20 MEY 2022 | VAOVAO FARANY: 17 OKTOBRA 2023
ROSIA

VAOVAO FARANY: VOAHELOKA HIGADRA IREO RAHALAHY | Mahavita Miaritra Fanenjehana Izy Ireo Noho ny Fanampian’i Jehovah

HANDEFA

Nomelohin’ny Fitsaram-paritr’i Sovietskiy, ao amin’ny tanànan’i Oriol higadra enin-taona avy ny Rahalahy Vladimir Melnik sy Vladimir Piskarev ary Artur Putintsev. Efa tany am-ponja ireo rahalahy telo ireo nanomboka tamin’ny Desambra 2020, dia mbola hotazonina any ry zareo.

Zava-nitranga

8 Desambra 2020

Nampangaina ho mpanao heloka bevava ny Rahalahy Melnik sy Piskarev ary Putintsev
9 Desambra 2020

Nataon’ny polisy savahao ny tranon’ny fianakaviana Vavolombelon’i Jehovah valo tany Oriol, ary anisan’izany ny an’ireo rahalahy telo ireo. Notazonina vonjimaika tany amin’ny toerana iray izy ireo avy eo
11 Desambra 2020

Notanana am-ponja vonjimaika ny Rahalahy Melnik sy Piskarev
14 Desambra 2020

Notanana am-ponja vonjimaika ny Rahalahy Putintsev
19 Janoary 2021

Nilazana ny manam-pahefana hoe marary ny Rahalahy Piskarev ary mila fitsaboana maika, nefa tsy navela ho any amin’ny dokotera sy homena fanafody
21 Janoary 2021

Navela handray ny fanafody naterin’ny vadiny ny Rahalahy Piskarev, saingy mbola tsy nahazo nankany amin’ny dokotera ihany
24 Jona 2021

Nentina tany amin’ny hopitaly ny Rahalahy Piskarev, ary hita hoe tapaka lalan-dra. Mbola naverina tany am-ponja indray anefa izy avy eo
29 Oktobra 2021

Nampangaina izy telo lahy hoe nandamina ny zavatra ataon’ny fikambanana iray mampidi-doza
31 Janoary 2022

Nanomboka ny fitsarana azy ireo

Ireo voampanga

Vladimir Melnik

Teraka: 1965 (Donetsk, Ukraine)

Mombamomba azy: Miaramila taloha. Injeniera no asany tatỳ aoriana

Nanambady an’i Irina tamin’ny 1987. Manan-janaka telo vavy. Nanan-janaka lahy fa efa maty tamin’ny 1991

Tsy nino an’Andriamanitra taloha. Lasa liana tamin’ny Baiboly izy mivady rehefa nianatra momba ny fiainan’i Jesosy. Natao batisa tamin’ny 1992

Resadresaka nifanaovana tamin’i Irina, vadin’i Vladimir a

Ahoana no ahitana hoe miezaka manampy ny hafa i Vladimir na dia any am-ponja aza?

Mbola manome hevitra hodinihinay efa-mianaka amin’ny Fotoam-pivavahan’ny Fianakaviana foana i Vladimir hatramin’izao [rehefa manoratra ho anay]. Matetika, ohatra, izahay no anaovany tononkalo, fanoharana, sarin-teny, ankamantatra, kilalaon-tsaina, na omeny andinin-teny avy ao amin’ny Baiboly.

Nisy gadra iray mihitsy aza nampianariny Baiboly. ... Efa nafindra any amin’ny fonja hafa izao io tovolahy io, dia hozy i Vladimir hoe miresaka ny zavatra nianarany amin’ireo voafonja any, hono, izy izao.

Vladimir Piskarev

Teraka: 1956 (Karpinsk, Faritr’i Sverdlovsk)

Mombamomba azy: Injeniera no asany. Nanambady an’i Tatyana tamin’ny 1976. Manan-janaka mianadahy. Lasa te hianatra Baiboly tamin’ny Vavolombelon’i Jehovah izy mivady rehefa nahalala ny marina momba an’i Jesosy. Natao batisa tamin’ny 1995

Resadresaka nifanaovana tamin’i Tatyana, vadin’i Vladimir b

Inona no manampy ny vadinao hiaritra amin’izao izy any am-ponja izao?

Faly be i Vladimir rehefa sendra olona be fanontaniana. Raisiny ho fitahiana ilay izy sady mampahery be an’azy. “Mahafinaritra erỳ”, hozy izy, “ilay hoe be atao amin’ny asan’ny Tompo, na dia any am-pigadrana aza!” Matetika ny vadiko no manao hiran’ilay Fanjakana, na aiza na aiza misy azy. Ilay hoe “Miareta fa Aza Kivy” iny no hira tena tiany. Vao mainka ilay izy manatanjaka ny finoany, sady manampy azy tsy hivadika amin’i Jehovah. Efa im-be dia be izy no nampiasa teny avy ao amin’io hira io rehefa manoratra ho an’ahy: “Miareta na dia maro/Ny olana mianjady./Jehovah mahatsiaro,/Miareta hatramy faran’ilay ady.”

Artur Putintsev

Teraka: 1970 (Chita, Faritanin’i Trans-Baikal)

Mombamomba azy: Enina mianadahy ry zareo no mpiray tam-po, ary izy no lahimatoa. Asa efa nataony: Elektrisianina, mpamboly sy mpiompy, ary mpitondra taxi. Nanambady an’i Lyudmila tamin’ny 1993. Natao batisa tamin’ny 2005

Resadresaka nifanaovana tamin’i Lyudmila, vadin’i Artur c

Nisy fotoana ve tena nahatsapanao hoe nanampy anao i Jehovah?

Tamin’ny vadiko nosamborina sy nampidirina am-ponja, dia nalain’ny mpanao famotorana daholo ny fitaovana elektronikanay rehetra, hatramin’ny telefaonina. Izaho irery sisa no teo [sady tsy afaka niantso an’iza na iza]. Kivy be aho dia nangataka fanampiana tamin’i Jehovah. Nivavaka aho hoe mba ampio aho hahita fomba hiresahana amin’ny mpiara-manompo, amin’izay mba azoko tantaraina amin-dry zareo ny zava-nitranga. Vao lasa ilay fiara nitondra an’i Artur, dia nisy mpiara-manompo tonga. Nampahery ahy ry zareo sady nanome telefaonina an’ahy. Tsy nanary ahy mihitsy ry zareo tamin’iny taona lasa iny, ary na hatramin’izao aza dia mbola mikarakara ahy foana ry zareo. Fantatro hoe mamaly vavaka foana i Jehovah amin’ny fotoana mety, sady azony tsara ny fihetseham-pontsika.

Marina fa mbola tafasaraka aloha izao ireo fianakaviana ireo. Mampahery antsika anefa ny mahalala hoe tsy hisy hahavita hampisaraka azy ireo amin’i Jehovah, fa hokarakarainy sy harovany foana izy ireo.—Romanina 8:38, 39.

a b c Mbola tany am-ponja niandry ny fitsarana azy ny Rahalahy Melnik sy Piskarev ary Putintsev tamin’ny fotoana nanoratana an’ity lahatsoratra ity, ka tsy nisy fahafahana hiresaka tamin’izy ireo.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO