23 AOGOSITRA 2023 | VAOVAO FARANY: 25 JONA 2024
ROSIA

VAOVAO FARANY: MANDOA LAMANDY ILAY RAHALAHY | “Vao Mainka aza Aho Lasa Matanja-tsaina”

HANDEFA

Nomelohin’ny Fitsaram-paritr’i Lesosibirsk any amin’ny faritanin’i Krasnoïarsk ny Rahalahy Valeriy Schitz tamin’ny 24 Jona 2024. Voasazy handoa lamandy 600 000 roubles (30 tapitrisa ariary eo ho eo) izy.

Ilay voampanga

Valeriy Schitz

Teraka: 1966 (tany Bolshaya Murta, any Krasnoïarsk)

Mombamomba azy: Niasa tamin’ny resaka fanorenana

Nanambady an’i Irina tamin’ny 1987. Manan-janaka roa lahy

Nianatra Baiboly tamin’ny Vavolombelon’i Jehovah niaraka tamin’ny vadiny. Gaga izy hoe betsaka ny faminanian’ny Baiboly efa tanteraka sady misy vokany tsara koa rehefa ampiharina ny torohevitra ao. Niara-natao batisa izy mivady tamin’ny 2008

Resadresaka nifanaovana taminy

Inona no nianaranao rehefa nanampy sy nikarakara anao ny rahalahy sy anabavy?

Rehefa naheno izay nitranga taminay ny rahalahy sy anabavy dia tonga dia nanampy anay. Nasehony hoe tiany be izahay satria nomeny zavatra be dia be. Vonona hanome ny fotoanany sy ny heriny ho anay koa ry zareo. Tsy mora tamiko tamin’ny voalohany ilay hoe hanaiky ny fanampian’ny hafa satria efa zatra hoe manampy olona aho fa tsy hoe ampian’olona. Mahasambatra kokoa mantsy ny manome noho ny mandray. Tsy maintsy nianatra nanova ny toe-tsaiko aho hoe mila manaiky ny fanampian’ny hafa. Lasa faly aho rehefa nanao an’izany satria mahita an’ireo rahalahy sy anabavy mampiseho fitiavana hoatran’i Jehovah sy Jesosy.

Inona no nahatonga anao tsy hanary toky mihitsy?

Sedraina foana ny finoan’ny Kristianina tsirairay. Mety hoe tsy migadra ry zareo fa marary, na iharan’ny tsy rariny, na maty havana na namana. Mampahatsiahy ahy ny Jakoba 1:3 hoe ‘lasa mahay miaritra aho rehefa vita sedra ny finoako.’ Resahiko amin’i Jehovah foana àry izay rehetra ato am-poko. Arakaraka ny ivavahako aminy no ahatsapako hoe lasa mifandray be aminy aho. Vao mainka koa mampahery ahy ny mahafantatra hoe mivavaka ho ahy ny rahalahy maneran-tany. Reraka aho ary lasa voafetra ny zavatra azoko atao noho ilay fanenjehana, fa tsy mahasakana ahy izany. Vao mainka aza aho lasa matanja-tsaina.

Mampahery ny mahafantatra hoe na inona na inona mihatra amintsika, dia hanohana antsika eo foana i Jehovah sy ireo rahalahy sy anabavintsika.—1 Petera 5:9, 10.

Zava-nitranga

19 Novambra 2021

Nanomboka ny famotopotorana
25 Novambra 2021

Nosavana ny tranony ary natao famotorana izy
26 Novambra 2021

Tsy navela nanao zavatra sasany
18 Mey 2022

Tsy navela nanao dia lavitra
10 Aprily 2023

Nanomboka ny fitsarana

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO