21 DESAMBRA 2021 | VAOVAO FARANY: 24 JANOARY 2024
ROSIA

VAOVAO FARANY: VOAHELOKA ILAY ANABAVY | Matanja-tsaina ny Ranabavy Yelena Menchikova Satria Mivavaka Amin’ilay Tena Namany sy Mahita ny Modely Omen’ny Hafa

HANDEFA

Nomen’ny fitsarana any Cherkessk, any amin’ny Repoblikan’i Karachayevo-Circassian sazy mihantona efa-taona sy tapany ny Ranabavy Yelena Menchikova tamin’ny 23 Janoary 2024. Mbola tsy voatery migadra izy izany aloha amin’izao.

Nofoanan’ny fitsarana ambony ambaratonga fahadimy ny didim-pitsarana momba ny Ranabavy Yelena Menchikova, tamin’ny 5 Desambra 2022. Haverina hotsaraina indray izy izany izao.

Zava-nitranga

15 Desambra 2021

Nomen’ny Fitsaram-paritr’i Cherkessk, any amin’ny Repoblikan’i Karachayevo-Circassian, sazy mihantona dimy taona i Yelena
9 Jona 2021

Nanomboka notsaraina izy
9 Martsa 2021

Niampanga an’i Yelena fanindroany ny mpanao famotorana. Nolazaina hoe “manao teti-dratsy”, hono, izy mba hampirisihana olona handray anjara amin’ny zavatra ataona fikambanana mampidi-doza
10 Febroary 2021

Nolavin’ny mpanao famotorana ny fangatahan’i Yelena hoe hotsoahana ny fitoriana azy. Nampiasa andinin-teny tao amin’ny Baiboly mantsy izy rehefa nanazava hoe inona no nataony. Nolazain’ilay mpanao famotorana hoe ilay izy mampiasa andinin-teny ao amin’ny Baiboly mihitsy no vao mainka manaporofo hoe “heloka bevava” ny zavatra ataony
13 Novambra 2020

Nanomboka natao famotorana izy satria nihira ho an’i Jehovah sady nivavaka taminy
12 Novambra 2020

Nosavan’ny manam-pahefana fanindroany ny tranon’i Yelena
16 Desambra 2019

Nosavan’ny FSB any Cherkessk ny tranon’ny fianakaviana folo Vavolombelon’i Jehovah, anisan’izany ny tranon’i Yelena

Ilay voampanga

Yelena Menchikova

Teraka: 1964 (tany Zaporzhye, any Ukraine)

Mombamomba azy: Nipetraka tany amin’ny trano fitaizana zaza kamboty mandra-pahalehibeny. Niasa tao amina toerana mpamokatra angovo niokleary, tamin’ilay izy naorina. Nankarary azy ny niasa tao. Lasa mpanao mari-trano izy nanomboka tamin’ny 2003

Tsy nino an’Andriamanitra, fa rehefa nianatra Baiboly tamin’ny Vavolombelon’i Jehovah, dia lasa resy lahatra hoe nisy namorona izao rehetra izao sady tena misy antony tsara matoa izy namorona ny tany. Natao batisa tamin’ny 1995. Tia mandeha an-tongotra any ambanivohitra koa izy sady tia manao sary

Resadresaka nifanaovana taminy

Hitanao hoe nanampy anao hifandray kokoa tamin’i Jehovah ve ny vavaka? Hazavao hoe.

Manararaotra mivavaka ela be aho rehefa mitsangantsangana any amin’ny toerana feno zavaboary. [Tiako be ny manao an’izany.] ... Nianatra namboraka ny tao am-poko tamin’i Jehovah aho. Niezaka aho hoe tsy hisalasala mihitsy fa hitsotra aminy an’izay rehetra any an-tsaiko sy izay tsapako ao am-poko ary izay mampanahy ahy. Ataon’i Jehovah foana avy eo izay hampilamin-tsaina sy hampitony ahy, dia lasa tsapako hoe mihakaiky azy foana aho.

I Jehovah no namako akaiky indrindra hatramin’izao. Tonga dia ampiany foana aho isaky ny misy zavatra mahazo ahy. Fantatro hoe azoko ivavahana foana izy, na amin’ny mora na amin’ny sarotra.

Azo antoka hoe mahasoa anao ny modely navelan’ireo vehivavy mpanompon’i Jehovah ao amin’ny Baiboly. Azonao hazavaina ve?

Misy vehivavy maromaro tena azoko atao modely ao, ohatra hoe i Saraha, Rahaba, Hana, ary Maria. ... Mafy ny niaretan-dry zareo, nefa tena nataony izay hananana herim-po. Niady mafy niaro ny finoana sy tsy nivadika koa ry zareo, dia novalian’i Jehovah soa.

Enga anie i Jehovah ka hampionona sy hanatanjaka ny sain’i Yelena foana. Tsy i Yelena ihany fa izay mpanompon’i Jehovah rehetra miatrika fitsapana koa.—Salamo 119:49, 50.

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO