5 NOVAMBRA 2021
ROSIA

VAOVAO FARANY | Tsy Mora Kivy ny Rahalahy Aleksey Yershov Satria Zatra Manao Zavatra Ara-panahy

HANDEFA

Novan’ny Fitsaram-paritra any Tomsk ny didim-pitsarana momba ny Rahalahy Aleksey Yershov, tamin’ny 7 Aprily 2022. Lasa sazy mihantona telo taona ilay izy. Tonga izy dia navoaka ny fonja.

Nomelohin’ny Fitsaram-paritr’i Severskiy, any Tomsk, i Aleksey, tamin’ny 19 Janoary 2022. Voaheloka higadra telo taona izy, ary tonga dia mihatra ilay sazy.

Zava-nitranga

22 Jona 2021

Nampakarina tany amin’ny Fitsaram-paritr’i Severskiy, any Tomsk, ilay raharaha
30 Martsa 2021

Video nalain’ny olona iray mody nianatra Baiboly nandritra ny herintaona mahery no porofo nentina nanamelohana azy
14 Jolay 2020

Nanao bemidina tao an-tranon’i Aleksey ny FSB (polisy miafina rosianina) sy ny Komity Mpanao Famotorana. Nataon-dry zareo savahao nandritra ny adiny fito ny tranony. Nalain-dry zareo ny karta fakana vola, fitaovana elektronika, Baiboly, pasipaoro, ary ny fitaovana ahafahana manao Internet (routeur Wi-Fi)

Ilay voampanga

Aleksey Yershov

Teraka: 1953 (tany Seversk, any Tomsk)

Mombamomba azy: Maty ny dadan’i Aleksey tamin’ilay taona nahaterahany. Ny mamany irery no nitaiza azy. Injeniera izy ary nampianatra tao amina sekoly fianarana asa

Nanambady an’i Lyudmila izy tamin’ny 1976. Manan-janaka roa efa lehibe

Lasa te hianatra Baiboly i Aleksey rehefa nisy mpianany iray nanasa azy hanatrika ny fivorian’ny Vavolombelon’i Jehovah. Tiany ny torohevitra azo ampiharina ao amin’ny Baiboly sy ny zavatra hataon’ilay Fanjakana. Natao batisa izy tamin’ny 1994, dia lasa Vavolombelon’i Jehovah

Resadresaka nifanaovana taminy

Inona no manampy anao hifandray kokoa amin’i Jehovah mandritra an’izao fitsapana izao?

Lasa miara-mivavaka matetika kokoa izahay mivady. Hitako hoe tsy hahavita hiatrika an’ity olana ity aho raha tsy eo i Jehovah. Miezaka àry aho mba haharaka tsara ny fahazarana ara-panahy efa nananako, izany hoe mamaky Baiboly isan’andro sy mianatra samirery. Miara-manao teny vakina izahay roa isa-maraina, dia miara-mivavaka amin’i Jehovah.

Ahoana no ataonao mba tsy ho kivy intsony?

Rehefa kivy aho, dia ny fianarana samirery no manampy ahy. Misaintsaina ny modely nomen’ny mpanompon’i Jehovah nanam-pinoana taloha aho. Be dia be mantsy ny tantara ao amin’ny Baiboly manasongadina hoe tena ilaina ny manana fo tony sy matoky an’i Jehovah. Rehefa misaintsaina an’ireny aho, dia miezaka mamantatra hoe inona no nanampy ny mpanompon’Andriamanitra ho tony. Izao, ohatra, ny tenin-dry zareo ao amin’ny Asan’ny Apostoly 5:29: “Andriamanitra no mpitondra anay ka izy no tsy maintsy ankatoavinay, fa tsy olona.” Tsy nihorohoro ny apostoly rehefa nandidy an-dry zareo ny Fitsarana Avo Jiosy mba tsy hitory intsony. Tsy natahotra ry zareo na dia nokaravasina aza. Fantatry ny apostoly mantsy hoe nanampy an-dry zareo i Jehovah, ary nahafaly azy ny nataon-dry zareo.

Mbola hamaky Baiboly isan’andro sy hivavaka foana ny rahalahy sy anabavintsika any Rosia satria hampahery sy hampionona an-dry zareo foana izany. Manome toky antsika ny Salamo 9:9 hoe: “Ho fialofana azo antoka i Jehovah ho an’izay ampahorina, dia fialofana azo antoka amin’ny fotoan-tsarotra.”

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO