16 DESAMBRA 2021
ROSIA

VAOVAO FARANY | Nanampy Rahalahy Dimy sy Anabavy Iray Hiaritra Fanenjehana ny Famakiana Baiboly Isan’andro

HANDEFA

Nomelohin’ny Fitsaram-paritr’i Leninski any Saransk ny Rahalahy Denis Antonov, Vladimir Atryakhin, Aleksandr Korolev, Georgiy Nikulin, sy ny Ranabavy Yelena Nikulina, ary ny Rahalahy Aleksandr Shevchuk, tamin’ny 25 Aogositra 2022. Voaheloka higadra roa taona avy i Denis sy Aleksandr Korolev ary Aleksandr Shevchuk. Voaheloka higadra efa-taona sy roa volana i Georgiy sy Yelena, ary enin-taona kosa i Vladimir. Mihatra avy hatrany ny sazin’izy ireo.

Zava-nitranga

11 Jona 2021

Nanomboka ny fitsarana voalohany tao amin’ny Fitsaram-paritr’i Leninski any Saransk
2 Aprily 2021

Nampangaina ho nandray anjara sy nitaona olona handray anjara tamin’ny asa ataon’ny fikambanana mampidi-doza i Yelena
31 Martsa 2021

Nampangaina ho nandamina asa ataon’ny fikambanana mampidi-doza i Vladimir
2 Jolay 2019

Nafahana i Aleksandr Shevchuk sy Georgiy rehefa avy notanana am-ponja vonjimaika ary tsy navela hivoaka ny faritra misy azy
28 Martsa 2019

Nafahana i Vladimir rehefa avy notanana am-ponja vonjimaika ary tsy navela hivoaka ny faritra misy azy
8 Febroary 2019

Notanana am-ponja vonjimaika i Aleksandr Shevchuk sy Vladimir ary Georgiy
4 Febroary 2019

Nampangain’ny FSB ho mpanao heloka bevava ireo rahalahy dimy sy Yelena satria hoe nandamina asa ataon’ny fikambanana mampidi-doza

Ireo voampanga

Denis Antonov

Teraka: 1976 (Syktyvkar, Repoblikan’i Komi)

Mombamomba azy: Nifindrafindra trano matetika izy tamin’ny mbola kely, noho ny asan’ny dadany. Nianatra ho elektrisianina sy mpikojakoja fitaovana any amin’ny toeram-pitrandrahana

Elektrisianina tamin’ny toeram-pitrandrahana nandritra ny dimy taona. Tia maka sary sy milalao échecs

Nanana fanontaniana be dia be momba an’Andriamanitra, ary niezaka hahazo ny zavatra resahina any anaty boky ara-pivavahana sy ao amin’ny Baiboly. Nanana namana nianatra Baiboly tamin’ny Vavolombelon’i Jehovah, tamin’izy miaramila. Nanohina ny fony ny nahafantatra hoe Jehovah no anaran’Andriamanitra sy ny nahita hoe tena marina ny zavatra resahin’ny Baiboly. Natao batisa ary lasa Vavolombelon’i Jehovah tamin’ny 1998. Nanambady an’i Olga tamin’ny 2015

Resadresaka nifanaovana taminy

Inona no andinin-teny nanampy anao ho be herim-po sy hiaritra?

Anisan’ny andinin-teny tiako indrindra ny Genesisy 15:1 … Tena tiako io andininy io satria io no naverimberiko tao an-tsaiko tamin’ilay alina nahatongavan’ny polisin’ny FSB tao aminay sy nisamborany ahy mba hatao famotorana. … Nampitony ahy ilay izy sady nanampy ahy tsy hivadika.

Vladimir Atryakhin

Teraka: 1987 (Rozhdestveno, Repoblikan’i Mordovie)

Mombamomba azy: Notezaina tao amin’ny fianakaviana tsy misy afa-tsy ray na reny. Manana zandry lahy. Tia milalao baolina kitra sy voley ary hockey. Mpamorona programa amin’ny ordinatera. Mpikarakara tambazotran’ordinatera no asany

Mbola mpianatra izy dia efa liana tamin’ny Baiboly. Natao batisa ary lasa Vavolombelon’i Jehovah tamin’ny 2004. Nanambady an’i Mariya tamin’ny 2009. Manan-janaka roa mbola kely izy ireo. Sivy volana ny iray tamin’izy nosamborina, ary roa taona ny iray.

Resadresaka nifanaovana taminy

Ahoana no nahatonga ny fifandraisanao tamin’i Jehovah hihamafy nandritra an’ilay fitsapana?

Tena nalahelo sy kivy be aho rehefa nosarahina tamin’ny fianakaviako. Nisy mpiambina iray izay nameno taratasy, tamin’izaho nentina tany am-ponja. Nanontany ahy izy hoe fa maninona aho no tazonin’ny manam-pahefana. Dia noresahiko taminy hoe nanahy [momba ny fianakaviako] aho. Tsy nisalasala izy niteny tamiko hoe: “Ao fa tsy hanary an-dry zareo ny mpiara-mivavaka aminareo e!” … Azony antoka hoe hokarakarain’ny mpiara-manompo amiko ny fianakaviako … Hoatran’ny hoe nampiasa an’iny mpiambina iny i Jehovah mba hampahatsiahy ahy hoe afaka miantehitra aminy aho. Niresaka tamin’ny vadiko aho rehefa avy nafahana, dia tena nahavariana ahy ny fomba nikarakaran’i Jehovah ny fianakaviako tamin’ny alalan’ny mpiara-manompo.

Aleksandr Korolev

Teraka: 1978 (Zemetchino, Faritanin’i Penza)

Mombamomba azy: Nihalehibe tsy nisy dada. Tia nanjono sy nilalao baolina kitra tamin’ny mbola kely. Mpamily kamiao sy mpikojakoja milina no asany taorian’ny fianarany teny amin’ny lise. Efa niandry ondry sy niompy omby tao amin’ny toeram-piompiana iray koa. Mpandrafitra no asany izao

Nanampy azy hahita ny valin’ny fanontaniana nampiady saina azy nandritra ny taona maro ny fianarana Baiboly tamin’ny Vavolombelon’i Jehovah. Natao batisa tamin’ny 1998. Nanambady an’i Natalya tamin’ny 2006. Manan-janakalahy iray i Natalya, dia miara-mitaiza azy izy sy Aleksandr

Resadresaka nifanaovana taminy

Nahoana no mbola manampy anao ny manatrika fivoriana tsy tapaka?

Tena manampy be ahy ny famakiana Baiboly isan-kerinandro amin’ny fivoriana andavanandro. Rehefa mandinika ny ohatry ny mpanompon’i Jehovah fahiny aho, dia manatanjaka ahy ny herim-po sy ny finoana nasehon’izy ireo. Manampy ahy ho tsara fanahy koa ny soso-kevitra azontsika any am-pivoriana. Mivavaka foana aho mba hahafantatra hoe ahoana no itondrako tsara ny tenako, dia ahoana no ataoko mba tsy hanalako baraka ny anaran’i Jehovah mihitsy.

Georgiy Nikulin

Teraka: 1963 (Rovenky, Ukraine)

Mombamomba azy: Nianatra ho mpamily sy mpanamboatra fiara simba. Manana fahaizana momba ny famoronana sary amin’ny ordinatera, fanamboarana radio mandeha amin’ny zanabolana, fikojakojana fitaovana, ary fanaovana sary sokitra amin’ny hazo.

Efa hatramin’izay izy no tia mianatra zava-baovao. Tena nahaliana azy ny nahafantatra ny niandohan’ny olombelona. Nianatra Baiboly tamin’ny Vavolombelon’i Jehovah dia lasa nahita ny valiny mahafa-po tamin’ny fanontaniany

Resadresaka nifanaovana taminy

Inona no nanampy anao hanana finoana sy herim-po foana tany am-ponja?

Ny fianarana ny Soratra Masina sy ny fisaintsainana andinin-teny ao amin’ny Baiboly no nanampy ahy. Be dia be mantsy ny mpanompon’i Jehovah tena nanana finoana sy herim-po resahina ao [amin’ny Baiboly]. Tena faly aho hoe afaka manahaka an-dry zareo.

Fantatsika hoe mampiasa lainga be i Satana mba hahatonga antsika tsy hahavita hiaritra. Haintsika koa hoe tsy tokony horaisintsika am-po daholo izay lainga sy fanaratsiana momba antsika, fa tokony hekentsika kosa hoe zavatra efa ampoizintsika izany.

Yelena Nikulina

Teraka: 1968 (Monastyrskoe, Repoblikan’i Mordovie)

Mombamomba azy: Tia nikorisa tamin’ny ranomandry sy nanjaitra tamin’izy mbola kely. Niofana ho mpanjaitra sy ho mpamorona didin’akanjo. Nifindra tany Saransk sy tany Tolyatti mba hitady asa. Efa mpanjaitra taloha fa mpanadio no asany amin’izao

Nanambady an’i Georgiy tamin’ny 2016. Nanomboka nianatra Baiboly izy roa. Nianarany fa tsy hoe tsy miraharaha ny olona nijaly i Jehovah. Takany tsara kosa ny manjo azy ireny ary tena tiany koa ry zareo. Natao batisa tamin’ny 2017, ary lasa Vavolombelon’i Jehovah

Resadresaka nifanaovana taminy

Inona no soa noraisinao avy tamin’ny fanampian’ny rahalahy sy anabavy?

Nirehitra ny tranonay, herintaona taorian’ny fisavana nataon’ny [polisy], dia tsy nanan-kialofana izahay. … Nikarakara anay anefa ny anadahy sy rahavavy, dia tena variana ny havako nahita an’izany. Lasa mampihatra an’izay lazain’ny Baiboly ry zareo amin’izao sady [lasa mihamanakaiky an’i Jehovah].

Aleksandr Shevchuk

Teraka: 1989 (Piatigorsk , Faritanin’i Stavropol)

Mombamomba azy: Niofana ho mpanao zaridaina sy mpanao trano. Nifindra tany Saransk tatỳ aorina. Mpanamboatra fanaka no asany taloha. Tia milalao baskety sy pingipongy

Samy natao sesitany tany Siberia na ny dadabe sy beben’ny dadany na ny dadabe sy beben’ny mamany satria hoe Vavolombelon’i Jehovah. Samy teraka tany Siberia ny ray aman-dreniny

Natao batisa tamin’ny 2006. Nanao fanompoana sivily mba ho solon’ny fanaovana miaramila

Resadresaka nifanaovana taminy

Inona no fahazarana ara-panahy nanampy anao nandritra ny efa-bolana nigadranao?

Miara-manao teny vakina foana izahay mianakavy isa-maraina alohan’ny sakafo, hatramin’izaho mbola kely. Lasa fahazarako foana koa izay, dia nezahiko natao foana na dia tany am-ponja aza aho. Mbola tsy nanana Baiboly aho tamin’ny voalohany, dia niezaka nitadidy andinin-teny na tantarana mpanompon’i Jehovah taloha, dia ireny no nosaintsainiko. Ny Isaia 40:26-31 no tonga tao an-tsaiko voalohany. Anisan’ny andinin-teny tiako indrindra io. Manampy ahy ilay izy tsy hanadino hoe i Jehovah no Mpamorona dia manana hery matanjaka be izy. Ampiasainy io heriny io mba hanampiana antsika olombelona, izany hoe hanatanjahana antsika rehefa ao anatin’ny sarotra isika.

Matoky isika fa ho tia sy tsy hivadika amin’ny rahalahy sy anabavintsika miaritra fanenjehana any Rosia i Jehovah sady hitana ny teniny amin-dry zareo foana, satria ry zareo matoky azy foana.—Genesisy 32:10.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO