25 APRILY 2023 | VAOVAO FARANY: 23 OKTOBRA 2023
ROSIA

VAOVAO FARANY: VOAHELOKA ILAY RAHALAHY | “Falifaly Aho, dia Izay no Manome Hery Ahy Hanohy Hanompo An’i Jehovah”

HANDEFA

Nomelohin’ny Fitsaram-paritr’i Zavodski any Kemerovo ny Rahalahy Vladimir Baykalov, tamin’ny 23 Oktobra 2023. Sazy mihantona enin-taona no nomena azy. Tsy voatery miditra am-ponja aloha izy izao.

Ilay voampanga

Vladimir Baykalov

Teraka: 1963 (Krapivinski, Faritanin’i Kemerovo)

Mombamomba azy: Mpanao ady totohondry matihanina talohan’ny naha lasa Vavolombelon’i Jehovah azy. Tatỳ aoriana, lasa mpanazatra amin’ny fanatanjahan-tena sy mpitantana kianja iray

Nanambady an’i Irina tamin’ny 1984. Nitaiza zanaka lahy iray sy vavy iray

Nanomboka nianatra Baiboly i Irina tamin’ny 1995 dia natao batisa tamin’ny 1996. Hitan’i Vladimir hoe nisy vokany tsara tamin’ny tokantranony ny fampiharana ny torolalan’ny Baiboly. Naratra i Vladimir dia tapitra hatreo ny fanaovany ady totohondry. Nanomboka nandinika ny fiainany izy dia nianatra Baiboly, ary natao batisa tamin’ny 1999

Resadresaka nifanaovana taminy

Inona ny toetra nanampy anao hiaritra?

Rehefa falifaly aho, dia izay no manome hery ahy hanohy hanompo an’i Jehovah sy hazoto foana. Miezaka be mihitsy aho mba ho falifaly foana. Manokana fotoana be dia be, ohatra, aho mba hanompoana an’i Jehovah. Dia mazava ho azy koa fa misaintsaina an’ilay hoavy tsara be ampanantenain’i Jehovah aho. Rehefa manao an’ireo zavatra ireo aho dia lasa falifaly foana, na dia rehefa any amin’ny tribonaly aza.

Inona no andinin-teny ao amin’ny Baiboly mampahery anao?

Hazavain’i Jesosy ao amin’ny Marka 13:11 hoe inona no tokony hataontsika rehefa misy manolotra any amin’ny manam-pahefana isika. Hoy izy: “Aza manahy ny amin’izay holazainareo. Hampahatsiahy anareo izay tokony holazaina amin’izany ora izany ny fanahy masina, satria tsy ianareo no miteny, fa ny fanahy masina.” Tamin’izaho notsaraina voalohany dia navelan’ilay mpitsara hiaro ny tenako aho. Tena natahotra be mihitsy aho tao amin’ilay tribonaly. Nanampy ahy anefa ny fanahin’i Jehovah, dia nahavita niteny aho tao amin’ilay fitsarana, sady tony sy nanaja tsara. Tena novalian’i Jehovah ny vavaka nataoko, dia nomeny herim-po sy fahasahiana aho.

Matoky isika fa hanatanjaka ny mpanompony tsy mivadika rehetra foana i Jehovah, mba hahatonga an-dry zareo hahavita hiaritra sy ho falifaly foana.—Jakoba 1:2, 3.

Zava-nitranga

2 Febroary 2022

Nisokatra ny raharaham-pitsarana niampangana azy ho mpanao heloka bevava
3 Febroary 2022

Nosavaina ny tranony
26 Oktobra 2022

Nampangaina sady tsy navela hanao dia lavitra
30 Novambra 2022

Nanomboka ny fitsarana

Mety ho Tianao Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO