2 FEBROARY 2022
ROSIA

VAOVAO FARANY | Tsy Kivy ny Rahalahy Andrey Vlasov Satria Miezaka ny ho Be Atao Foana

HANDEFA

Nolavin’ny Fitsaram-paritr’i Kemerovo ny fampakarana fitsarana nataon’ny Rahalahy Andrey Vlasov, tamin’ny 26 Jolay 2022. Mbola migadra àry izy.

Namoaka didy momba an’i Andrey ny fitsaram-paritry ny tanànan’i Prokopievsk, tamin’ny 23 Mey 2022. Nilaza ny fitsarana fa meloka izy ary voasazy higadra fito taona. Tonga dia mihatra io saziny io.

Zava-nitranga

2 Jolay 2020

Nampangaina ho mpanao heloka bevava i Andrey. Nolazaina fa mandamina ny zavatra ataon’ny fikambanana iray mampidi-doza izy
12 Jolay 2020

Nataon’ny polisin’ny FSB savahao ny tranon’i Andrey sy ny toeram-piasany. Nalain’izy ireo ny fitaovana elektronika sy ny Baiboly. Notanana am-ponja vonjimaika izy nandritra ny fakana am-bavany an’i Nataliya, vadiny
14 Jolay 2020

Nafahana izy ary nambenana tao an-tranony
9 Jona 2021

Nanomboka ny fitsarana azy

Ilay voampanga

Andrey Vlasov

Teraka: 1968 (Prokopievsk, Faritr’i Kemerovo)

Mombamomba azy: Tia manao sary sy tia mozika. Mpaka sary no asany

Nianatra Baiboly tamin’ny zandriny lahy. Natao batisa ary lasa Vavolombelon’i Jehovah tamin’ny 1991. Nanambady an’i Nataliya tamin’ny 2003

Resadresaka nifanaovana taminy

Ahoana no ataonao mba tsy ho kivy?

Manao zavatra isan-karazany aho mandritra ny tontolo andro, dia izany no manampy ahy tsy ho kivy. Mamaky Baiboly aho, manomana fivoriana, mijery videon’ny fandaminana, manao sary hoso-doko, ary mihaino boky noraisim-peo. Manamboamboatra zavatra ao an-trano koa aho, dia manao échecs sy kilalao hafa mampiasa saina, ary manao peta-kofehy

Nahoana no mampahery anao ny ataon’ireo rahalahy sy anabavy?

Miteny amiko ry zareo hoe mivavaka ho an’ahy. Mampahery an-dry zareo koa, hono, ny finoako, dia tsy te hivadika amin’i Jehovah hoatran’ahy ry zareo. Tena mahazo hery aho rehefa maheno an’izany.

Inona ny andinin-teny lasa nisy dikany be taminao, dia ahoana no nanampian’izy ireny anao?

Ny 1 Petera 4:12-14 no nanampy anay mivady hiatrika ny zavatra nahazo anay, na tamin’ny tranonay natao savahao izany, na tamin’izahay nalaina am-bavany, na tamin’izahay nivezivezy nankeny amin’ny fitsarana. ... Nosoratanay ireo andininy ireo dia nataonay amin’ny toerana talaky maso. Mbola ambenana ato an-trano aho hatramin’izao, dia misaintsaina an’ireo foana izahay mivady, amin’izay tadidinay hoe tsy handao anay mihitsy i Jehovah. Nampahery ahy koa ny Isaia 40:10-13 tamin’izaho notanana am-ponja vonjimaika. Nilamin-tsaina be aho nandritra an’ireo andro vitsivitsy nijanonako tany, ka na dia nitebiteby aza ny foko dia hoatran’ny hoe nohosorana menaka mampitony.

Tena tombontsoa ho antsika ny hoe mpiara-miasa amin’i Andrey sy ireo rahalahy sy anabavy any Rosia sy Crimée. Falifaly foana izy ireo sady tsy mivadika mihitsy.—2 Korintianina 1:24.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO