19 MARTSA 2024 | VAOVAO FARANY: 5 NOVAMBRA 2024
ROSIA

VAOVAO FARANY: DIDIM-PITSARANA NOFOANANA | ‘I Jehovah no Mampionona Ahy’

HANDEFA

Nofoanan’ny Fitsarana Ambony Ambaratonga Fahasivy, ao Vladivostok, ny sazin’ny Rahalahy Sergey Chechulin sy ny Ranabavy Yelena Chechulina, vadiny, tamin’ny 30 Oktobra 2024. Naverina hotsarain’ilay fitsarana niandraikitra an’ilay izy tamin’ny voalohany ilay raharaha.

Nomelohin’ny Fitsarana any Petropavlovsk-Kamtchatski, Faritanin’i Kamchatka, ny Rahalahy Sergey Chechulin sy ny Ranabavy Yelena Chechulina, vadiny, tamin’ny 22 Aprily 2024. Samy nomena sazy mihantona roa taona izy mivady. Mbola tsy naiditra am-ponja aloha ry zareo izao.

Ireo voampanga

Sergey Chechulin

Teraka: 1968 (tany Tymlat, Faritanin’i Kamtchatka)

Mombamomba azy: Lehibe tao amin’ny trano fitaizana zaza kamboty. Mpanamboatra ny simba tao amin’ny orinasa iray mpamokatra hafanana

Nasain’ny namany iray vao nanomboka nianatra Baiboly hanatrika fivorian’ny Vavolombelon’i Jehovah. Hitan’i Sergey hoe mitombina tsara ny valin’ny fanontaniany. Natao batisa tamin’ny 1995

Nanambady an’i Yelena tamin’ny 2000. Manan-janakalahy iray ry zareo

Resadresaka nifanaovana taminy

Misy andinin-teny tena nampahery anareo mivady ve?

Tsy navela hanao dia lavitra izahay. Nalain’ny manam-pahefana koa ny fiaranay, ary tsy nahazo naka ny volanay tany amin’ny banky izahay. Vao mainka anefa izao lasa azonay ilay resahin’ny Salamo 55:22 hoe: “Apetraho amin’i Jehovah izay manavesatra anao, fa hanohana anao izy. Tsy havelany hianjera mihitsy ny olo-marina.” Nampanantena i Jehovah fa hanatanjaka antsika foana. Na teo aza ny zavatra niainanay, dia tsy kivy izahay noho ny fanampiany. Lasa nianatra niantehitra bebe kokoa tamin’i Jehovah sy ireo rahalahy izahay. Vao mainka koa izahay tapa-kevitra ny hanompo an’i Jehovah foana araka izay vitanay.

Yelena Chechulina

Teraka: 1978 (tany Petropavlovsk-Kamtchatski)

Mombamomba azy: Mpitsabo mpanampy no asany

Nanomboka nianatra Baiboly tamin’ny Vavolombelon’i Jehovah ny maman’i Yelena. Nangataka hianatra Baiboly koa i Yelena satria nahatsapa hoe mila mahafantatra an’Andriamanitra. Natao batisa tamin’ny 2000

Nanambady an’i Sergey tamin’ny 2000

Resadresaka nifanaovana taminy

Inona no nianaranao momba an’i Jehovah tamin’ilay fitsapana nahazo anao?

Tsapako hoe lasa mahatakatra kokoa ny Baiboly aho rehefa misy zavatra miova eo amin’ny fiainako. Lasa azoko kokoa, ohatra, ilay nosoratan’i Paoly ao amin’ny Romanina 8:38, 39 rehefa miatrika an’izao fanenjehana mahazo ahy izao aho. Hoy izy: “Fa matoky aho fa na fahafatesana, na fiainana, na anjely, na fanjakana, na zavatra amin’izao fotoana izao, na zavatra ho avy, na hery, na ny ambony, na ny ambany, na zavaboary hafa, dia tsy hisy hahavita hampisaraka antsika amin’Andriamanitra ka hahatonga azy tsy ho tia antsika intsony. Asehony amin’ny alalan’i Kristy Jesosy Tompontsika izany fitiavany izany.” Rehefa te hanome toky ahy i Jehovah hoe tiany aho, dia tsy misy mahasakana azy amin’izany. Miavaka ny fomba ampisehoany an’ilay izy, dia lasa tsy misalasala aho hoe Izy no mampionona ahy. Asehon’i Jehovah foana hoe tiany ny mpanompony. Haiko hoe hanampy ahy hiatrika fitsapana amin’ny hoavy ny zavatra mahazo ahy amin’izao.

Hoatran’i Sergey sy Yelena koa isika, ka sarobidy amintsika ny Tenin’Andriamanitra. Fanomezana tonga lafatra mantsy izy io, satria manatanjaka antsika sady manome ny fahendrena ilaintsika. (Salamo 19:7) Tsy hivadika mihitsy isika amin’izay na dia miatrika fitsapana aza.

Zava-nitranga

25 Septambra 2022

Nampangaina ho mpanao heloka bevava
17 Oktobra 2022

Nosavana ny tranony
6 Septambra 2023

Tsy nahazo nanao dia lavitra i Sergey
7 Septambra 2023

Tsy nahazo nanao dia lavitra i Yelena
26 Desambra 2023

Nanomboka notsaraina

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO