8 DESAMBRA 2022 | VAOVAO FARANY: 15 FEBROARY 2023
ROSIA

VAOVAO FARANY: NAHENA NY ONITRA | Matoky hoe Manohana i Jehovah

HANDEFA

Nahenan’ny Fitsarana Tampon’ny Repoblikan’i Tchouvachie ny onitra takina amin’ny Ranabavy Nina Martynova sy Zoya Pavlova, tamin’ny 13 Febroary 2023. Onitra 350 000 roubles (21 tapitrisa ariary mahery) ilay teo aloha ary nahena ho 80 000 roubles (4,8 tapitrisa ariary mahery). Tsy miova kosa ny sazy mihantona azon’ny Rahalahy Martynov sy Mikhail Yermakov.

Nomelohin’ny Fitsaram-paritr’i Alatyrskiy any amin’ny Repoblikan’i Tchouvachie i Andrey, Nina, Zoya, ary Mikhail, tamin’ny 22 Desambra 2022. Nampandoavina onitra 350 000 roubles (21 tapitrisa ariary mahery) i Nina sy Zoya. Nahazo sazy mihantona enin-taona i Andrey sy Mikhail. Tsy migadra ry zareo amin’izao.

Ireo voampanga

Andrey Martynov

Teraka: 1964 (Tany Barnaul, any amin’ny Faritanin’i Altaï)

Mombamomba azy: Mpitondra fiara no asany

Tamin’i Andrey sy Nina mbola tsy nivady no nanomboka nianatra Baiboly. Nivady tamin’ny 1992 ry zareo, ary tamin’io taona io koa no natao batisa. Roa vavy ny zanak’izy ireo

Resadresaka nifanaovana taminy

Inona no nanampy anao hatoky an’i Jehovah foana?

Rehefa tsy hitako izay atao amin’ny toe-javatra iray, dia miato kely aho ary mitadidy hoe lohan’ny fianakaviana anankiray ngezabe i Jehovah. Be traikefa lavitra noho izaho izy sady tena faran’izay hendry. Hoatran’ny raim-pianakaviana iray miantsoroka tsara ny andraikiny koa izy, dia manome tari-dalana ho an’ny fianakaviany, anisan’izany aho. Mahafaly ahy ny mahazo an’izany tari-dalany izany, dia te hiezaka mafy aho mba hampihatra an’ilay izy. Nijaly be aho nandritra an’ireny famotorana ireny, na ara-batana na ara-pihetseham-po, nefa nanampy ahy i Jehovah. Dia lasa resy lahatra hoe mahavita mifehy ny zava-drehetra izy. Lasa akaiky kokoa azy aho vokatr’izany.

Nina Martynova

Teraka: 1958 (Tany Pervomayskiy, any amin’ny Repoblikan’i Tchouvachie)

Mombamomba azy: Mpampianatra sy mpikarakara ankizikely izy

Niara-nianatra Baiboly tamin’ny Vavolombelon’i Jehovah izy sy Andrey. Vita batisa tamin’ny 1992

Resadresaka nifanaovana taminy

Inona no mahatonga anao hatoky hoe ho vitanao ny hiatrika an’izao fanenjehana izao?

Tadidiko hoe efa nisy fotoana i Mosesy niatrika zavatra mafy be teo amin’ny fiainany. Nampahatsiahivin’i Jehovah azy anefa ny dikan’ny anarany, hoe afaka ny ho tonga an’izay zava-drehetra ilaina Izy mba hanatanterahana ny fikasany. Fa ianarantsika koa hoe afaka manampy ny mpanompony ho tonga an’izay rehetra ilaina koa izy. Rehefa nieritreritra an’izany aho, dia resy lahatra hoe hahavita hanampy ahy ho tafavoaka izy raha mbola miantehitra aminy aho.

Zoya Pavlova

Teraka: 1965 (Tany Ibresi, any amin’ny Repoblikan’i Tchouvachie)

Mombamomba azy: Roa taona izy dia efa kamboty. Niasa tamina fikambanana mitady na manamboatra trano ho an’ny fiaraha-monina sady mpanao soa, talohan’izy nisotro ronono

Nanomboka nianatra Baiboly tamin’ny 2016. Nanohina be ny fony ny nahafantatra hoe tia sy mangoraka ny olombelona i Jehovah. Vita batisa tamin’ny 2018

Resadresaka nifanaovana taminy

Ahoana no nahatsapanao hoe nanohana anao i Jehovah nandritra tamin’ity olana ity?

Mafy aloha ny zava-nitranga tamin’ny voalohany e, indrindra nandritra ireo famotorana voalohany. Fa tamin’izay anefa aho no nanomboka nahatsapa hoe miavaka ny fomba anampian’i Jehovah ahy. Nampiany foana aho isan’andro mba ho tony sy ho akaiky azy, araka ny efa nampanantenainy ao amin’ny Isaia 41:10. Tena misaotra an’izay mpivady izay koa aho satria manampy ahy ry zareo amin’izao. Atao famotorana, hoatr’ahy, koa ry zareo sady miatrika olana hafa. Na izany aza dia asain-dry zareo amin’ny fotoam-pivavahany aho isan-kerinandro. Mampahery be ahy foana ny miaraka amin-dry zareo. Mbola betsaka kokoa ny olana mbola ho avy, fa fantatro anefa hoe ho vitako ny hiatrika an’izany satria eo i Jehovah.

Mikhail Yermakov

Teraka: 1962 (Tany Alatyr)

Mombamomba azy: Mpanao fanorenana ny asany taloha

Resy lahatra izy hoe tena marina ny Baiboly rehefa avy nianatra momba ny fahatanterahan’ny faminaniana izy. Vita batisa tamin’ny 1996

Resadresaka nifanaovana taminy

Inona no manampy anao rehefa matahotra na manahy ianao?

Isaky ny manahy aho dia mivavaka aloha, ary avy eo mianatra samirery. Indraindray koa aho manao raharaha na mandehandeha any anaty ala. Manampy be ahy koa ny miaraka amin’ny mpiara-manompo. Tena zava-dehibe amiko ilay hoe tsy mifantoka amin’ny zavatra ratsy mitranga na maminavina ny zavatra mety hitranga. Rehefa mifantoka amin’ny fifandraisako amin’i Jehovah sy amin’ny mpiara-manompo aho dia lasa resy lahatra hoe tsy maintsy hanatanteraka ny fikasany i Jehovah.

Tsy mivadika ny mpiara-manompo amintsika na dia enjehina aza. Afaka ny ho “feno toky hoatran’ny liona” mitovy amin’izy ireo koa isika sady ho resy lahatra hoe tia sy manohana antsika i Jehovah.—Ohabolana 28:1.

Zava-nitranga

23 Jona 2021

Be dia be ny trano nosavana tany Alatyr
28 Oktobra 2021

Nanomboka natao famotorana i Andrey satria nolazaina hoe nandamina asan’ny fikambanana “mampidi-doza.” Tsy navela niala ny tanàna nisy azy
25 Aprily 2022

Nampangaina i Andrey. Nampangaina hoe mpanao heloka bevava koa i Nina ary voaheloka hoe nandray anjara tamin’ny asa ataon’ny fikambanana “mampidi-doza”
26 Aprily 2022

Nampangaina hoe nandray anjara amin’ny asa ataon’ny fikambanana “mampidi-doza” koa i Zoya
28 Aprily 2022

Nampangaina hoe nandamina asa ataon’ny fikambanana “mampidi-doza” i Mikhail
31 Aogositra 2022

Nanomboka ny fitsarana

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO