29 MARTSA 2023 | VAOVAO FARANY: 18 Aprily 2023
ROSIA

VAOVAO FARANY: GADRAINA IREO RAHALAHY | Ampian’i Jehovah ny Rahalahintsika Migadra

HANDEFA

Nomelohin’ny Fitsaram-paritr’i Akhtoubinski any amin’ny Faritanin’i Astrakhan higadra fito taona ny Rahalahy Rinat Kiramov sy Sergey Korolev ary Sergey Kosyanenko, tamin’ny 17 Aprily 2023. Efa hatramin’ny Novambra 2021 izy telo lahy ireo no notanana am-ponja vonjimaika, ary mbola any izy ireo.

Ireo voampanga

Rinat Kiramov

Teraka: 1987 (Moscou, Faritanin’i Moscou)

Mombamomba azy: Nianatra mba ho lasa mpikirakira tranonkala ao amin’ny Internet talohan’ny nisamborana azy. Manan-talenta amin’ny mozika. Nanao fanompoana sivily ary faktera ny asany tamin’izany

Ny mamany no nahafantarany ny fahamarinana. Tena nahavariana azy ny nahita ny Vavolombelon’i Jehovah mifankatia sy miray saina. Natao batisa tamin’ny 2001

Nanambady an’i Galina tamin’ny 2009

Resadresaka nifanaovana tamin’i Galina vadin’i Rinat a

Inona no manampy an’i Rinat hiaritra amin’izao izy migadra izao?

Nataon’i Rinat tanjona ny hoe hivavaka ho an’ny rahalahy sy anabavy tsirairay migadra, dia hanonona ny anaran-dry zareo mihitsy. Omeko azy isam-bolana ny lisitr’izay rehetra migadra noho ny finoany maneran-tany. Mandany fotoana mihitsy izy mba hivavahana ho an’ny tsirairay amin-dry zareo. Mahatonga azy ho akaiky kokoa an’i Jehovah izany sady manampy azy tsy hifantoka be loatra amin’ny zavatra mahazo azy. Ankoatra an’izay, dia mifampahatsiahy foana koa izahay mivady hoe fa maninona izahay no mila miaritra. Miaritra izahay satria fitoriana vita ho azy amin’ny olona ny fiaretanay sady izay no ampisehoanay hoe manohana ny zon’i Jehovah hitondra izahay. Nanoratra an’izao i Rinat indray mandeha tao anaty taratasiny: “Na hoatran’ny hoe matanjaka be aza ny fahavalontsika, dia tsy maintsy handresy isika satria ampian’ny Raintsika. Ilay hoe mandresy anefa tsy voatery hidika hoe tsy migadra. Tsy mivadika hatramin’ny farany, izay ny hoe mandresy amintsika.”

Tsapanao ve hoe nanampy anao i Jehovah?

Nisy zavatra nosoratan’i Rinat izay tena hitako hoe marina. Hoy izy: “Mbola tsy afaka mikarakara anao aloha aho izao, dia i Jehovah mihitsy no hikarakara anao.” Dia tena tsapako mihitsy hoe efa hatramin’ny voalohany no nanampy be ahy ny fanahin’i Jehovah. Mampanantena ny Salamo 91:1 hoe: “Izay mipetraka ao amin’ny toerana miafin’ny Avo Indrindra, dia honina ao ambany alok’Ilay Mahery Indrindra.” Efa henoko foana io hoe ‘toerana miafina’ io taloha, fa izao vao tena hitako hoe miaro i Jehovah. Lasa matoky be azy aho, dia izay no manampy ahy hiaritra sady ho falifaly foana.

Sergey Korolev

Teraka: 1973 (Penza, Faritanin’i Penza)

Mombamomba azy: Tia maka sary sy manamboatra fanaka

Tsy tia fivavahana mihitsy taloha, nefa niova rehefa nahafantatra ny Vavolombelon’i Jehovah sy nianatra momba ny Mpamorona. Natao batisa tamin’ny 1996

Nanambady an’i Yekaterina tamin’ny 2005

Resadresaka nifanaovana taminy

Nahoana no mahatonga anao hifandray akaiky kokoa amin’i Jehovah izao zavatra mahazo anao izao?

Tsy mora ny tsy hieritreritra zavatra mahakivy rehefa migadra. Tena tsy maintsy miezaka be aho fa raha tsy izany dia tsy hahavita hiaritra, sady tsy hanana finoana sy fanantenana intsony, dia tsy hahavita haneho fitiavana intsony koa. Ny vavaka no tena manampy ahy. Manam-potoana be mihitsy aho ato mba hivavahana mafy amin’i Jehovah. Tamin’izao izaho migadra izao angamba aho no nivavaka tamin’ny fo imbetsaka indrindra teo amin’ny fiainako! Izao vao azoko ilay hoe nandritra ny alina tontolo i Jesosy no nivavaka tamin’ny Rainy. Nampianatra ahy izao izaho migadra izao hoe mila miantehitra tanteraka amin’i Jehovah aho. Izay angamba no soa lehibe indrindra azoko avy amin’ilay izy.

Sergey Kosyanenko

Teraka: 1961 (Ielan, Faritanin’i Volgograd)

Mombamomba azy: Mpampianatra fanatanjahan-tena

Nanambady an’i Olga tamin’ny 1983. Lasa liana tamin’ny fahamarinana rehefa nahita hoe marina ny tantara sy ny faminaniana ao amin’ny Baiboly. Natao batisa tamin’ny 2002

Resadresaka nifanaovana tamin’i Olga vadin’i Sergey b

Inona no nanampy anao rehefa kivy ianao?

Zavatra manampy ahy no andaniako fotoana. Mamaky boky sy gazety ara-baiboly izao, ohatra, aho. Mivavaka amin’i Jehovah koa aho, dia mangataka aminy mba hanatanjaka ahy dia amin’izay aho tsy kivy be loatra. Averiko vakina ny taratasin’i Sergey, dia alaiko sary an-tsaina hoe ho hoatran’ny ahoana ny mifankahita aminy indray rehefa vita izao zavatra rehetra izao. Tena manampy ahy koa ny mihaino an’ireny hirantsika ireny sy ny mihira manaraka an’ireny rehefa mandeha ilay izy.

Inona no andinin-teny tena manampy anao hiaritra?

Tena tiako ny 1 Korintianina 10:13 satria mampanantena Andriamanitra ao hoe ‘tsy hamela antsika halaim-panahy mihoatra noho izay zakantsika.’ Fantatro hoe tsy hahavita hiaritra an’izao rehetra izao irery aho, dia fantatro koa hoe tsy maintsy hanampy ahy hiaritra i Jehovah. Zakanay izao matoa mitranga aminay, sady tsy hoe hitohy mandrakizay.

Mampionona antsika ny mahafantatra fa tena fialofana ho an’ny mpanompony tsy mivadika i Jehovah, ary ‘hanohana antsika ny sandriny maharitra mandrakizay.’—Deoteronomia 33:27.

Zava-nitranga

9 Novambra 2021

Nisokatra ny raharaham-pitsarana. Nosavan’ny manam-pahefana ny trano 15 misy Vavolombelon’i Jehovah any Akhtoubinsk sy Znamensk, anisan’izany ny tranon’ny Rahalahy Kiramov sy Korolev ary Kosyanenko
10 Novambra 2021

Nosamborina i Sergey Korolev
11 Novambra 2021

Nosamborina i Rinat Kiramov sy Sergey Kosyanenko. Nampidirina am-ponja vonjimaika izy telo mirahalahy
14 Novambra 2021

Nanomboka ny fitsarana

a b Tsy mbola azo natao ny niresadresaka tamin’ny Rahalahy Kiramov sy Kosyanenko

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO