3 FEBROARY 2022
ROSIA

VAOVAO FARANY: NOLAVINA NY FAMPAKARANA FITSARANA | Ampian’i Jehovah Hiaritra ny Rahalahy Aleksey Smelov

HANDEFA

Nolavin’ny Fitsarana Tampony any amin’ny Repoblikan’i Carélie ny fampakarana fitsarana nataon’ny Rahalahy Aleksey Smelov, tamin’ny 27 Septambra 2022. Tsy maintsy mandoa an’ilay lamandy àry izy.

Nomelohin’ny fitsaran’i Kondopoga any amin’ny Repoblikan’i Carélie i Aleksey, ary voasazy handoa lamandy 400 000 roubles (28 tapitrisa ariary eo ho eo).

Zava-nitranga

23 Jolay 2019

Nampangain’ny manam-pahefana ho mpanao heloka bevava i Aleksey, satria, hono, izy lohandohany ao amin’ny fikambanana ara-pivavahana iray raran’ny fanjakana sady anisan’ny mandamina ny fivoriana sy ny “fampielezan-kevitra” ataon’izy io
31 Jolay 2019

Nanao bemidina tany amin’ny trano sy toeram-piasan’ny Vavolombelon’i Jehovah 15 tany Kondopoga sy Petrozavodsk ny polisin’ny FSB. Nisy polisy mody nanao hoe mpikarakara fantson-drano niditra tao an-tranon-dry Smelov ary nanomboka nisavasava tao. Nentina tany amin’ny biraon’ny FSB teo an-toerana i Aleksey sy Irina, vadiny, mba halaina am-bavany. Nentina tany amin’ny foiben’ny FSB any Petrozavodsk i Aleksey avy eo. Nafahana izy tamin’ny 11:30 alina tany ho any, ary notenenina hoe tsy mahazo miala an’ilay faritra misy azy
7 Aogositra 2019

Nolazain’ny manam-pahefana hoe meloka i Aleksey, araka ny Andininy faha-282.2(1) ao amin’ny Lalàn’ny Federasionan’i Rosia Momba ny Heloka Bevava
9 Aprily 2020

Najanona kely ny fanadihadiana noho ny valanaretina COVID-19
8 Jona 2020

Nitohy indray ny fanadihadiana

Ilay voampanga

Aleksey Smelov

Teraka: 1974 (Kondopoga)

Mombamomba azy: Tena nahay nilomano sy nilalao hockey, tamin’izy mbola tanora. Mpanamboatra milina tao amin’ny orinasa iray mpanao taratasy no asany taloha. Injeniera amin’ny resaka fanamboarana milina efa hatramin’ny taona maro. Nihaona tamin’i Irina tamin’ny 1993. Nivady izy ireo, roa taona taorian’izay. Manan-janaka telo, ary mbola miara-mipetraka amin-dry zareo ny roa

Mbola kely dia efa niasa saina hoe inona no mitranga rehefa maty ny olona. Nianatra Baiboly tamin’ny Vavolombelon’i Jehovah ary lasa nahafantatra an’ilay fampanantenana hoe mbola hatsangana ny maty. Niezaka nampifanaraka ny fiainany tamin’ny fitsipiky ny Baiboly. Natao batisa tamin’ny 2004

Resadresaka nifanaovana taminy

Ahoana no nahitanao hoe nanampy anareo i Jehovah tao anatin’izay fotoana izay?

Vao mainka aho lasa akaiky kokoa an’i Jehovah nandritra an’ireny fitsapana ireny. Be dia be mantsy ny olana nahazo anay, nefa hitako hoe nanome vahaolana foana izy. Rehefa natao savahao, ohatra, ny tranonay dia nalain’ny polisy daholo ny fitaovana elektronika tao aminay. Ireny anefa no mba ahafahanay mahazo sakafo ara-panahy sy mivory miaraka amin’ny fiangonana. Nivavaka tamin’i Jehovah izahay mba homeny vahaolana. Vetivety dia tonga ny fanampiana avy amin’ny mpiara-manompo. Andro vitsivitsy fotsiny taorian’izay mantsy, dia nahazo telefaonina sy tablette izahay. Lasa afaka nanao teny vakina isan’andro sy namaky Baiboly indray àry izahay. Tena fitahian’i Jehovah mihitsy ilay izy.

Inona ny torohevitra mba tianao homena an’izay mbola hiatrika fanenjehana amin’ny hoavy?

Aza matahotra na inona na inona mihitsy, dia aza matahotra na iza na iza koa! Ilay Raintsika no mifehy ny zava-drehetra. (2 Tantara 16:9a) Tadidio hoe tombontsoa be ny manamasina ny anaran’i Jehovah sy manohana ny zony hitondra.

Matoky hoatran’i Aleksey isika hoe “hampiasa ny heriny” foana i Jehovah “mba hanampiana” an’izay rehetra tratran’ny fanenjehana.—2 Tantara 16:9.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO