13 FEBROARY 2023 | VAOVAO FARANY: 6 NOVAMBRA 2023
ROSIA

VAOVAO FARANY: NAMPAKATRA FITSARANA | Tratran’ny Fanenjehana ny Fianakaviana Telo any Yaroslavl

HANDEFA

Nampakatra fitsarana ny Rahalahy Pyotr Filiznov sy Andrey Vyushin, ary neken’ny Fitsaram-paritr’i Dzerzhinsky any Yaroslavl ny ampahany tamin’ny fangatahan-dry zareo, tamin’ny 30 Oktobra 2023. Nahena ho roa taona sy tapany àry ilay sazy mihantona enin-taona sy tapany azon-dry zareo. Tsy miova kosa ny sazin’ny Rahalahy Aleksandr Kuznetsov sy Mariya vadiny.

Nomelohin’ny Fitsaram-paritr’i Dzerzhinsky any Yaroslavl ny Rahalahy Pyotr Filiznov, Rahalahy Aleksandr Kuznetsov sy Ranabavy Mariya Kuznetsova vadiny, ary ny Rahalahy Andrey Vyushin, tamin’ny 3 Aogositra 2023. Samy nahazo sazy mihantona daholo ry zareo. Enin-taona sy tapany ny an’i Andrey sy Pyotr, ary roa taona sy tapany ny an’i Aleksandr sy Mariya. Mbola tsy migadra aloha ry zareo izao.

Ireo voampanga

Aleksandr Kuznetsov

Teraka: 1982 (Moscou, Faritanin’i Moscou)

Mombamomba azy: Mpampianatra anglisy sy matematika no asany taloha

Nanomboka nianatra Baiboly tamin’ny Aprily 2000. Nahasarika azy ny fifankatiavan’ny Vavolombelon’i Jehovah. Natao batisa tamin’ny 2002

Nanambady an’i Mariya tamin’ny 2017. Fantatra hoe voan’ny kansera tamin’izy avy notanana am-ponja vonjimaika

Resadresaka nifanaovana taminy

Inona no nanampy anao ho faly foana na dia marary sy enjehina aza ianao?

Matetika aho no kivy, dia indraindray aho mahatsapa hoe tena tsy manana hery hiaretana intsony. Omen’i Jehovah “lalan-kivoahana” foana anefa aho. (1 Korintianina 10:13) Manampy be ahy ny mivavaka dia milaza an’izay tena tsapako. Indraindray aza aho mitomany mihitsy rehefa mivavaka. Tsy dia manahy be koa aho rehefa mihira ny hirantsika, dia mamaky Baiboly sy mianatra samirery, ary misaintsaina ny fanantenantsika amin’ny hoavy. Miezaka mafy mampahery ny mpiara-manompo izahay mivady. Rehefa manao an’izany izahay dia mba tsy mifantoka loatra amin’ny olana mahazo anay. Amin’izao mihitsy izahay no tena mahatsapa hoe mampiasa ny fanahiny i Jehovah mba hampaherezana anay sy hanampiana anay hilamin-tsaina, dia sarobidy be aminay izany.

Mariya Kuznetsova

Teraka: 1988 (Sharypovo, Faritanin’i Krasnoïarsk)

Mombamomba azy: Mpiasa an-trano no asany

Notezaina tao amin’ny fahamarinana. Tiany be ny nianatra momba ny faminanian’ny Baiboly. Natao batisa tamin’ny 2002

Nanambady an’i Aleksandr tamin’ny 2017

Resadresaka nifanaovana taminy

Inona ny andinin-teny tena nampahery anao?

Anisan’ny andinin-teny tiako indrindra ny Kolosianina 1:11: “Enga anie Andriamanitra hampiasa ny heriny be voninahitra, ka hanatanjaka anareo sy hanome anareo an’izay hery rehetra ilainareo! Amin’izay ho vitanareo ny hiaritra ny zava-drehetra, sady hanam-paharetana sy ho falifaly.” Hitako tamin’ny zavatra niainako hoe rehefa miantehitra tanteraka amin’i Jehovah sy miangavy azy hanohana ahy aho, dia tsy maintsy hampiany foana. Asehony amin’ny fomba samihafa hoe be fitiavana sy tsy mivadika amin’ny mpanompony tsy mivadika izy, sady mamindra fo amin’izy ireo foana.

Andrey Vyushin

Teraka: 1975 (Yaroslavl, Faritanin’i Yaroslavl)

Mombamomba azy: Notezain’ny mamany sy ny bebeny. Mpikarakara tambazotran’ordinatera no asany. Mikarakara ny mamany kilemaina izy

Nisy namany akaiky nianatra Baiboly, dia io no nampifankahalala azy tamin’ny Vavolombelon’i Jehovah. Novalian’ny mpitory ny fanontaniany. Hitany koa hoe nampihatra ny zavatra notoriny izy ireo. Natao batisa tamin’ny 1995

Nanambady an’i Anastasiya tamin’ny 2013. Manan-janaka vavitokana

Resadresaka nifanaovana taminy

Ahoana no nataonareo mba hampahery ny hafa ny zavatra niainanareo?

Nampahery be anay mivady ny fomba niatrehan’i Dennis Christensen ny fitsapana nahazo azy. Anisan’ireo nigadra voalohany tatỳ izy. Mbola nahatsapa tena hoe nisy vidiny foana anefa izy. Ny ohatra nomeny no nahatonga anay hatoky hoe ho vitanay koa izany. Misy matahotra be ny mpiara-manompo, dia rehefa mihaona amin-dry zareo izahay dia miezaka mampahery azy ireo. Teneninay koa ry zareo hoe tsy tena mampatahotra hoatran’ny fahitany azy ilay izy. Ampahatsiahivinay ny namanay mba tsy haka sary an-tsaina hoe hoatran’ny ahoana ny fanenjehana mety hitranga, amin’izay ry zareo tsy matahotra be. Azo hararaotina kosa ny fanenjehana mba hanaporofoana hoe tena manana finoana matanjaka isika.

Resy lahatra koa isika hoe afaka ny ho anisan’ireo ‘matoky an’i Jehovah sy tsy voahozongozona’, hoatran’ireo mpanompon’i Jehovah efatra ireo.—Salamo 125:1.

Zava-nitranga

13 Aprily 2021

Notazonina vonjimaika rehefa avy nosavan’ny manam-pahefana ny tranony
15 Aprily 2021

Nalefa tany am-ponja vonjimaika
14 Jolay 2021

Navoaka tany am-ponja ary tsy nahazo niala ny faritra nisy azy
9 Septambra 2022

Nanomboka notsaraina

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO