Nohamafisin’ny fitsarana any Kamtchatka, tamin’ny 19 Janoary 2021, hoe meloka ny Rahalahy Sergey Ledenyov rehefa nampakatra ny raharaha tany amin’io fitsarana ambony io. Hampiharina amin’izay àry ilay didim-pitsarana voalohany hoe homena sazy mihantona roa taona izy. Tsy mila mankany am-ponja aloha izy amin’izao.

Navela hiteny teo anatrehan’ny fitsarana i Sergey talohan’ny nivoahan’ny didim-pitsarana tao amin’ilay fitsarana ambony. Be herim-po izy rehefa niaro ny finoany sy nilaza hoe tapa-kevitra ny hanompo an’i Jehovah foana. Hoy izy: “Miorina amin’ny Baiboly ny zavatra inoako fa tsy amin’ny lalàna apetraky ny fikambanana iray. Milaza, ohatra, ny Baiboly hoe ‘nisy nanao ny trano rehetra, fa ilay nanao ny zava-drehetra kosa dia Andriamanitra’ ary ‘Jehovah no anarany.’ (Hebreo 3:4; Eksodosy 15:3) Na homelohina [ho mpanao heloka bevava] aza aho dia tsy ho voafafa ao amin’ny Baiboly mihitsy izany sady tsy ho voafafa ato am-poko koa.”