20 APRILY 2023 | VAOVAO FARANY: 14 AOGOSITRA 2024
ROSIA

VAOVAO FARANY: MANDOA LAMANDY ILAY RAHALAHY | Natanja-tsaina Indray ny Rahalahy Okhapkin Rehefa avy Nandinika ny Zavaboary

HANDEFA

Namoaka didim-pitsarana momba ny Rahalahy Andrey Okhapkin ny fitsarana any Kinechma, any amin’ny Faritanin’i Ivanovo, tamin’ny 13 Aogositra 2024. Voasazy handoa lamandy 540 000 roubles (27 tapitrisa ariary eo ho eo) izy.

Ilay voampanga

Andrey Okhapkin

Teraka: 1962 (tany Zavoljsk, Faritanin’i Ivanovo)

Mombamomba azy: Mpamorona programa amin’ny ordinatera no asany taloha sady mpampianatra fizika

Nanambady an’i Irina tamin’ny 1987. Nianatra Baiboly tamin’ny Vavolombelon’i Jehovah i Irina nanomboka tamin’ny 1994. Lasa nianatra koa i Andrey rehefa resy lahatra hoe tena nisy namorona izao rehetra izao. Niara-natao batisa tamin’ny 1995 izy mivady

Resadresaka nifanaovana taminy

Inona no nanampy anao tsy ho kivy tamin’ianao tsy nahazo nivoaka ny trano?

Nivavaka tamin’i Jehovah foana aho, dia nataoko nazava tsara taminy ny zavatra nangatahiko. Fohy kely ilay vavaka indraindray nefa tena nandaitra. Ireny no nanampy ahy tsy hitsetra tena. Mieritreritra momba an’i Joba koa aho rehefa kivy. Nasain’i Jehovah nandinika ny zavaboary sasany noforoniny i Joba satria tiany hampahatsiahivina azy hoe Andriamanitra manana toetra tsara be dia be izy. Dia niezaka nandinika ny zavaboary koa aho. Ny nijery masoandro no tena tiako, fa tiako koa ny nandinika ny rahona, ny lanitra, ny hazo, dia ny vorona. Tena nampiaiky ahy ny fahaizan’ny vorona manidina. Nisy saka kely sy alika koa tao ivelan’ny tranonay, dia nodinihiko tsara koa ny zavatra ataon-dry zareo. Avy eo an-davaranganay aho no nijery an’izany rehetra izany, efa ho dimy volana. Dia lasa nahafantatra kokoa ny toetran’i Jehovah aho. Vao mainka izao hitako hoe tena Ray be fitiavana izy.

Misy olon-kafa miaritra ny mafy hoatr’anao koa. Nampahery anao ve ry zareo?

Nanoratan’izay rahalahy iray izay aho tamin’izaho tsy nahazo nivoaka ny trano. Nigadra io rahalahy io tamin’izay. Izao no nosoratany: “Anontanian’ny olona aho indraindray hoe: ‘Matahotra ve ianao?’ Mandainga aho raha hiteny hoe tsy matahotra. Mila resentsika anefa izay tahotra tsapantsika ao anatintsika ao. Dia tsy maintsy manana herim-po isika raha te handresy an’ilay izy. I Jehovah no manome herim-po antsika. Omeny herim-po foana isika isaky ny mitady tsy hanana an’izany. Izay no mahatonga antsika mpanompon’i Jehovah halaza hoe be herim-po. Tadidio hoe na ngeza hoatran’inona aza ny olana atrehinao, dia tsisy dikany izany rehefa matanjaka tsara ny finoanao.” Nianarako avy tamin’ny tantaran’io rahalahy io sy ny olon-kafa hoe mila miezaka mifandray kokoa amin’i Jehovah aho. Tokony hianatra zavatra momba an’i Jehovah sy zavatra hafa avy ao amin’ny Teniny foana koa aho, dia hosaintsainiko sy hataoko ao am-poko ilay izy.

Faly be hoatran’i Andrey isika rehefa mahita ny “zavatra mahatalanjona nataon’Andriamanitra.” Mampahatsiahy antsika ireny hoe tia antsika izy sady mikarakara antsika.—Joba 37:14.

Zava-nitranga

18 Novambra 2021

Nanomboka ny famotopotorana momba azy
23 Novambra 2021

Trano enina an’ny Vavolombelon’i Jehovah no nosavana, anisan’izany ny tranon’i Andrey. Nosamborina izy dia notanana am-ponja vonjimaika
24 Novambra 2021

Nampangaina hoe nanao heloka bevava
25 Novambra 2021

Notanana am-ponja vonjimaika
17 Febroary 2022

Navoaka avy tany am-ponja fa tsy navela hivoaka ny trano
14 Jolay 2022

Navela hivoaka ny trano fa tsy nahazo nanao dia lavitra
15 Desambra 2022

Nanomboka notsaraina

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO