26 JOLAY 2023 | VAOVAO FARANY: 20 DESAMBRA 2023
ROSIA

VAOVAO FARANY: VOAHELOKA ILAY ANABAVY | ‘Eo Akaikiko eo Foana i Jehovah’

HANDEFA

Nomelohin’ny Fitsaram-paritr’i Dimitrovskiy any Kostroma ny Ranabavy Valentina Samus, ny 19 Desambra 2023, dia nomena sazy mihantona enina taona. Tsy voatery miditra am-ponja aloha izy amin’izao.

Ilay voampanga

Valentina Samus

Teraka: 1949 (Kostroma, Faritr’i Kostroma)

Mombamomba azy: Mpitsabo mpanampy no asany taloha. Efa misotro ronono

Nanambady an’i Ivan tamin’ny 1970. Nitaiza zanaka mianadahy izy mivady

Nivavaka tamin’Andriamanitra mba hampiany hahafantatra azy. Nihaona tamin’ny Vavolombelon’i Jehovah taoriana kelin’izay dia nanomboka nianatra Baiboly. Natao batisa tamin’ny 2007

Resadresaka nifanaovana taminy

Fa maninona ianao no vao mainka lasa akaiky kokoa an’i Jehovah amin’izao zava-tsarotra iainanao izao?

Vao mainka aho izao mino hoe hanampy ahy foana i Jehovah, dia tsy hiova mihitsy izy. Dadako i Jehovah, dia eo akaikiko eo foana izy. Imbetsaka aho no efa nahatsapa hoe rehefa avy nivavaka taminy dia tsy natahotra sy nanahy be intsony. Azoko resahina amin’i Jehovah daholo ny zava-drehetra, dia hihaino ahy foana izy. Matoky koa aho hoe matoa ny zavatra iray avelan’i Jehovah hitranga dia misy soa horaisiko avy amin’ilay izy. Mahatonga ahy lasa tsy te hivadika aminy izany, na inon-kidona na inon-kihatra. Mbola falifaly manompo an’i Jehovah foana ny mpanompony, na dia enjehina aza. Porofoin’izany fa omen’i Jehovah hery isika dia mahavita tsy mivadika. Mangataka amin’i Jehovah foana aho mba hanampy ahy hanana finoana matanjaka foana. Mangataka aminy koa aho mba tsy hihena mihitsy ny fitiavako azy fa vao mainka hitombo hitombo foana.

Mampionona antsika ny mahafantatra fa afaka miantehitra amin’i Jehovah isika na inona na inona fitsapana mahazo antsika, ary afaka matoky fa “tsy misy vatolampy tahaka ny Andriamanitsika.”—1 Samoela 2:2.

Zava-nitranga

17 Febroary 2022

Nosokafana ny raharaham-pitsarana iampagana azy ho mpanao heloka bevava
15 Martsa 2022

Nosavana ny tranony
15 Desambra 2022

Voampanga dia nofehezina ny zavatra azony natao
24 Martsa 2023

Nanomboka ny fitsarana

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO