27 DESAMBRA 2022 | VAOVAO FARANY: 27 MARTSA 2023
ROSIA

VAOVAO FARANY: ASAINA MANDOA LAMANDY | “Hampahery Antsika i Jehovah Rehefa Miatrika Fitsapana Isika”

HANDEFA

Nomelohin’ny Fitsaram-paritr’i Apatity, any amin’ny Faritanin’i Mourmansk, ny Rahalahy Denis Merkulov tamin’ny 23 Martsa 2023. Nasaina nandoa lamandy 500 000 rouble (27 tapitrisa ariary eo ho eo) izy.

Ilay voampanga

Denis Merkulov

Teraka: 1976 (Kirovsk, Faritanin’i Mourmansk)

Mombamomba azy: Mpanao sodira sy elektrisianina

Nampiady sainy azy ny nieritreritra hoe tsy maintsy ho faty ny olona. Faly be anefa izy rehefa nianatra Baiboly tamin’ny Vavolombelon’i Jehovah dia nianatra hoe inona no fikasan’Andriamanitra momba ny olombelona. Natao batisa tamin’ny 1995. Nanambady an’i Nataliya tamin’ny 1998

Resadresaka nifanaovana taminy

Inona no lasa fantatrao momba ny tenanao rehefa nenjehina ianao?

Tsy hoe rehefa miatrika fitsapana akory isika dia tonga dia lasa tsara toetra ho azy. Izaho izao matoa mahavita miaritra dia satria miantehitra amin’i Jehovah aho isan’andro. Mieritreritra foana aho hoe: ‘Tena matoky an’i Jehovah ve aho amin’izay fanapahan-kevitra raisiko isan’andro sy rehefa mifidy ny tanjona hotratrariko? Hoatran’ny ahoana ny fotoana atokako hamakiana Baiboly sy hanomanana fivoriana ary hitoriana ny vaovao tsara?’ Tsy ho tony sy tsy hahavita hiaritra ianao raha tsy mifandray tsara amin’i Jehovah sy manana finoana matanjaka, rehefa sendra olana hoatr’izao ka miova tanteraka ny fiainanao.

Inona ny andinin-teny hitanao hoe tena manampy anao?

Niresadresaka momba ny Isaia 41:10 izahay mivady ny alina talohan’ny hisamborana ahy. Izao no lazain’ilay andininy: “Aza matahotra fa manohana anao aho. Aza manahy fa izaho no Andriamanitrao. Hanatanjaka anao aho ka hanampy anao. Hitazona anao mafy amin’ny tanako ankavanana aho, dia ny tanako manao ny rariny.” Ny ampitson’iny ihany aho dia notanana am-ponja vonjimaika, dia naverimberiko foana io andinin-teny io. Isaky ny nahavita nilaza fehezanteny iray aho, dia nisaintsaina ny teny tsirairay tamin’ilay izy sady nivavaka. Lasa hoatran’ny hoe i Jehovah mihitsy no nilaza an’ireo teny ireo tamiko tamin’izay. Dia tonga saina aho hoe tsy hoe satria isika matanjaka dia avelan’i Jehovah hiharam-pitsapana, fa hoe hampahery antsika i Jehovah rehefa miatrika fitsapana isika.

Mampahery antsika ny mahalala hoe na inona na inona fitsapana iaretantsika, dia ‘hanampy antsika ho mafy orina’ i Jehovah sady “hanatanjaka” antsika, raha mifandray tsara aminy isika sady matoky azy.—1 Petera 5:10.

Zava-nitranga

21 Jolay 2021

Tranona Vavolombelon’i Jehovah 14 no nataon’ny polisy savahao tao Apatity sy teny amin’ny manodidina. Niditra an-keriny tao amin’ny tranon-dry Merkulov ny polisin’ny FSB ary nentin-dry zareo natao famotorana izy mivady. Nafahana ry zareo ny ampitson’iny tamin’ny efatra maraina
22 Jolay 2021

Nasain’ny manam-pahefana niverina tany amin’ny biraon’ny mpanao famotorana i Denis, dia notanana am-ponja vonjimaika izy avy eo
23 Jolay 2021

Nafahana ary nanomboka nambenana tao an-tranony
17 Septambra 2021

Nafahana ary tsy navela hanao dia lavitra
15 Jolay 2022

Nomelohina tamin’ny fomba ofisialy hoe nandamina asan’ny fikambanana mampidi-doza, satria “nihira” sy “nivavaka tamin’i Jehovah Andriamanitra”
20 Septambra 2022

Nanomboka ny fitsarana azy

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO