28 NOVAMBRA 2022
ROSIA

Tony Satria Matoky An’i Jehovah

HANDEFA

Tsy ho ela dia hamoaka didim-pitsarana momba ny Rahalahy Oleg Konshin, Sergey Malyanov ary Roman Zhivolupov a sy ny Ranabavy Svetlana Malyanova, zanaky ny Rahalahy Sergey, ny Fitsaram-paritr’i Leninskiy any Nizhny Novgorod. Tsy mbola nofaritan’ny mpampanoa lalàna ny sazy tiany homena an-dry zareo.

Ireo voampanga

Oleg Konshin

Teraka: 1971 (Luga, Faritr’i Leningrad)

Mombamomba azy: Mpanamboatra fiara simba. Nanambady an’i Irina tamin’ny 1991. Manan-janaka lahy roa ry zareo

Ny mamany no nianatra Baiboly voalohany. Nampiaiky azy ny fiovana nataon’io mamany io, dia lasa te hianatra izy. Natao batisa tamin’ny 2003

Resadresaka nifanaovana taminy

Inona no nianaranao rehefa niatrika fanenjehana ianao?

Hitako hoe mampatahotra kokoa ny fanenjehana rehefa mbola tsy niatrika an’ilay izy ianao. Fa rehefa tratra amin’izay ianao, dia tonga dia tsapanao hoe ampian’i Jehovah ianao ho tony sy hisaina tsara, dia omeny hery. Dia rehefa nampian’i Jehovah aho, dia vao mainka be herim-po sady nahafantatra an’izay tokony hoteneniko sy hataoko. Lasa haiko tsara koa hoe inona avy ny zavatra tsy tokony hampanahy be ahy.

Sergey Malyanov

Teraka: 1969 (Nizhny Novgorod, Faritr’i Nizhny Novgorod)

Mombamomba azy: Niofana tamin’ny fikorisana ambony ranomandry hatramin’izy tanora. Lasa matihanina tamin’izany, dia nitety an’i Rosia sy nandeha tany an-tany hafa niaraka tamin’ny Cirque de Moscou. Manan-janaka vavy antsoina hoe Svetlana, anisan’ny voampanga amin’ity raharaha ity koa

Nisy mpiara-miasa taminy nianatra Baiboly dia nampahafantatra azy tamin’ny Vavolombelon’i Jehovah. Nanatrika fivoriana tany amin’ny toerana samihafa, tamin’izy nitety tany niaraka tamin’ny mpanao cirque. Nanohina ny fony ny nahita hoe nifankatia sy niray saina ny Vavolombelon’i Jehovah. Natao batisa tamin’ny 1998

Resadresaka nifanaovana taminy

Ahoana no nifampaherezanao sy ny zanakao vavy nandritra an’iny fotoan-tsarotra iny?

Nampitahorin-dry zareo izahay mianaka tamin’ny natao famotorana, dia noteneniny hoe inona daholo no hahazo anay raha vao tsy manao an’izay asainy hatao sy tsy manao sonia hoe manaiky ho meloka. Nisy fotoana aza izahay nataon-dry zareo nifanena tao amin’ny lalantsaran’ilay birao fanaovana famotorana mihitsy. Nieritreritra angamba ry zareo hoe rehefa mahita an’ilay zanako aho dia hanaiky lembenana, satria hanahy be hoe inona no hahazo azy raha tsy manao an’izay asain-dry zareo hatao aho. Tsy izay mihitsy anefa no nitranga. Vao mainka aza izahay afaka nifampahery sy nifanome toky hoe hampian’i Jehovah, tamin’izahay ilay nifanena vetivety iny. Hitako tamin’iny fotoana iny hoe tena be herim-po ilay zanako sady tapa-kevitra ny tsy hivadika, dia vao mainka aho tapa-kevitra ny hanao hoatr’azy koa. Nazava tsara tamiko hoe na inona na inona hataon-dry zareo anay, dia tsy hanao sonia na inona na inona izany aho.

Svetlana Malyanova

Teraka: 1996 (Nizhny Novgorod)

Mombamomba azy: Tia tononkalo sady tia mamaky boky sy mihira. Mampianatra teny anglisy sy frantsay

Nampianarin’i Sergey dadany momba an’i Jehovah tamin’izy mbola kely. Natao batisa tamin’ny 2016, tamin’izy 20 taona

Resadresaka nifanaovana taminy

Nahoana no nampahery olon-kafa ny zavatra niainanao?

Efa aretiko mihitsy ilay hoe manahy be, dia rehefa nanomboka voasambotra ny mpiara-manompo, dia lasa saina aho hoe ho vitako ve raha izaho no tratra hoatran-dry zareo. Fa avy eo nihatra tamiko amin’izay ilay izy. Vao niditra tao an-tranonay ny polisy dia tonga aho dia nivavaka. Fantatro mantsy hoe i Jehovah ihany no azoko nianteherana tamin’iny fotoana iny. Na tamin’izaho nohadihadina aza dia tena nanampy ahy izy. Nandrera-tsaina be ilay fanadihadiana nefa dia gaga aho fa vitako ny niatrika an’ilay izy. Miteny mihitsy ny mpiara-manompo indraindray hoe: “I Svetlana aza nahavita niaritra, dia izaho koa izany hahavita!”

Roman Zhivolupov b

Teraka: 1997 (Norilsk, Faritanin’i Krasnoyarsk)

Mombamomba azy: Nianatra ho injeniera momba ny elektrisite. Tompon’andraikitra amin’ny trano fivarotana no asany izao

Ny mamany no nampianatra azy ny fahamarinana. Natao batisa tamin’ny 2015. Nanao fanompoana sivily tany amin’ny hopitaly ho solon’ny fanompoana ao amin’ny tafika

Resadresaka nifanaovana taminy

Inona no andinin-teny tena nanampy anao tamin’iny zava-tsarotra iny?

Vao mainka lasa tiako be ny andinin-teny manome toky hoe tia ahy i Jehovah. Manome toky ahy, ohatra, ny Salamo 27:10 hoe “na mahafoy ahy aza ny raiko sy ny reniko” dia “i Jehovah kosa handray ahy.” Lasa tsy misalasala mihitsy aho hoe hanampy ahy foana i Jehovah na inona na inona mitranga eo amin’ny fiainako, raha mbola manao ny tsara aho.

Hita amin’ny tantaran’ireo rahalahy sy anabavintsika tsy mivadika ireo fa tena lasa ‘manana herim-po’ sy ‘matanjaka’ tokoa izay ‘manantena an’i Jehovah.’—Salamo 27:14.

Zava-nitranga

7 Febroary 2019

Navelan’ny mpitsara iray hanara-maso ny antso ataon’i Sergey amin’ny telefaonina sy fitaovana hafa ny polisy
16-17 Jolay 2019

Nosavain’ny polisy ny tranon’ny fianakaviana Vavolombelon’i Jehovah 31 any Nizhny Novgorod sy any amin’ny Faritr’i Nizhny Novgorod. Nosamborina i Oleg sy Sergey ary Svetlana ary notanana am-ponja vonjimaika. Nampangaina ho mpanao heloka bevava izy ireo
18 Jolay 2019

Nafahana i Oleg sy Sergey ary Svetlana. Tsy navela hivoaka ny tranony ireo rahalahy roa ireo tamin’ny fotoana sasany, ary tsy nahazo nifampiresaka na nampiasa Internet
24 Aogositra 2021

Voaheloka hoe nandray anjara tamin’ny asa ataon’ny fikambanana iray mampidi-doza i Roman ary tsy navela hanao dia lavitra
3 Martsa 2022

Nanomboka ny fitsarana

a b Tsy nisy sarin’ny Rahalahy Roman Zhivolupov azo nalaina tamin’ity lahatsoratra ity navoaka.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO