14 DESAMBRA 2023 | VAOVAO FARANY: 30 JANOARY 2024
ROSIA

VAOVAO FARANY: GADRAINA IREO RAHALAHY | “Tena Manampy Ilay hoe Matoky An’i Jehovah”

HANDEFA

Nomelohin’ny Fitsaram-paritr’i Samarskiy any Samara ny Rahalahy Aram Danielyan, Denis Kuzyanin, Sergey Polosenko, ary Nikolay Vasiliyev, tamin’ny 25 Janoary 2024. Samy voaheloka higadra fito taona avy ry zareo, ary tonga dia naiditra am-ponja raha vao niala teo amin’ny fitsarana.

Ireo voampanga

Aram Danielyan

Teraka: 1990 (Armenia)

Mombamomba azy: Nifindra tany Rosia ny fianakaviany tamin’izy valo volana

Niasa tamin’ny resaka fanorenana trano sy fividianana entana

Ny nenitoany sy ny mamany no nampianatra Baiboly azy. Vao mainka izy lasa tia an’i Jehovah rehefa tsapany hoe nivaly ny vavaka nataony. Lasa Vavolombelon’i Jehovah vita batisa tamin’ny 2011

Nanambady an’i Elina tamin’ny 2017. Manan-janaka lahy iray izy mivady

Resadresaka nifanaovana taminy

Inona no nanampy anao tsy ho resin’ny hakiviana?

Indraindray aloha izaho malahelo ihany noho ny zavatra mahazo ahy e! Fa rehefa malahelo hoatr’izany anefa aho dia manampy ahy ny mitadidy hoe izaho mihitsy no nifidy ny hanompo an’i Jehovah. Vao mainka anefa aho tsy ho sambatra raha mijanona tsy manompo azy satria fotsiny hoe tsy te henjehina intsony. Faly aho izao satria sady manamasina ny anaran’i Jehovah no mampahafantatra ny anarany. Tiako haseho amin’i Satana hoe izaho indray dia hanompo an’i Jehovah foana. Na ho faty aza dia vonona aho, mainka moa fa hoe hogadraina fotsiny!

Denis Kuzyanin

Teraka: 1984 (Norilsk, Faritanin’i Krasnoïarsk)

Mombamomba azy: Manao asa tena

Nanomboka nianatra Baiboly tamin’ny Vavolombelon’i Jehovah i Denis sy ny mamany tamin’izy folo taona. Natao batisa tamin’ny 2001

Nanambady an’i Yelena tamin’ny 2012. Manan-janaka vavy iray izy mivady

Resadresaka nifanaovana taminy

Inona no tantara ao amin’ny Baiboly manampy anao hiatrika zava-tsarotra?

Lasa nisy dikany be tamiko ny bokin’i Joba. Nampisaintsaina an’i Joba i Jehovah, manomboka eo amin’ny toko 38, rehefa niresaka momba ny fahaizany namorona ny zavaboary. Dia rehefa misaintsaina an’izay efa nataon’i Jehovah sy izay mbola hataony aho, dia manampy ahy izany mba hahita an’izay tena zava-dehibe eo amin’ny fiainana. Manampy ahy ilay izy mba hitadidy hoe ny mankatò an’i Jehovah no zava-dehibe indrindra. Dia raha mbola mankasitraka ahy izy, dia tsy dia mampaninona ahy ireny olana ireny!

Sergey Polosenko

Teraka: 1968 (Ouzbékistan)

Mombamomba azy: Mpitantana trano fikarakarana bika aman’endrika

Nanambady an’i Lydia tamin’ny 1993

Lehibe tao anaty fianakaviana Vavolombelon’i Jehovah. Natao batisa tamin’ny 1982

Resadresaka nifanaovana taminy

Nanao ahoana ny fifandraisanao tamin’i Jehovah, tamin’ianao notanana am-ponja vonjimaika?

Tsy azoko novana ny zava-misy, tamin’izaho notanana am-ponja vonjimaika. Tsy nisy afa-tsy izaho sy Jehovah ihany. Tsapako tamin’izay hoe sady mpiaro ahy i Jehovah no mpanampy ahy, ary indrindra indrindra namako izy. Fantatro hoe nanampy ahy foana izy. Mahafinaritra ilay izy satria izahay mpinamana be, dia nahatonga ahy hilamin-tsaina sy tsy hanahy be momba ny hoavy izany. Miovaova foana ny zavatra iainako izao, nefa vao mainka aho lasa mahafantatra kokoa an’i Jehovah sy ny toetra tsarany. Misaotra betsaka azy aho noho izany rehetra izany.

Nikolay Vasiliyev

Teraka: 1984 (Aïcha, Repoblikan’i Tatarstan)

Mombamomba azy: Mpamorona programa amin’ny ordinatera

Tsy nino an’Andriamanitra taloha. Rehefa nianatra Baiboly anefa izy dia nahita hoe mitombina tsara ny fampianaran’ny Baiboly, ka resy lahatra izy hoe misy Andriamanitra. Natao batisa tamin’ny 2005

Resadresaka nifanaovana taminy

Inona no nanampy anao hatoky an’i Jehovah foana?

Nahagaga fa talohan’ilay izaho notanana am-ponja vonjimaika, dia natahotra be an’izany higadra izany aho. Tsy matahotra intsony aho izao, satria efa haiko hoe hoatran’ny ahoana ilay migadra, dia haiko koa ny fomba nanampian’i Jehovah an’ahy. Mafy amiko ilay tsy mahalala hoe rahoviana ity raharaha eny amin’ny fitsarana ity vao vita, dia inona ny didim-pitsarana hivoaka. Haiko anefa hoe manohana ahy foana i Jehovah. Tena manampy ilay hoe matoky an’i Jehovah, satria lasa miadan-tsaina sy matoky aho hoe tsy maintsy hilamina ity raharaha ity amin’ny farany.

Matoky isika hoe hataon’i Jehovah foana izay hampiononana ny fon’izay rehetra ampijalina noho finoany. Mampahery azy ireny izy, amin’izay izy ireny “hanao ny tsara sy hiteny zavatra tsara foana.”—2 Tesalonianina 2:16, 17.

Zava-nitranga

14 Desambra 2021

Nampangaina ho mpanao heloka bevava ny Rahalahy Denis sy Nikolay ary Sergey
15 Desambra 2021

Natao savahao ny tranon’i Denis sy Nikolay ary Sergey. Nalefa tany amin’ny toby fitanana am-ponja vonjimaika ry zareo taorian’izay
16 Desambra 2021

Nafindra tany amin’ny toby fitanana am-ponja vonjimaika hafa ry Denis sy Nikolay ary Sergey
6 Janoary 2022

Nampangaina ho mpanao heloka bevava i Aram. Nosamborina teny amin’ny seranam-piaramanidina izy
7 Janoary 2022

Notanana am-ponja vonjimaika i Aram
12-14 Desambra 2022

Nafahana avy tany amin’ny fitanana am-ponja vonjimaika izy efatra mirahalahy, tsy navela nanao dia lavitra
16 Jona 2023

Nanomboka notsaraina

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO