2 MEY 2023 | VAOVAO FARANY: 3 JOLAY 2023
ROSIA

VAOVAO FARANY: VOAHELOKA ILAY RAHALAHY | Nandrisika Azy ny Ohatr’ireo Olona Nanam-pinoana

HANDEFA

Nomelohin’ny Fitsaram-paritr’i Leninski any Novossibirsk ny Rahalahy Dmitriy Dolzhikov tamin’ny 30 Jona 2023, ary voaheloka higadra telo taona. Novan’ny mpitsara ho asa an-terivozona telo taona ilay sazy. Tsy voatery mankany am-ponja aloha izy amin’izao. Mandritra ny fotoana hanasaziana azy, dia halain’ny fanjakana ny 10 isan-jaton’ny karamany. Tsy mahazo mivoaka ny faritra misy azy koa izy.

Ilay voampanga

Dmitriy Dolzhikov

Teraka: 1978 (Kamyshevka, Faritanin’i Rostov)

Mombamomba azy: Niasa tamin’ny orinasa mpanao trano

Nihaona voalohany tamin’ny Vavolombelon’i Jehovah rehefa nanomboka nianatra Baiboly ny mamany. Tena nahavariana azy ny fitiavana sy ny firaisan-tsaina hitany tamin’izy nanatrika fivoriamben’ny vondrom-paritry ny Vavolombelon’i Jehovah. Natao batisa tamin’ny 1997

Nanambady an’i Marina tamin’ny 2008

Resadresaka nifanaovana taminy

Inona no nanampy anao ho vonona hiatrika fanenjehana?

Rehefa nosamborina sy voaheloka higadra ny Rahalahy Dennis Christensen tamin’ny 2017, dia nieritreritra foana aho hoe ahoana no azoko anatanjahana ny finoako dieny mbola tsy voasambotra aho. Nanomboka nivavaka hoatran’ilay ao amin’ny Salamo 26:2 aho. Niteny tamin’i Jehovah i Davida tao mba handinika azy sy hanadio ny eritreriny sy ny fony. Nanomboka nangataka tamin’i Jehovah aho mba hampiany hamantatra ny fahalemeko. Namerina namaky ny boky navoakan’ny fandaminana koa aho, anisan’izany ny boky Mpitory sy ilay hoe I Jesosy no Lalana sy Fahamarinana ary Fiainana. Notadidiko koa izay andinin-teny ahitana ny fampanantenan’i Jehovah hoe hanampy ny mpanompony izy rehefa ao anatin’ny fitsapana ry zareo.

Ny ohatr’iza ao amin’ny Baiboly no nanampy anao hiaritra?

Nampahery be ahy ny ohatr’i Elia. Nitady ny fanampian’i Jehovah izy rehefa nandositra an’i Jezebela Mpanjakavavy ratsy fanahy. Tsy hoe nampiseho ny heriny fotsiny i Jehovah rehefa namaly azy, fa nampahery an’i Elia koa sady nanome toky azy hoe tsy irery izy. Tsy matahotra mihitsy aho satria fantatro hoe eo foana i Jehovah sady vonona hanampy ahy.

Matoky isika hoe mbola hampahery an’i Dmitriy sy hampahery antsika rehetra foana i Jehovah rehefa mahita ny finoantsika sy ny fiaretantsika.—Apokalypsy 2:19.

Zava-nitranga

13 Mey 2022

Nampangaina ho mpanao heloka bevava
8 Septambra 2022

Nosavana ny trano. Notanana am-ponja vonjimaika
9 Septambra 2022

Nalaina am-bavany sy nentina fiaramanidina avy ao Tcheliabinsk mba ho any amin’ny fonja hitanana azy vonjimaika any Novossibirsk, izay any amin’ny 1 500 kilaometatra mahery miala eo
11 Novambra 2022

Nanomboka ny fitsarana azy
24 Novambra 2022

Navoaka tany am-ponja ary nambenana tao an-trano

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO