4 JANOARY 2023 | VAOVAO FARANY: 17 NOVAMBRA 2023
ROSIA

VAOVAO FARANY: VOAHELOKA ILAY ANABAVY | Tapa-kevitra Hanampy ny Hafa Izy na dia Enjehina Aza

HANDEFA

Nomelohin’ny Fitsaram-paritr’i Kuznetsk any Novokouznetsk ny Ranabavy Tatyana Sushilnikova tamin’ny 15 Novambra 2023, dia nomena sazy mihantona efa-taona. Mbola tsy migadra aloha izy izao.

Ilay voampanga

Tatyana Sushilnikova

Teraka: 1959 (Korkino, Faritanin’i Tcheliabinsk)

Mombamomba azy: Injeniera tamin’ny resaka aro loza sy lehiben’ny mpiasa tao amin’ny orinasa iray. Nanambady an’i Sergey tamin’ny 1979. Niteraka roa vavy ry zareo

Havany anankiray no nampifankahalala azy tamin’ny Vavolombelon’i Jehovah. Niara-nianatra Baiboly izy sy ny vadiny. Nahafinaritra azy ireo ny fifankatiavan’ny Vavolombelona. Niara-natao batisa izy mivady tamin’ny 1996

Resadresaka nifanaovana taminy

Nahoana no manatanjaka anao ny modely omen’ny hafa?

Tena nanampy ahy ny namaky lahatsoratra momba an’ireo rahalahy sy anabavy nosamborina sy notsaraina. Fantatro avy tamin’ireny tatitra ireny hoe inona no miandry ahy, dia tsy natahotra be aho rehefa tonga ny anjarako. Mahafinaritra koa ny modelin’ireo nalefa tany am-ponja. Na dia miatrika zavatra mahakivy aza izy ireo, dia mbola mahavita manoratra taratasy mampahery ho an’ireo rahalahy sy anabavy etỳ ivelany ihany.

Tena nampahery be ahy koa i Sergey, vadiko. Natoky an’i Jehovah sy tapa-kevitra ny tsy hivadika aminy mihitsy izy rehefa notsaraina. Tsy navelany hahakivy azy koa ny tahotra an’izay mety hitranga. Ny mpiara-manompo aloha no noeritreretiny voalohany, dia niezaka nitady fomba hampaherezana azy ireo izy. Tapa-kevitra koa aho hoe hanampy an’ireo manodidina ahy araka izay vitako. Lasa manana fiainana mahafa-po sy tsy mifantoka be loatra amin’ny olana mahazo ahy aho rehefa be atao hoatr’izany.

Hoatran’i Tatyana, dia mampahery antsika koa ny modelin’ireo “vavolombelona be dia be toy ny rahona” izay mahavita miaritra fanenjehana noho ny fanampian’i Jehovah.—Hebreo 12:1.

Zava-nitranga

8 Jona 2021

Nisy polisy mitam-basy avy ao amin’ny FSB nanao bemidina tany amin’ny trano telo an’ny Vavolombelon’i Jehovah any Novokouznetsk. Nalaina am-bavany nandritra ny adiny telo i Tatyana sy Sergey, vadiny
20 Jona 2022

Nampangaina ho mpanao heloka bevava. Nolazaina fa niresaka zavatra misy ifandraisany amin’ny fivavahana sy nandray anjara tamin’ireo fivoriana
22 Jolay 2022

Nampangaina tamin’ny fomba ofisialy
27 Septambra 2022

Nanomboka ny fitsarana azy. Naverin’ny mpitsara tany amin’ny mpampanoa lalàna ilay raharaha, satria nisy tsy nety ny fomba nandaminana an’ilay izy
16 Novambra 2022

Nitohy indray ny fitsarana

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO