10 FEBROARY 2023 | VAOVAO FARANY: 14 JOLAY 2023
ROSIA

VAOVAO FARANY: GADRAINA IREO RAHALAHY | Rahalahy Telo Tsaraina any Amin’ny Fitsaran’i Moscou

HANDEFA

Tamin’ny 12 Jolay 2023, dia nomelohin’ny Fitsaram-paritr’i Savelovskiy any Moscou higadra efa-taona sy tapany ny Rahalahy Roman Mareyev, enin-taona sy tapany ny Rahalahy Anatoliy Marunov, ary dimy taona ny Rahalahy Sergey Tolokonnikov. Efa migadra i Roman sy Sergey, fa i Anatoliy kosa tonga dia naiditra am-ponja raha vao niala teo amin’ny fitsarana.

Ireo voampanga

Roman Mareyev

Teraka: 1978 (Moscou)

Mombamomba azy: Niasa tao amin’ny fikarakarana ny fitaterana any Moscou. Izy no tena nikarakara ny ray aman-dreniny kilemaina, talohan’ny nampidirana azy am-ponja

Nanomboka namaky Baiboly, dia variana tamin’ny fahatanterahan’ny faminanian’i Daniela. Natao batisa tamin’ny 2002, dia lasa Vavolombelon’i Jehovah

Resadresaka nifanaovana taminy

Inona no nanampy anao tsy ho kivy nandritra an’izay fotoana ela be nigadranao izay?

Rehefa nampidirina am-ponja vonjimaika noho ny finoako aho, dia lasa tsapako hoe mila miezaka ny ho tsara fitondran-tena aho satria izay no fomba tsara indrindra ahafahako midera an’Andriamanitra. Mandinika tsara an’izay ataoko sy ny fomba itondrako ny hafa ny olona miara-migadra amiko, mandritra an’ireo volana ijanonako ato. Raisiko ho zava-dehibe mihitsy ny mangataka fanahy masina amin’i Jehovah isan’andro, amin’izay aho mahavita manahaka ny toetrany.

Hitako hoe ilay miandry fitsarana no mafy kokoa noho ny miatrika an’ilay izy. Mila matoky an’Andriamanitra aloha isika, dia avy eo raisiny ny tanantsika, dia tarihiny isika rehefa “mamakivaky lohasaha maizim-pito.” (Salamo 23:4) Ny zavatra tokana tokony hataoko dia ny hoe tsy mamotsotra ny tanany mihitsy. Mahita fomba foana i Jehovah mba hanampiana ahy hatoky hoe ho tanteraka ny fampanantenany, dia izay no mahatonga ahy hilamin-tsaina sady mbola ho faly foana.

Anatoliy Marunov

Teraka: 1953 (Izmail, Ukraine)

Mombamomba azy: Mpanamboatra sary ho an’ny gazety iray no asany taloha, fa efa misotro ronono

Nanambady an’i Alevtina tamin’ny 1975. Manan-janaka roa lahy izy mivady

Nianatra Baiboly i Alevtina dia natao batisa tamin’ny 1994. I Anatoliy indray niasa tamin’ny orinasa mpanao gazety, dia variana izy satria tena tsara ny zavatra vita pirinty avoakan’ny Vavolombelon’i Jehovah. Nanomboka liana tamin’ny faminanian’ny Baiboly izy, dia natao batisa tamin’ny 1999

Resadresaka nifanaovana taminy

Ahoana no niomananao hiatrika fanenjehana?

Nataonay mivady an-tsaina foana hoe tsy maintsy hiatrika fanenjehana izahay indray andro any. Dia nifantoka tsara izahay rehefa nanao teny vakina isan’andro, namaky ny lahatsoratra rehetra nivoaka, ary rehefa nivory. Nohenoinay tsara koa ny fampandrenesana. Raisinay tsara izay toromarika omen’ny fandaminana, dia avy eo arahinay an-tsakany sy an-davany.

Inona no mahatonga anao hiaritra foana?

Tsy hilavo lefona mihitsy aho satria tena ankasitrahako izay efa nataon’ilay Raintsika be fitiavana tamiko sy tamin’ny fianakaviako. Tena tiako be koa ilay hoavy ampanantenainy an’izay olona mankatò azy. Fantatsika fa efa mihamanakaiky ny farany. Tsy fotoana tokony hialana amin’i Jehovah mihitsy izao. Vao mainka koa aho tapa-kevitra ny tsy hiala mihitsy satria be dia be ny mpanohana ahy.

Sergey Tolokonnikov

Teraka: 1972 (Moscou)

Mombamomba azy: Mpiambina no asany

Nanambady an’i Mariya tamin’ny 2004. Nanomboka nianatra Baiboly i Mariya tamin’ny 2003. Faly i Sergey satria voavaly avy tao amin’ny Baiboly ny fanontaniany, dia nanomboka nianatra koa izy. Natao batisa izy mivady tamin’ny 2005

Resadresaka nifanaovana tamin’ny Ranabavy Mariya Pankova, vadin’i Sergey a

Ahoana ny fomba ifandraisanareo mivady?

Taratasy no tena ifandraisanay. Misy andinin-teny sy tantara ara-baiboly isan-karazany ny taratasy alefany atỳ amiko. Mandefa karta sy sary mampitsikitsiky ahy koa izy. Vao haingana aho izao no nahazo alalana hitsidika azy indroa isam-bolana, dia adiny iray sasany ny faharetan’ny fitsidihana. Efa ho adiny telo ny lalana mankany amin’ilay fonja, dia tonga dia lany iray andro aho rehefa mankany.

Inona no ianaranao avy amin’izao zavatra iainanareo izao?

Hitanay sy Sergey mazava tsara fa tsy misy afaka manao zavatra mihoatra an’izay avelan’i Jehovah ataony, na mpampanoa lalàna na mpitsara na mpanao famotorana. Voafehin’i Jehovah tsara mantsy ny zava-drehetra.

Tena mankasitraka an’i Roman sy Anatoliy ary Sergey isika satria modely tsara ry zareo. Matoky isika fa na inona na inona zava-tsarotra atrehintsika, dia ‘tsy misy loza atahorantsika’ satria eo anilantsika i Jehovah.—Salamo 23:4.

Zava-nitranga

20 Oktobra 2021

Nisava trano valo ipetrahan’ny Vavolombelon’i Jehovah any Moscou ny manam-pahefana. Nisokatra ny raharaha mikasika an’i Roman sy Anatoliy ary Sergey. Nampangaina hoe mpanao heloka bevava ry zareo satria hoe nandamina asa ho an’ny fikambanana mampidi-doza sady nandresy lahatra ny hafa handray anjara amin’izany koa. Nampidirina am-ponja vonjimaika izy telo mirahalahy
22 Oktobra 2021

Notanana am-ponja vonjimaika i Roman sy Sergey. I Anatoliy indray nambenana tany an-tranony
17 Jona 2021

Nanomboka ny fitsarana azy ireo

a Mbola notanana am-ponja vonjimaika ny Rahalahy Tolokonnikov tamin’ny fotoana nanomanana an’ity lahatsoratra ity, dia tsy azo natao ny niresaka taminy. Tsy nitondra ny anaran’ny vadiny ny Ranabavy Pankova rehefa nanambady.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO