20 FEBROARY 2023
ROSIA

“Tsisy na Inona na Inona Atahorako Mihitsy Rehefa Mbola Eo Akaikiko Eo i Jehovah”

HANDEFA

Nomen’ny fitsarana any Gorno-Altayskiy, any amin’ny Repoblikan’i Altaï, sazy mihantona enin-taona sy tapany ny Rahalahy Aleksandr Kalistratov, tamin’ny 17 Febroary 2023. Tsy voatery migadra izy aloha hatreto.

Ilay voampanga

Aleksandr Kalistratov

Teraka: 1976 (Biysk, any amin’ny faritr’i Altaï)

Mombamomba azy: Maty ny dadan’i Aleksandr tamin’izy telo taona. Psikology mandinika momba ny sain’ny ankizy no asan’i Aleksandr taloha

Nino ny evolisiona. Ny reniny aloha no niara-nianatra Baiboly tamin’ny Vavolombelon’i Jehovah. Tian’i Aleksandr ny fanazavan’ny Baiboly momba ny namoronan’Andriamanitra an’izao rehetra izao, satria hitany hoe mazava tsara

Natao batisa tamin’ny 1994. Nanambady an’i Yuliya tamin’ny 2020

Efa nomelohina indroa hoe mpanao heloka talohan’izao nanamelohana azy izao. Tamin’ny taona 2000 ny voalohany satria tsy nety nanao miaramila izy tamin’izay, dia tamin’ny 2010 ny faharoa satria nampangaina hoe olona mampidi-doza

Resadresaka nifanaovana taminy

Inona avy no nianaranao tamin’ilay ianao notanana am-ponja vonjimaika?

Nogadraina 21 andro aho tamin’izaho nampangaina voalohany hoe mpanao heloka bevava. Tsy navela hifandray tamin’iza na iza aho tamin’izay, dia tsy maintsy nianatra niantehitra tamin’i Jehovah aho satria izy irery izany no azoko nianteherana. Hitako tamin’izay hoe tsisy na inona na inona atahorako mihitsy rehefa mbola eo akaikiko eo i Jehovah. Rehefa misy zavatra mitady hampitebiteby be ahy amin’izao, dia iezahako tadidina izay efa nataon’i Jehovah mba hanampiana ahy taloha. Dia lasa tena resy lahatra aho hoe efa eo am-pelatanan’i Jehovah ny zava-drehetra.

Inona ny andinin-teny nampahery anareo mivady?

Nampahery anay mivady foana ny 2 Samoela toko 22. Izao no resahin’ny andininy 3: “Ilay Andriamanitro no vatolampiko. Ao aminy aho no mialoka, Izy no ampingako . . . , fialofana azoko antoka sy toerana fandosirako, ary mpamonjy ahy.” Miara-mamaky an’io izahay roa alohan’ny handehanana any amin’ny fitsarana. Mampahatsiahy anay ilay izy hoe i Jehovah no manome hery anay.

Matoky isika fa mbola hohenoin’i Jehovah foana izay mpanompony miantso vonjy aminy rehefa ao anatin’ny sarotra.—2 Samoela 22:7.

Zava-nitranga

2000

Nosamborina satria tsy nety nanao miaramila. Notanana am-ponja vonjimaika nandritra ny 21 andro. Afaka madiodio avy eo
2010

Nampangaina hoe olona mampidi-doza. Nodinihin’ny fitsarana indroa aloha ilay raharaha, dia nalefa tany amin’ny Fitsarana Tampony any amin’ny Repoblikan’i Altaï avy eo. Afaka madiodio koa i Aleksandr tamin’izay
16 Desambra 2021

Nanomboka ny famotopotorana momba azy
16 Janoary 2022

Nisava tranona Vavolombelon’i Jehovah dimy tany amin’ny Repoblikan’i Altaï ny polisy avy ao amin’ny Sampan-draharahan’ny Fiarovam-pirenena (FSB). Niditra an-keriny tao an-tranon-dry Aleksandr ry zareo, dia nentin-dry zareo hofotopotorana izy. Nalefa nody izy ny harivan’iny fa tsy navela nanao dia lavitra
25 Aogositra 2022

Nanomboka ny fitsarana azy

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO