1 APRILY 2022
ROSIA

VAOVAO FARANY | Miaro ny Anaran’Andriamanitra ny Rahalahy Sergey Belousov

HANDEFA

Nolavin’ny Fitsaram-paritr’i Tomsk ny fampakarana fitsarana nataon’ny Rahalahy Sergey Belousov, tamin’ny 30 Jona 2022. Mbola tsy naiditra am-ponja aloha izy izao.

Nomelohin’ny fitsarana any Seversk, any amin’ny Faritr’i Tomsk, ny Rahalahy Sergey Belousov, tamin’ny 14 Aprily 2022, ary nomeny sazy mihantona telo taona.

Zava-nitranga

14 Jolay 2020

Nisy polisy avy ao amin’ny Sampan-draharahan’ny Fiarovam-pirenena (FSB) nanao bemidina tany amin’ny trano fito an’ny Vavolombelon’i Jehovah, anisan’izany ny tranon’i Sergey. Mody niseho ho liana tamin’ny Baiboly ny olona iray nirahin’ny fitondrana, dia naka feo an-tsokosoko ny fivorian’ny fiangonana izy nandritra ny volana maromaro talohan’izay
25 Martsa 2021

Nampangaina ho mpanao heloka bevava i Sergey
30 Martsa 2021

Ny feo noraisin’ilay olona nirahin’ny fanjakana no natao porofo niampangana an’i Sergey. Nampangaina izy hoe nandray anjara tamin’ny fotoam-pivavahana natao tamin’ny alalan’ny fitaovana fanaovana vidéoconférence ary nihira sy nivavaka tamin’i Jehovah Andriamanitra

Ilay voampanga

Sergey Belousov

Teraka: 1978 (Esil, Kazakhstan)

Mombamomba azy: Lehibe tao amina fianakaviana mpahay mozika. Elektrisianina sy lehiben’ny mpiasa tao amina ozinina mpanodina solitany taloha, dia tatỳ aoriana lasa mpamolavola tetikasa (concepteur de projet). Nanambady an’i Svetlana tamin’ny 1999. Manan-janaka vavy iray ry zareo

Nihaona tamin’ny Vavolombelon’i Jehovah tamin’ny 2001. Nianarany tao amin’ny Baiboly hoe Jehovah no anaran’Andriamanitra. Hitany tao koa ny valin’ny fanontaniana nanahiran-tsaina azy, ary tena nahafa-po azy izany. Natao batisa tamin’ny 2002

Resadresaka nifanaovana taminy

Ahoana no nikarakaran’ny mpiara-manompo anao sy ny fianakavianao?

Tsy mbola nisy fotoana mihitsy hoe tsy niraharaha anay ny mpiara-manompo. Ny ampitson’ilay fisavana trano ry zareo dia efa tonga nitsidika anay sy ny havanay dia nampahery anay. Nalain’ny polisy nandritra an’ilay fisavana daholo ny fitaovana elektronika rehetra tao aminay, dia lasa tsy afaka namaky Baiboly izahay. Nomen’ny mpiara-manompo anay anefa ny fitaovan-dry zareo, dia tsy ory sakafo ara-panahy mihitsy izahay na dia andro iray aza.

Inona no mandrisika anao hiaritra?

Mitadidy aho hoe na inona na inona didim-pitsarana mivoaka eo, dia mpandresy foana isika amin’i Jehovah. Tsy mpisolovava mahay be no ilaina, fa fifandraisana tsara amin’Andriamanitra. Isika ange tsy nanao ratsy e! Fotoana miavaka izao iainantsika izao. Voninahitra ny hoe [manao izay azo atao] mba hanamarinana ny zon’i Jehovah hitondra! Izay no tanjontsika. Ny hiaro ny anaran’i Jehovah no antony andehanantsika eny amin’ny fitsarana, fa tsy ny hanaporofo hoe tsy manan-tsiny isika.

Resy lahatra hoatran’i Sergey isika hoe “hampitombo ny herin’ny vahoakany” i Jehovah rehefa manome voninahitra ny anarany isika.—Salamo 148:13, 14.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO