20 DESAMBRA 2021
ROSIA

VAOVAO FARANY | Miandry Didim-pitsarana Ireo Rahalahy Efatra, Taorian’ilay Bemidina Tany Trans-Baikal

HANDEFA

Nampakatra fitsarana ny Rahalahy Vladimir Ermolaev, Sergey Kirilyuk, Igor Mamalimov, ary Aleksandr Putintsev, nefa nolavin’ny fitsarana any amin’ny Faritanin’i Trans-Baikal izany tamin’ny 20 Septambra 2022. Mbola migadra àry i Vladimir sy Igor ary Aleksandr. I Sergey kosa mbola tsy naiditra am-ponja aloha izao.

Nomelohin’ny Fitsaram-paritr’i Chita i Vladimir, Sergey, Igor, ary Aleksandr, tamin’ny 6 Jona 2022. Sazy mihantona enin-taona no azon’i Sergey. Samy voasazy higadra enin-taona sy tapany kosa i Vladimir sy Igor ary Aleksandr. Mihatra avy hatrany ny sazin’izy ireo.

Zava-nitranga

16 Martsa 2021

Nanomboka ny fitsarana azy ireo
2 Febroary 2021

Nampangaina hoe nandamina zavatra ataon’ny fikambanana raran’ny fanjakana i Vladimir, Sergey, Igor, ary Aleksandr
3 Aprily 2020

Tsy nambenana tao an-tranony intsony i Vladimir
15 Febroary 2020

Nafahana i Sergey rehefa avy notanana am-ponja vonjimaika dimy andro
12 Febroary 2020

Nafahana i Igor sy Aleksandr, fa i Sergey mbola notazonina 72 ora fanampiny. Nasaina nambenana tao an-tranony nandritra ny 52 andro i Vladimir
10 Febroary 2020

Nataon’ny polisin’ny FSB savahao ny tranona Vavolombelon’i Jehovah 50 tany amin’ny Faritanin’i Trans-Baikal. Anisan’ny nanaovana bemidina koa ny tranon’ireo Vavolombelona be taona sy kilemaina. Nodarohana teo imason’ny mamany sy ny zandriny vavy ny Vavolombelona iray mbola tsy ampy taona. Nisy rahalahy iray koa nampijalijalina. Rehefa vita ilay fisavana, dia rahalahy folo no voasambotra, anisan’izany i Igor, Aleksandr, Sergey, ary Vladimir

Ireo voampanga

Sergey Kirilyuk

Teraka: 1972 (Cheremkhovo, Faritr’i Irkutsk)

Mombamomba azy: Fianakaviana maro anaka no nisy azy satria enina ry zareo no mpiray tam-po. Mpanao sodiora no asany. Nanambady an’i Olga tamin’ny 1992. Manan-janaka telo

Lasa liana tamin’ny Baiboly i Sergey sy Olga taorian’ny 1995. Natao batisa tamin’ny 1998

Resadresaka nifanaovana taminy

Inona no vokatry ny fitondran-tenanao teo amin’ny hafa?

Mpanao heloka bevava raindahiny no niray efitra tamiko, tamin’izaho notanana am-ponja vonjimaika. Efa ho ny androatokom-piainany no lany tany am-ponja. ... Isaky ny tafaverina avy natao famotorana aho, dia nanontaniany foana hoe: “Ka ahoana, nanaiky lembenana ianao sa tsia?” Dia hozy aho hoe: “Tsy nanaiky aho.” Hitako hoe nanaja ahy izy. Nanadihady ahy tontolon’ny andro [ny polisy] nefa tsy mba nanome na dia sakafo indraim-bava aza. Ilay mpiray efitra tamiko kosa nanangona sakafo mba hohaniko rehefa tafaverina tao amin’ilay efitra aho. Tsy nandry fotsy mihitsy aho.

Igor Mamalimov

Teraka: 1976 (Faritr’i Ilishevsky, Repoblikan’i Bashkortostan)

Mombamomba azy: Mpamboly sy mpiompy ny ray aman-dreniny ary telo ry zareo no mpiray tam-po. Mahay mitendry angorodao. Mpanao trano sy mpanamboatra fiara simba no asa tapa-potoana nataony. Nanambady an’i Natalya tamin’ny 2007. Manan-janaka telo

Narary izy tamin’ny taona 2000 tany ho any. Maty koa ny zandriny vavy. Lasa nanana fanontaniana momba an’Andriamanitra sy ny fiainana ary ny fahafatesana izy, vokatr’izany. Nahazo valiny rehefa nianatra Baiboly tamin’ny Vavolombelon’i Jehovah. Natao batisa tamin’ny 2008

Resadresaka nifanaovana taminy

Inona no soa azonareo mianakavy teo amin’ny lafiny ara-panahy nandritra an’iny fitsapana iny?

Lasa mifankatia be izahay mianakavy sady lasa akaiky be an’i Jehovah. Mandroso tsara daholo ny zanakay. Tena tia an’i Jehovah ry zareo. ... Mihatsara ny valin-tenin-dry zareo any am-pivoriana, sady betsaka ny fanontaniana mahaliana apetraky ry zareo. ... Mivavaka imbetsaka amin’i Jehovah ry zareo, dia tantarainy anay hoe ahoana no namalian’i Jehovah ny vavaka nataony. Tena nanova ny fiainanay mianakavy iny fitsapana iny, ary samy nandray soa be dia be avy amin’ilay izy daholo ny tsirairay taminay.

Aleksandr Putintsev

Teraka: 1974 (Verkhnyaya Khila, Faritanin’i Trans-Baikal)

Mombamomba azy: Lahitokana. Tia mamaky boky sy maka sary. Nanambady an’i Galina tamin’ny 1994. Manana orinasa ry zareo ary manan-janaka lahitokana

Tonga saina izy tamin’ny 1990 tany ho any hoe nijaly ny fianakaviany noho izy mamo lava. Nanomboka nianatra Baiboly, ary nahatsapa hoe niova ny fiainany rehefa narahiny ny torohevitra tao. Natao batisa tamin’ny 1997

Resadresaka nifanaovana taminy

Nahoana ny vavaka no nanampy anao?

Fitsapam-pinoana tena mafy tamiko ilay izaho natao famotorana voalohany. Natahotra be aho sady nitaintaina be mihitsy. Nivavaka mafy aho. Fantatro koa hoe samy mivavaka ho ahy daholo na ny fianakaviako na ny namako be dia be. Tadidiko fa nivavaka foana aho mandra-pahatongako tany amin’ny biraon’ny mpanao famotorana. Rehefa tonga tao aho, dia tena nahatsiaro ho tony sady natoky hoe hanohana ahy i Jehovah. Isaky ny natao famotorana aho taorian’izay, dia vao mainka natoky hoe tsy handao ahy mihitsy i Jehovah.

Enga anie isika hanahaka ny finoana matanjaka ananan’ireo rahalahy malalantsika ireo. Hoatran’i Daniela sy ny namany telo lahy mantsy izy ireo, ka ‘tapa-kevitra ao am-pony’ fa tsy hivadika amin’i Jehovah na dia eo aza ny faneren’ny manam-pahefana.—Daniela 1:8.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO