hahavita hiatrika an’izay rehetra mitranga rehefa hampian’i Jehovah. Azon’i Jehovah ampiana hilamin-tsaina foana aho, na inona na inona zavatra atrehiko.

Sergey Tyurin

Teraka: 1994 (Balakovo)

Mombamomba azy: Elektrisianina no asany taloha

Ny bebeny no nampianatra Baiboly azy voalohany. Resy lahatra hoe ilaina ny mampihatra ny torolalan’ny Baiboly raha te ho sambatra. Natao batisa tamin’ny 2012

Nanambady an’i Yelizaveta tamin’ny 2018

Resadresaka nifanaovana taminy

Inona no lesona nianaranao avy amin’ilay ianao nenjehina noho ny finoanao?

Zavatra telo no nianarako. Ny voalohany hoe eo foana i Jehovah hanohana ahy. Hitany hoe inona no zavatra tena hilaiko, dia fantany hoe rahoviana no fotoana mety indrindra hanomezana an’ilay izy. Ny faharoa indray hoe tena mila matoky ny fampanantenan’i Jehovah aho raha te hilamin-tsaina foana. Tsy mora ilay hoe enjehina, fa vetivety ihany anefa izay raha oharina amin’ny fitahiana mandrakizay miandry antsika. Tsy ho tadidiko intsony akory ireny zava-tsarotra niainako ireny, rehefa kelikely. Dia ny fahatelo hoe tena sarobidy be ilay isika miray saina hoatran’ny fianakaviana iray, dia tena tokony harovana. Lasa mora kokoa amintsika mantsy ny miatrika olana amin’ilay isika miray saina.

Mampahatsiahy antsika ny ohatr’ireo rahalahy dimy manam-pinoana ireo hoe ho vitantsika ny hiaritra fahoriana noho ny vaovao tsara rehefa miantehitra amin’ny herin’Andriamanitra isika.—2 Timoty 1:8.

Zava-nitranga

11 Febroary 2022

Nampangaina ho mpanao heloka bevava
23 Martsa 2022

Nanao bemidina tany amin’ny tranon’ireo rahalahy dimy ny polisin’ny FSB. Samy natao famotorana dia avy eo notanana am-ponja vonjimaika
25 Martsa 2022

Nafindra fonja ireo rahalahy, dia any no miandry ny fitsarana azy
23 Janoary 2023

Nafahana avy tany am-ponja ary tsy navela hivoaka ny faritra misy azy
21 Jolay 2023

Nanomboka ny fitsarana
23 Novambra 2023

Voaheloka

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO