21 OKTOBRA 2021 | VAOVAO FARANY: 26 DESAMBRA 2022
ROSIA

VAOVAO FARANY: NAMPITOMBOINA NY SAZINY | Falifaly na dia Nambenana tao An-trano sy Mbola Hogadraina Ela Be Aza

HANDEFA

Vao mainka nampitomboin’ny fitsarana ambony ambaratonga fahefatra any Rosia ny sazin’ny Rahalahy Rustam Diarov sy Sergey Klikunov ary ny Rahalahy Yevgeniy Ivanov sy Olga vadiny, tamin’ny 22 Desambra 2022. Namoaka didy ny mpitsara hoe tsy mahazo miala ao Astrakhan ry zareo rehefa avy manefa ny saziny. Mbola notanana am-ponja vonjimaika izy efatra mianadahy tamin’ny fotoana namoahana an’io didy io, dia tamin’ny alalan’ny video ry zareo no nanatrika an’ilay fitsarana.

Nampakatra fitsarana ambony mantsy ny Rahalahy Rustam Diarov sy Sergey Klikunov ary ny Rahalahy Yevgeniy Ivanov sy Olga vadiny, dia nolavin’ny Fitsaram-paritr’i Astrakhan ny fangatahan-dry zareo tamin’ny 3 Martsa 2022. Mbola migadra izy efatra mianadahy amin’izao.

Zava-nitranga

25 Oktobra 2021

Nomelohin’ny Fitsaram-paritr’i Trusovskiy, any Astrakhan, higadra valo taona i Rustam sy Yevgeniy ary Sergey. I Olga vadin’i Yevgeniy indray voaheloka higadra telo taona sy tapany. Efa nigadra izy telo lahy rehefa navoaka io didy io. I Olga kosa tonga dia naiditra am-ponja vao vita ilay fitsarana
11 Jona 2020

Notanana am-ponja vonjimaika i Rustam sy Yevgeniy ary Sergey fa i Olga nambenana tao an-trano.
9 Jona 2020

Nisy miaramila 100 mahery nisava tranona Vavolombelon’i Jehovah tany Astrakhan. Tokantrano miisa 27 no nosavan-dry zareo tamin’izay. Notanana am-ponja vonjimaika i Rustam, Yevgeniy, Olga, ary Sergey.
8 Jona 2020

Nampangaina hoe mpanao heloka bevava i Rustam, Yevgeniy, Olga, ary Sergey. Nolazaina hoe mandamina sy manohana ny zavatra ataona fikambanana mampidi-doza, hono, izy telo lahy. I Olga kosa nampangaina hoe mandray anjara amin’ny zavatra ataona fikambanana mampidi-doza.

Ireo voampanga

Rustam Diarov

Teraka: 1973 (tany Samarcande, any Ouzbékistan)

Mombamomba azy: Mpitantana teatra no asan’ny mamany taloha. Nianatra tany amin’ny sekoly fianarana mampiasa saribakoly mpilalao an-tsehatra

Nanambady an’i Yelena tamin’ny 1997. Niara-nianatra Baiboly tamin’ny Vavolombelon’i Jehovah izy roa nanomboka tamin’ny 1998, dia niara-natao batisa tamin’ny 1999

Resadresaka nifanaovana taminy

Tantaran’iza ao amin’ny Baiboly no tena nampahery anao tamin’ianao nigadra?

Ny modely nomen’i Jesosy talohan’ny nahafatesany no tena hitako hoe mahasoa ahy amin’izao zavatra mahazo ahy izao. Tsy hoe nanome modely fotsiny izy hoe hoatran’ny ahoana no hatao rehefa mitory, fa modely ho antsika koa izy satria tena nahavita niaritra. [Nampahatsiahy ahy izany hoe] mila tsy mivadika amin’i Jehovah isika isan’andro, sady porofointsika foana amin’ny ataontsika hoe hoatran’ny hoe tsy manana afa-tsy androany sisa isika mba hampisehoana hoe tsy mivadika aminy.

Olga Ivanova

Teraka: 1982 (tany Volzhsky, any Volgograd)

Mombamomba azy: Nianatra nitendry angorodao tamin’ny mbola kely. Nianatra fiteny, dia lasa mpampianatra teny anglisy

Natahotra ny fahafatesana izy tamin’izy mbola ankizikely. Nihaona tamin’ny Vavolombelon’i Jehovah ny mamany, rehefa lehibebe izy. Io mamany io no nampianatra an’i Olga momba ny Baiboly. Natao batisa tamin’ny 1997 i Olga

Resadresaka nifanaovana taminy

Inona no manampy anao tsy ho kivy na dia tafasaraka amin’ny vadinao aza ianao?

Ny modely nomen’i Jehovah sy Jesosy no manampy ahy hiaritra. Nahavita nisaraka tamin’i Jesosy nandritra ny 33 taona sy tapany i Jehovah, nefa mpinamana ry zareo. Izay hahasoa ny olombelona rehetra mantsy no notadiaviny, anisan’izany aho. Ny vadiko no namako akaiky indrindra, dia malahelo be azy aho. Fa mino anefa aho hoe mbola fohy kely izao fotoana isarahanay izao raha oharina amin’ny fotoana nisarahan’i Jehovah sy Jesosy. Matoky aho hoe hahavita hiaritra an’izay rehetra mahazo antsika isika rehefa ampian’i Jehovah.

Sergey Klikunov

Teraka: 1975 (tany Astrakhan)

Mombamomba azy: Mpanao sodira no asany talohan’ny nitanana azy am-ponja vonjimaika. Niara-nianatra Baiboly izy sy Irina vadiny. Tsy nifoka sigara intsony rehefa avy nahafantatra ny torolalan’ny Baiboly. Natao batisa tamin’ny 2007. Roa vavy ny zanany. Manjono no fialam-bolin’i Sergey. Tia mitendry gitara koa izy

Resadresaka nifanaovana taminy

Inona no manampy anao tsy hivadika amin’i Jehovah amin’izao ianao migadra izao?

Vao mainka tsapako hoe tena ilaina ny mivavaka, hatramin’izay nigadrako tato izay, indrindra moa ato amin’ity toerana misy ahy ity. Efa enim-bolana aho izao no natoka-monina ato. Mafy ilay izy, dia ny vavaka no manampy ahy hiaritra. Rehefa tena mila tsy ho zakako ny mahazo ahy, dia mandohalika aho dia mamboraka ny ao am-poko amin’ilay Raintsika any an-danitra. Tonga dia tony sy milamin-tsaina aho avy eo, dia maivamaivana. Tena mahavariana ahy ny mahita ny herin’ilay Raintsika. Matoky tanteraka azy aho, dia tsy matahotra be.

Mampahery antsika ny mahalala hoe eo akaikin’ny mpanompony tsy mivadika eo foana i Jehovah, rehefa miatrika fitsapana ry zareo.—Salamo 139:5, 10.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO