10 AOGOSITRA 2023
ROSIA

Tapa-kevitra ny ho Faly Foana na dia Enjehina Aza

HANDEFA

Tsy ho ela ny Fitsaran’i Syktyvkar any amin’ny République des Komis dia hamoaka didim-pitsarana momba ny raharaha mahakasika ny Rahalahy Aleksandr Ketov, Andrey Kharlamov, Aleksandr Kruglyakov, Ranabavy Lidiya Nekrasova, ary Rahalahy Sergey Ushakhin. Tsy mbola nilaza ny sazy homena azy ireo ny mpampanoa lalàna.

Ireo voampanga

Andrey Kharlamov

Teraka: 1971 (Syktyvkar)

Mombamomba azy: Injeniera momba ny fanafanana trano

Nanambady an’i Larisa tamin’ny 1990

Nisy mpiara-miasa niresaka taminy momba ny Baiboly. Hitany hoe mahasoa azy ny mampihatra ny torolalan’ny Baiboly. Natao batisa i Andrey sy Larisa tamin’ny 1994

Resadresaka nifanaovana taminy

Inona no manampy anao hiaritra foana?

Manana fahafahana ho lasa akaiky kokoa an’i Jehovah aho isaky miatrika fitsapana. Tamin’izaho nampangaina hoe nanao heloka bevava, dia imbetsaka aho no nahatsapa hoe tsy hahavita hiaritra intsony. Rehefa nandeha anefa ny fotoana dia hitako hoe nampian’i Jehovah tamin’ny fomba miavaka be aho. Nampiasa olona, ohatra, izy mba hilaza teny mampahery ahy. Resy lahatra aho hoe miaraka amiko foana i Jehovah, dia trotroiny aho. Mampahatsiahy ahy ny zavatra resahin’ny Jakoba 5:11 izany, ilay hoe: “Ekentsika hoe sambatra izay efa niaritra. Efa henonareo fa niaritra i Joba, ary efa fantatrareo fa nitahy azy i Jehovah. Hitanareo àry fa tena be fitiavana i Jehovah sady mamindra fo.” Tsapako tamin’ireny zavatra niainako ireny mihitsy ny fitiavan’i Jehovah. Vao mainka aho izao te hampiseho hoe tia azy sady tsy te hivadika aminy mihitsy.

Aleksandr Kruglyakov

Teraka: 1979 (Ukhta, République des Komis)

Mombamomba azy: Mpanera tany sy trano no asany

Nanomboka namaky Baiboly tamin’izy tanora. Tsy nisotro toaka be sy nandray zava-mahadomelina intsony rehefa nianatra Baiboly tamin’ny Vavolombelon’i Jehovah. Natao batisa tamin’ny 2000

Nanambady an’i Tatyana tamin’ny 2005

Resadresaka nifanaovana taminy

Inona no mahatonga anao mbola mitory foana na dia enjehina aza?

Efa naminany i Jesosy ao amin’ny Lioka 21:12, 13 hoe henjehina sy hogadraina ary hatolotra any amin’ny manam-pahefana ny mpanara-dia azy. Niteny koa anefa izy hoe: “Ho afaka hitory aminy ianareo amin’izay.” Nisy fotoana aho nieritreritra hoe ahoana moa raha indray andro any aho migadra dia tonga saina eo hoe nisy fotoana aho mba afaka nitory tamin’ny olona nefa tsy nanao. Tsy maintsy hoe menatra be aho amin’izay. Izay no mahatonga ahy hanao tanjona hoe hitory amin’ny manam-pahefana betsaka araka izay azoko atao. Matetika aho no mampitovy ny asan-dry zareo amin’ny asantsika. Samy te hanatsara ny fiaraha-monina na isika na ry zareo. Ry zareo izao, ohatra, managadra ny mpanao ratsy, dia amin’izay tsy mampidi-doza ny hafa intsony ireny olona ireny. Fa ny olana anefa dia hoe miverina manao ratsy indray ireny olona ireny rehefa mivoaka avy any am-pigadrana. Isika indray manampy ny olona amin’ny alalan’ny Baiboly mba hahatonga an-dry zareo hanao fiovana be eo amin’ny fiainany dia ho lasa olona tia fihavanana.

Lidiya Nekrasova

Teraka: 1953 (Kuratovo, République des Komis)

Mombamomba azy: Mpampianatra sy mpitaiza olona marary no asany taloha. Manan-janaka telo lahy

Nanomboka nianatra Baiboly tamin’ny 1993. Nampionona azy ny nahafantatra ny toetran’Andriamanitra, anisan’izany ny hoe tia rariny. Natao batisa tamin’ny 1997

Resadresaka nifanaovana taminy

Inona no manampy anao hiaritra sy ho falifaly?

Tena fanomezana tsara be avy amin’Andriamanitra ny anadahy sy rahavaviko! Tena hitako izao hoe mila an-dry zareo aho, dia ry zareo koa mila ahy. Nanampy sy nanohana ahy ry zareo, dia izay no nanampy ahy tsy ho kivy be. Tena tiako i Jehovah, dia izaho koa te hanohana an’izay rehetra migadra. Ireo foana no ifantohako, dia lasa vonona ny tsy hivadika amin’i Jehovah mihitsy aho. Tsapako koa hoe manampy ahy ny fanahin’i Jehovah, dia vao mainka aho faly hoe anisan’ny mpanompony.

Sergey Ushakhin

Teraka: 1961 (Pinyug, Faritr’i Kirov)

Mombamomba azy: Miasa ao amin’ny orinasa iray mpanamboatra taratasy

Nanambady an’i Nataliya tamin’ny 1987. Manan-janaka mianadahy ry zareo

Ny mamany no nianatra Baiboly voalohany. Resy lahatra hoe nahita ny fahamarinana rehefa voavaly avy tao amin’ny Baiboly ny fanontaniany. Natao batisa tamin’ny 1999. I Nataliya indray tamin’ny 2005 no natao batisa

Resadresaka nifanaovana taminy

Inona no nanampy anao tsy hieritreritra zavatra mahakivy?

Ara-dalàna raha lasa malemilemy ny vatanao rehefa kivy ianao. Lasa mieritreritra zavatra mahakivy foana koa ianao. Mba tsy ho tratran’izany dia mivavaka foana aho, sady mamaky Baiboly sy miaraka amin’ny rahalahy sy anabavy. Mivavaka manokana mihitsy aho mba hampian’i Jehovah hampahery ny hafa, indrindra fa ireny rahalahy sy anabavintsika be taona ireny. Ampiako ry zareo mba hifantoka amin’ny zavatra tsara rehetra misy eo amin’ny fiainana. Miezaka koa aho mba hilaza teny mampahery an-dry zareo. Rehefa mahavita manao an’izany aho dia lasa faly be. Tombontsoa be ny ahy hoe ampiasain’i Jehovah mba hampahery ny hafa hoatr’izany.

Asehon’ireo fitantarana rehetra ireo fa ataon’i Jehovah “matanjaka be” ny rahalahy sy anabavintsika miatrika fitsapana, dia omeny hery mba hahavita tsy hivadika.—Isaia 40:29.

Zava-nitranga

2 Martsa 2021

Tranona fianakaviana Vavolombelon’i Jehovah 14, fara fahakeliny, no nosavana tany Syktyvkar. Nampidirina am-ponja vonjimaika i Aleksandr Ketov sy Andrey Kharlamov ary Aleksandr Kruglyakov. I Lydia Nekrasova sy Sergey Ushakhin indray tsy navela hiala lavitra ny toerana misy azy
3 Martsa 2021

Nafahana i Aleksandr Ketov sy Andrey Kharlamov, dia tsy navela hivoaka ny tranony. Notanana am-ponja kosa i Aleksandr Kruglyakov mandra-piandry ny fitsarana azy
27 Aprily 2021

Tsy nambenana tao an-tranony intsony i Andrey Kharlamov
28 Aprily 2021

Tsy nambenana tao an-tranony intsony i Aleksandr Ketov, ary nafahana avy tany am-ponja i Aleksandr Kruglyakov
19 Aprily 2022

Nanomboka ny fitsarana
9 Jona 2022

Nilaza ny mpitsara fa tsy ampy ny porofo hoe nanao zavatra mampidi-doza ireo voampanga, dia naveriny tany amin’ny mpampanoa lalàna ilay raharaha
14 Febroary 2023

Nitohy indray ny fitsarana, miaraka amin’ny mpitsara vaovao

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO