6 JANOARY 2023 | VAOVAO FARANY: 19 APRILY 2023
ROSIA

VAOVAO FARANY: VOAHELOKA ILAY RAHALAHY | “Vao Mainka Aho Matoky An’i Jehovah”

HANDEFA

Namoaka didy ny fitsarana any Nevinnomyssk, any amin’ny Faritanin’i Stavropol, tamin’ny 18 Aprily 2023, hoe homena sazy mihantona enin-taona ny Rahalahy Sergey Kuznetsov. Mbola tsy naiditra am-ponja aloha izy izao.

Ilay voampanga

Sergey Kuznetsov

Teraka: 1959 (Agadyr, Kazakhstan)

Mombamomba azy: Tompon’andraikitra tao amina tobim-pamokarana herinaratra izy taloha, fa tsy maintsy nijanona rehefa hita hoe nisy aretina ny tsoka tao amin’ny taolany. Nisy kansera koa tao amin’ny atidohany, dia indroa nodidiana izy mba hanalana an’ilay izy. Lasa malemy sy tsy mahita tsara izy vokatr’izany

Niasa saina izy satria hitany hoe tsy rariny ny fijaliana. Nifampiresaka tamin’ny Vavolombelon’i Jehovah izy tatỳ aoriana, dia nampahery azy ny fahamarinana ao amin’ny Baiboly. Natao batisa tamin’ny 1993. Manan-janaka roa vavy efa lehibe izy, ary izy roa vavy no mikarakara azy

Resadresaka nifanaovana taminy

Hitanao hoe nihatsara ve ny fifandraisanao tamin’i Jehovah tao anatin’izay fotoana nanenjehana anao izay?

Lasa mafimafy kely ny fiainako, amin’ilay izaho malemy. Na izany aza, dia vao mainka aho matoky an’i Jehovah. Imbetsaka izy no nanampy ahy, ary tsy nampoiziko mihitsy ny fomba nanaovany an’izany. Tsapako hoe tena marina ilay voalazan’ny Salamo 37:5 hoe: “Ankino amin’i Jehovah ny lalanao; miantehera aminy, dia hanampy anao izy.” Tena tia ahy sy mikarakara ahy i Jehovah, dia vao mainka aho tsy te hivadika aminy.

Rehefa mieritreritra ny fomba ikarakaran’i Jehovah an’i Sergey isika, dia vao mainka matoky hoe mahita ‘ny fijaliana rehetra’ mahazo antsika i Jehovah, ary ‘hibata sy hitondra’ antsika foana izy rehefa miatrika fitsapana isika na inona izany na inona.—Isaia 63:9.

Zava-nitranga

21 Novambra 2018

Nanao bemidina tany amin’ny tranona Vavolombelon’i Jehovah maromaro tany Nevinnomyssk ny manam-pahefana, anisan’izany ny tao an-tranon’i Sergey
12 Desambra 2019

Nampangaina hoe mpanao heloka bevava
18 Jona 2020

Nampidirina ao amin’ny lisitry ny olona mampidi-doza
31 Mey 2022

Tsy navela hanao dia lavitra
7 Septambra 2022

Nanomboka ny fitsarana azy

Jereo Koa

VAOVAO

Gadraina Noho ny Finoany: Rosia

Gadraina noho ny finoany ny Vavolombelon’i Jehovah any Rosia. Diniho ny tantaran-dry zareo ary ataovy pirinty ny lisitr’ireo Vavolombelona izay any am-ponja amin’izao.

VAOVAO