6 DESAMBRA 2023
ROSIA

“Tsy Misy Fitsapana Mahavita Manimba ny Tena Finoana”

HANDEFA

Tsy ho ela dia hamoaka didy momba ny raharaha mahakasika ny Rahalahy Aleksandr Tsikunov ny Fitsaram-paritr’i Kaltanskiy any amin’ny faritanin’i Kemerovo. Mbola tsy nilaza ny sazy homena azy ny mpampanoa lalàna.

Ilay voampanga

Aleksandr Tsikunov

Teraka: 1967 (Kaltan)

Mombamomba azy: Injeniera no asany taloha

Nanambady an’i Yelena tamin’ny 1989

Tsy nino an’Andriamanitra izy taloha. Mpiara-miasa taminy Vavolombelon’i Jehovah no nanampy azy hahafantatra momba ny Baiboly. Namaky ny Baiboly iray manontolo tao anatin’ny enim-bolana i Aleksandr vao nanaiky hianatra. Natao batisa tamin’ny 1997. Noresahiny tamin’ny mamany, sy ny zokiny vavy, ary ny vadiny izay nianarany, dia lasa vavolombelon’i Jehovah koa ry zareo

Resadresaka nifanaovana taminy

Inona ny tantara ao amin’ny Baiboly tena manampy anao ao anatin’izao fotoan-tsarotra izao?

Tena nampahery be ahy ny ohatr’i Daniela mpaminany. Resahina ao amin’ny Daniela 6:4, 5, hoe: “Tamin’izany fotoana izany, dia nitady antony hiampangana an’i Daniela momba ny raharaham-panjakana ny manam-pahefana ambony sy ny lehibem-paritany. Tsy nahita zavatra azo iampangana azy anefa izy ireo, sady tsy afaka niampanga azy ho nanao ny tsy marina, satria mendri-pitokisana izy. Tsy mba nanao kitoatoa mihitsy koa izy sady nanao ny marina foana. Dia hoy ireo lehilahy ireo: ‘Tsy hahita zavatra hiampangana an’io Daniela io mihitsy isika, raha tsy hoe zavatra mifandray amin’ny lalàn’ny Andriamaniny angaha.’” Tsy nahita antony marim-pototra hanendrikendrehana an’i Daniela ry zareo, dia ny tsy fivadihany sy ny fivavahany amin’Andriamanitra no nampiasainy mba hiampangana azy. Nanara-maso azy ry zareo, dia niandry kendry tohina hanatratrarana azy. Mbola nanohy nivavaka tamin’i Jehovah hoatran’ny efa fanaony hatramin’izay anefa izy. Tena marina tokoa ilay hoe tsy misy fitsapana mahavita manimba ny tena finoana, ary manaporofo an’izany ny tantaran’i Daniela sy ny mpanompon’i Jehovah be dia be hafa. Io ohatra io no nandrisika ahy mba ho be atao foana amin’ny fanompoako an’i Jehovah.

Tena faly isika manana an’ireny mpiara-manompo tsy mivadika be dia be ireny. Ohatra tsara ho antsika ry zareo sady mampahatsiahy antsika hoe tsy hisy ho diso fanantenana izay mino an’i Jehovah sy Jesosy Kristy Zanany.—Romanina 10:11.

Zava-nitranga

27 Aprily 2021

Nampangaina ho mpanao heloka bevava
2 Mey 2021

Nosavana ny tranony. Nosamborina izy avy eo dia notanana am-ponja vonjimaika
4 Mey 2021

Nafahana avy tany am-ponja ary nambenana tao an-tranony
24 Jona 2021

Tsy nambenana tao an-trano intsony saingy tsy nahazo nivoaka ny faritra nisy azy
25 Jolay 2023

Nanomboka ny fitsarana azy

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO