Nomelohin’ny Fitsaram-paritr’i Leninskiy any Smolensk ny Ranabavy Tatyana Galkevich sy Valentina Vladimirova tamin’ny 14 Febroary 2024. Nomena sazy mihantona roa taona avy izy mirahavavy. Mbola tsy voatery migadra aloha ry zareo izao.

1. 14 Mey 2019

   Nampangain’ny manam-pahefana hoe mpanao heloka bevava i Tatyana sy Valentina. Nataon’ny polisy savahao ny tranon’izy mirahavavy, dia nosamboriny izy ireo. Nataony famotorana adiny 48 mahery izy ireo avy eo. Efa samy manana aretina mitaiza izy mirahavavy nefa mbola notanana am-ponja vonjimaika ihany

2. 22 Novambra 2019

   Nafahana i Tatyana sy Valentina rehefa afaka enim-bolana, dia nambenana tao an-tranony

3. 31 Desambra 2019

   Nampidirina hopitaly i Valentina fa niharatsy ny fahasalamany

4. 6 Aogositra 2020

   Tsy nambenana tao an-tranony intsony i Tatyana rehefa afaka valo volana teo ho eo, saingy tsy navela niala tao an-tanànany. I Valentina indray mbola nambenana tao an-tranony, dia ny havany akaiky anankiray sy ny mpisolovavany ihany no azony iresahana

5. 2 Oktobra 2020

   Taratasy 400 pejy no nisy ny fiampangana an’i Tatyana sy Valentina. Voalaza tao fa miray tsikombakomba “manafina ny ataon’ny fikambanana iray mampidi-doza”, hono, ry zareo

6. 14 Oktobra 2020

   Naverin’ny mpitsara hodinihin’ny mpampanoa lalàna ilay raharaha taorian’ny fitsarana voalohany, satria nisy porofo tsy azo ampiasaina eny amin’ny fitsarana tao amin’ilay izy. Efa tsy nahavita nijoro intsony i Valentina nandritra an’ilay fitsarana voalohany noho ny aretina nahazo azy, nefa mbola tsy nanova ny fanapahan-keviny ihany ilay fitsarana fa mbola hoe nambenana tao an-tranony izy

7. 25 Febroary 2021

   Nofoanan’ny fitsarana ambony indray ilay fanapahan-kevitra hoe averina any amin’ny mpampanoa lalàna ilay raharaha, fa ampakarina fitsarana ihany

Mivavaka isika mba ho toy ny ‘hery sy ampinga’ foana i Jehovah ho an’i Valentina sy Tatyana, ary ho an’ny rahalahy sy anabavintsika rehetra enjehina any Rosia sy Crimée.​—Salamo 28:7.